Sin-bēng-kì 26

Sin-bēng-kì 26 - 現代台語譯本羅馬字版(TTVR)-闽南语

Hōng-hiàn Thâu-chúi ê Thó͘-sán

1Lín sêng-chiap Siōng Chú — lín ê Siōng-tè siúⁿ-sù lín chòe sán-gia̍p ê tōe lâi khiā-khí ê sî,

2tio̍h tùi Siōng Chú — lín ê Siōng-tè siúⁿ-sù lín ê tōe, chiong só͘ siu-sêng ta̍k-hāng khí-thâu-se̍k ê thó͘-sán, the̍h chi̍t-kóa hē tī nâ-á, khì Siōng Chú — lín ê Siōng-tè kéng-soán hō͘ lín ho̍k-sāi I ê só͘-chāi.

3Lín tio̍h khì kìⁿ ti̍t-pan ê chè-si, kā i kóng, “Góa kin-á-ji̍t tùi Siōng Chú — góa ê Siōng-tè soan-jīn, góa í-keng lâi kàu Siōng Chú tùi goán ê lia̍t-chó͘ li̍p-sè siúⁿ-sù goán ê tōe.”

4Chè-si chiū chiong lí ê nâ-á chiap--khì, hē tī Siōng Chú — lí ê Siōng-tè ê chè-tôaⁿ chêng.

5Lí tio̍h tī Siōng Chú — lí ê Siōng-tè bīn-chêng kò-pe̍k kóng, “Góa ê chó͘-sian sī chi̍t ê sì-kòe liû-lōng ê A-lân-lâng, lo̍h-khì Ai-ki̍p, tī hia kià-ku, lâng-gia̍h chió-chió; āu-lâi tī hia chiâⁿ-chòe chi̍t ê tōa koh kiông, lâng-gia̍h chōe ê bîn-cho̍k.

6Ai-ki̍p-lâng khó͘-chhó͘ goán, khi-ap goán, kiông-pek goán chòe khó͘-kang,

7goán chiū ai-kiû Siōng Chú — goán lia̍t-chó͘ ê Siōng-tè. Siōng Chú thiaⁿ-kìⁿ goán ê siaⁿ, khòaⁿ-kìⁿ goán ê khùn-kéng, goán ê lô-khó͘, goán siū ê ap-pek,

8Siōng Chú chiū chhun-chhut tōa khùi-la̍t ê chhiú, ēng tōa koh thang-kiaⁿ ê sū kap sîn-jiah kî-sū, chhōa goán chhut Ai-ki̍p;

9koh chhōa goán kàu chit só͘-chāi, chiong chit-ê lâu lin kap bi̍t ê tōe siúⁿ-sù goán.

10Taⁿ, Siōng Chú, lí siúⁿ-sù hō͘ góa chit-ê tōe khí-thâu-se̍k ê thó͘-sán, góa í-keng tòa-lâi hōng-hiàn hō͘ lí.”

Liáu-āu, lí tio̍h chiong hiah-ê chè-mi̍h hē tī Siōng Chú — lí ê Siōng-tè bīn-chêng, tī hia kèng-pài I.

11Lí kap Lī-bī-lâng, í-ki̍p lín tiong-kan ê gōa-cho̍k-lâng, tio̍h in-ūi Siōng Chú — lí ê Siōng-tè siúⁿ-sù lí kap lí ê ka-koàn it-chhè ê hok-hūn lâi khèng-chiok.

12Ta̍k-piàn kàu tē-saⁿ nî, chiū-sī hōng-hiàn cha̍p-hūn-chi̍t ê nî, tio̍h chiong it-chhè thó͘-sán ê cha̍p-hūn-chi̍t pun hō͘ Lī-bī-lâng, gōa-cho̍k-lâng, kap ko͘-jî kóaⁿ-hū, hō͘ in tī lí ê siâⁿ-tìn thang tit-tio̍h pá-chiok,

13án-ni lí thang tùi Siōng Chú — lí ê Siōng-tè kóng, “Góa í-keng chiàu lí só͘ bēng-lēng góa it-chhè ê kài-bēng, tùi góa ê ke chiong hōng-hiàn ê mi̍h the̍h-chhut, hō͘ Lī-bī-lâng, gōa-cho̍k-lâng, kap ko͘-jî kóaⁿ-hū; lí ê kài-bēng góa bô ûi-pōe, mā bô bōe-kì--tit.

14Chhù-lāi ū song-sū ê sî, góa bô chia̍h hōng-hiàn ê mi̍h; lé-gî-siōng bô chheng-khì ê sî, góa bô kā chiah-ê the̍h--chhut-khì, mā bô chiong chiah-ê hiàn hō͘ sí-lâng; góa ū chun-siú Siōng Chú — góa ê Siōng-tè só͘-ū bēng-lēng góa ê ōe.

15Kiû lí tùi thiⁿ-téng, lí khiā-khí ê sèng-só͘, àⁿ-lo̍h khòaⁿ, sù-hok lí ê chú-bîn Í-sek-lia̍t kap lí siúⁿ-sù goán ê tōe, chiū-sī lí tùi goán ê lia̍t-chó͘ li̍p-sè só͘ hō͘ goán chit-ê lâu lin kap bi̍t ê tōe.”

Siōng Chú ê Chú-bîn

16Kin-á-ji̍t Siōng Chú — lín ê Siōng-tè hoan-hù lín chun-siú chiah-ê kui-lē kap bēng-lēng, só͘-í lín tio̍h chīn-sim chīn-sèng chhiat-si̍t chun-hêng.

17Kin-á-ji̍t lín í-keng soan-jīn Siōng Chú chòe lín ê Siōng-tè, beh kiâⁿ I ê tō-lō͘, chun-siú I ê kui-lē, kài-bēng, kap bēng-lēng, koh beh thiaⁿ-thàn I ê ōe.

18Siōng Chú kin-á-ji̍t mā chiàu I tùi lín ê èng-ún, sêng-jīn lín chòe I te̍k-pia̍t ê chú-bîn, hō͘ lín siú I it-chhè ê kài-bēng;

19koh beh chiàu I ê èng-ún, hō͘ lín tit-tio̍h o-ló, miâ-siaⁿ, chun-kùi, chhiau-kè I só͘ chhòng-chō ê bān-cho̍k, hō͘ lín chiâⁿ-chòe kui-sio̍k Siōng Chú — lín ê Siōng-tè sèng-kiat ê chú-bîn.

Sin-bēng-kì 26 - 現代台語譯本羅馬字版(TTVR)-闽南语

Learn More About Us