Iok-pek-kì 33

Iok-pek-kì 33 - 現代台語譯本羅馬字版(TTVR)-闽南语

1Taⁿ, Iok-pek, tio̍h thiaⁿ góa kóng,

chù-ì thiaⁿ góa beh kóng ê ōe.

2Góa beh khui-chhùi;

góa ê ōe tī chhùi-kháu teh-beh chhut--lâi.

3Góa beh sêng-si̍t tùi sim-lāi kóng-chhut;

góa beh láu-si̍t kóng góa só͘ chai--ê.

4Siōng-tè ê sîn chhòng-chō góa;

Choân-lêng-chiá ê khùi hō͘ góa oa̍h-miā.

5Lí nā ōe, tio̍h ìn góa;

khí-lâi piān-bêng lí ê li̍p-tiûⁿ.

6Góa tī Siōng-tè ê bīn-chêng kap lí kâng-khoán,

sī ēng thô͘ chō--ê.

7Góa bô sím-mi̍h thang hō͘ lí kiaⁿ,

mā bōe hō͘ lí tōa ê ap-le̍k.

8Lí só͘ kóng--ê, góa khak-si̍t ū thiaⁿ--tio̍h,

ū thiaⁿ-kìⁿ lí ê ōe, kóng,

9“Góa chheng-khì, bô kè-sit;

góa chheng-pe̍k, bô-chōe.

10Siōng-tè chhē lí-iû kong-kek góa,

khòaⁿ góa chòe I ê tùi-te̍k.

11I ēng kha-khàu khàu góa ê kha,

kàm-sī góa it-chhè ê hêng-ûi.”

12Góa kā lí kóng: Lí kóng chiah-ê lóng m̄-tio̍h,

in-ūi Siōng-tè pí lâng khah tōa.

13Lí sī-án-chóaⁿ kap I cheng-lūn,

kóng “I lóng bô ìn-tap góa ê sin-sò͘”?

14Kî-si̍t Siōng-tè it-chài soat-bêng,

m̄-kú lâng bô tì-ì thiaⁿ.

15Mî--sî lâng tó tī bîn-chhn̂g khùn tāng-bîn ê sî,

Siōng-tè ēng bîn-bāng kap īⁿ-siōng

16tùi in kóng-ōe,

kā in kéng-kò, hō͘ in kiaⁿ-hiâⁿ,

17beh hō͘ lâng lī-khui pháiⁿ hêng-ûi,

hō͘ lâng bōe kiau-ngō͘,

18hō͘ i ê sìⁿ-miā bián lo̍h Chhim-khiⁿ,

mā bián hō͘ to-kiàm thâi-sí.

19Ū lâng tó tī bîn-chhn̂g siū-tio̍h thàng-thiàⁿ ê chek-hoa̍t,

kut-thâu thiàⁿ kah tòng bōe tiâu,

20tì-kàu thó-ià chia̍h-mi̍h,

liân siōng-ài ê chia̍h-mi̍h to iàm-ò͘ⁿ.

21I siau-sán-lo̍h-bah,

pêng-sî khòaⁿ bōe tio̍h ê kut-thâu lóng thóng--chhut-lâi.

22I ê sìⁿ-miā kūn-óa Chhim-khiⁿ,

chiap-kūn Sí-bông ê kài-sòaⁿ.

23Chi̍t-chheng ê thiⁿ-sài tiong-kan nā ū chi̍t ê chòe tiong-kan-jîn,

chiong lâng eng-kai chòe--ê kā i chí-sī,

24thiⁿ-sài chiū lîn-bín i, kóng,

“I bián lo̍h Chhim-khiⁿ,

góa í-keng ūi-tio̍h i chhē-tio̍h sio̍k-hôe ê tāi-kè.”

25I ê bah ōe pí gín-á ê bah khah iù-nńg;

i ōe ho̍k-tò siàu-liân ê ji̍t-chí.

26I kî-tó Siōng-tè, Siōng-tè hoaⁿ-hí kā i chiap-la̍p;

i ōe hoaⁿ-hí kìⁿ Siōng-tè ê bīn;

Siōng-tè ōe koh khòaⁿ i chòe gī.

27I ōe tī lâng ê bīn-chêng tōa-siaⁿ kóng,

“Góa ū hoān-chōe, ū tian-tò sī-hui,

m̄-kú bô siū eng-kai siū ê hêng-hoa̍t.

28Siōng-tè kiù-sio̍k góa ê sìⁿ-miā bián lo̍h sí-bông ê Chhim-khiⁿ;

góa ê sìⁿ-miā ōe kìⁿ-tio̍h kng.”

29Khòaⁿ leh, Siōng-tè chi̍t-piàn koh chi̍t-piàn ūi-tio̍h lâng teh chòe chiah-ê tāi-chì,

30beh kiù lâng thoat-lī Chhim-khiⁿ,

hō͘ sìⁿ-miā ê kng chiò i.

31 Iok-pek ah, lí chù-ì thiaⁿ góa ê ōe,

chēng-chēng thiaⁿ góa kóng.

32Lí nā ū ōe beh kóng, tio̍h kóng;

chòe lí kóng, góa chin ài lí sī tio̍h.

33Lí nā bô beh kóng, tio̍h chēng-chēng thiaⁿ góa kóng;

góa beh chiong tì-hūi thoân-siū hō͘ lí.

Iok-pek-kì 33 - 現代台語譯本羅馬字版(TTVR)-闽南语

Learn More About Us