Si-phian 74

Si-phian 74 - 現代台語譯本羅馬字版(TTVR)-闽南语

A-sat kà-sī ê si.Kiû Siōng Chú Kái-kiù Kok-ka

1Siōng-tè ah, sī-án-chóaⁿ lí éng-oán pàng-sak goán?

Sī-án-chóaⁿ lí tùi lí chháu-po͘ ê iûⁿ hoat siū-khì, khì kah phīⁿ-khang chhèng-ian?

2Kiû lí ōe-kì-tit lí chá-chêng kéng-soán ê chú-bîn,

lí só͘ sio̍k-hôe chòe lí sán-gia̍p ê bîn-cho̍k,

mā ōe-kì-tit lí só͘ khiā-khí ê Sek-an-soaⁿ.

3Kiû lí kiâⁿ-lâi kú-kú pha-hng ê só͘-chāi,

khòaⁿ tùi-te̍k thiat-tóe húi-hoāi ê sèng-só͘.

4Lí ê tùi-te̍k tī lí tiān-lāi hoan-ho͘,

chhāi in ê kî chòe kì-hō,

5chhin-chhiūⁿ lâng gia̍h pó͘-thâu,

chhò chhiū-nâ ê chhiū.

6Sèng-só͘ lāi-bīn it-chhè ê tiau-khek,

in ēng pó͘-thâu kap thûi lóng-chóng phò-hoāi.

7In pàng-hé sio-húi lí ê sèng-só͘,

phah lâ-sâm lí khiā-khí ê só͘-chāi.

8In chham-siông kóng, “Lán lâi kā in thiat-tóe húi-hoāi.”

In chiong ta̍k-ūi kèng-pài Siōng-tè ê só͘-chāi lóng sio-liáu-liáu.

9Goán bô koh khòaⁿ-kìⁿ tiāu-thâu,

mā bô koh ū sian-ti;

chit-khoán chêng-hêng ōe kàu sím-mi̍h sî, goán tiong-kan bô lâng chai.

10Siōng-tè ah, tùi-te̍k ki-chhì ōe kàu sím-mi̍h sî?

Te̍k-jîn siat-to̍k lí ê miâ ōe kàu éng-oán mah?

11Lí sī-án-chóaⁿ chhiú kiu--khí-lâi m̄ chhap goán?

Kiû lí chhiú chhun-chhut-lâi kā in húi-bia̍t.

12Chóng-sī Siōng-tè tùi kó͘-chá chiū-sī góa ê Ông,

tī tōe-chiūⁿ si-hêng chín-kiù.

13Lí bat ēng lí ê koân-lêng chiong hái pun-khui,

kòng-phòa chúi-tiong hái-koài ê thâu-khak.

14Lí bat kòng-chhùi hái-siù ê thâu-khak,

hō͘ khòng-iá ê iá-siù chòe chia̍h-mi̍h.

15Lí bat pun-khui chúi-goân kap hô-liû,

bat hō͘ tn̂g-lâu ê kang-hô ta--khì.

16Ji̍t--sî kap mî--sî, sī lí só͘ an-pâi;

ji̍t-thâu kap kng-thé sī lí só͘ chhòng-chō.

17Tōe-chiūⁿ it-chhè ê kài-hān sī lí só͘ tēng;

hē-thiⁿ kap tang-thiⁿ sī lí só͘ siat.

18Siōng Chú ah, kiû lí kì-tit tùi-te̍k án-chóaⁿ teh húi-pòng,

gû-gōng ê lâng án-chóaⁿ teh siat-to̍k lí ê miâ.

19Kiû lí m̄-thang chiong sûn-liông chú-bîn ê sìⁿ-miā kau hō͘ iá-siù,

m̄-thang éng-oán bōe-kì-tit lí sàn-chhiah ê cho̍k-kûn.

20Kiû lí ōe-kì-tit kap goán li̍p ê iok,

in-ūi tōe-chiūⁿ o͘-àm ê só͘-chāi lóng sī kiông-pō ê lâng ê châu-hia̍t.

21Kiû lí m̄-thang hō͘ siū ap-chè ê lâng kiàn-siàu tńg--khì;

kiû lí hō͘ khùn-khó͘ sàn-chhiah ê lâng chheng-chàn lí ê miâ.

22Siōng-tè ah, kiû lí khí-lâi ūi ka-kī piān-hō͘,

ōe-kì-tit gōng-lâng kui-ji̍t án-chóaⁿ teh húi-pòng lí.

23Kiû lí m̄-thang bōe-kì-tit lí tùi-te̍k ê hán-hoah,

m̄-thang bōe-kì-tit khí-lâi kong-kek lí ê lâng bô-thêng ê chhiàng-siaⁿ.

Si-phian 74 - 現代台語譯本羅馬字版(TTVR)-闽南语

Learn More About Us