Iâ-lī-bí-su 29

Iâ-lī-bí-su 29 - 現代台語譯本羅馬字版(TTVR)-闽南语

Iâ-lī-bí Siá-phoe Hō͘ Siū-lia̍h tī Pa-pí-lûn ê Iû-tāi-lâng

1Sian-ti Iâ-lī-bí tùi Iâ-lō͘-sat-léng siá-phoe hō͘ Nî-pò͘-kah-nî-sat tùi Iâ-lō͘-sat-léng lia̍h-khì Pa-pí-lûn iáu oa̍h--teh ê tiúⁿ-ló, chè-si, sian-ti, í-ki̍p só͘-ū ê jîn-bîn.

2Chit-tiuⁿ phoe sī tī Iok-ngá-kun-ông, thài-hō͘ kap tiâu-têng ê jîn-sîn, Iû-tāi kap Iâ-lō͘-sat-léng ê léng-siù, choh-kang sai-hū kap phah-thih sai-hū, hō͘ lâng tùi Iâ-lō͘-sat-léng lia̍h--khì í-āu siá--ê.

3Chit-tiuⁿ phoe sī thok Sa-hoan ê kiáⁿ Í-lī-a-sat, kap Hi-le̍k-ka ê kiáⁿ Ki-má-lī-ngá tòa-khì Pa-pí-lûn; in nn̄g ê lâng ū siū Iû-tāi-ông Se-tí-ka phài-khì kìⁿ Pa-pí-lûn-ông Nî-pò͘-kah-nî-sat. Phoe án-ni siá:

4Siōng Chú — Bān-kun ê Thóng-sòe, Í-sek-lia̍t ê Siōng-tè kā só͘-ū tùi Iâ-lō͘-sat-léng siū-lia̍h khì Pa-pí-lûn ê lâng án-ni kóng,

5“Lín tio̍h tī Pa-pí-lûn khí-chhù tòa, chèng-choh, chia̍h chhut-sán ê mi̍h,

6chhōa-bó͘ siⁿ-kiáⁿ, hō͘ lín ê hāu-siⁿ cha-bó͘-kiáⁿ kiat-hun, ióng-io̍k chú-lú. Lín tio̍h tī hia siⁿ-thòaⁿ, m̄-thang hō͘ lín ê jîn-kháu kiám-chió.

7Lín tio̍h ūi kā lín liû-hòng--khì ê siâⁿ-tìn kiû pêng-an, ǹg Siōng Chú kî-tó, in-ūi hiah-ê siâⁿ-tìn pêng-an hoân-êng, lín chiah ōe pêng-an hoân-êng.”

8Siōng Chú — Bān-kun ê Thóng-sòe, Í-sek-lia̍t ê Siōng-tè koh kā lín kóng, “M̄-thang hō͘ lín tiong-kan ê sian-ti kap pok-kòa--ê phiàn--khì, mā m̄-thang sìn in chòe ê bāng.

9In-ūi góa bô chhe-phài chiah-ê lâng, m̄-kú in lī-iōng góa ê miâ kóng ké ê ū-giân.” Siōng Chú án-ni soan-kò.

10Siōng Chú koh kóng, “Góa ūi Pa-pí-lûn só͘ tēng chhit-cha̍p nî ê kî-hān chi̍t-ē móa, góa ōe koàn-kò͘ lín, si̍t-hiān góa tùi lín kóng--kè beh sù-hok ê èng-ún, chhōa lín tńg-lâi chit-tè thó͘-tōe.

11Siōng Chú án-ni kóng: Góa khak-si̍t chai, góa ūi-tio̍h lín tēng ê kè-ōe sī beh hō͘ lín pêng-an hoân-êng, m̄-sī beh hō͘ lín siū chai-hō, thang hō͘ lín ū kng-bêng ê chiong-lâi.

12Lín kiû-kiò góa, ǹg góa kî-tó, góa ōe chù-ì thiaⁿ.

13Lín nā chhē-kiû góa, lín ōe chhē--tio̍h; lín nā choân-sim chhē-kiû góa,

14góa it-tēng ōe hō͘ lín chhē--tio̍h. Siōng Chú án-ni kóng. Góa mā beh kā lín chiah-ê siū-lia̍h ê lâng chhōa--tò-lâi; chiong lín tùi góa kā lín liû-hòng--khì ê ta̍k-kok ta̍k só͘-chāi tiàu-chi̍p, chhōa tńg-lâi lín siū-lia̍h lī-khui ê hiong-thó͘.” Siōng Chú án-ni soan-pò͘.

15Lín kóng, “Siōng Chú ū tī Pa-pí-lûn kā goán heng-khí sian-ti.”

16Taⁿ, chiam-tùi chē Tāi-pi̍t pó-chō ê ông, kap tòa tī chit-ê siâⁿ bô kap lín chòe-hé siū liû-hòng ê tông-pau,

17Siōng Chú — Bān-kun ê Thóng-sòe án-ni kóng, “Tio̍h chù-ì thiaⁿ! Góa beh hō͘ in siū chiàn-loān, ki-hng, un-e̍k ê chai-lān, hō͘ in pìⁿ-chòe nōa kah bōe-chia̍h--tit ê bû-hoa-kó.

18Góa beh ēng chiàn-loān, ki-hng, un-e̍k tui-jip in, hō͘ in liû-hòng khì tī thiⁿ-ē bān-cho̍k; in bô-lūn hō͘ góa kóaⁿ-khì tó-ūi, hia ê lâng lóng ōe kā in chiù-chó͘, thí-chhiò, bú-jio̍k, koh tùi in ê cho-gū kám-kak tio̍h-kiaⁿ.

19Siōng Chú kóng, che sī in-ūi in bô thiaⁿ-thàn góa ê ōe. Góa chi̍t-piàn koh chi̍t-piàn chhe-phài góa ê po̍k-jîn chèng sian-ti khì kā in kóng-ōe, in lóng m̄ thiaⁿ.

20Só͘-í, lín chiah-ê hō͘ góa tùi Iâ-lō͘-sat-léng liû-hòng khì Pa-pí-lûn ê lâng, tio̍h chù-ì thiaⁿ góa Siōng Chú ê ōe.”

21Koan-hē Ko-nāi-ngá ê kiáⁿ A-hap, kap Má-se-ngá ê kiáⁿ Se-tí-ka, Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng, “In lī-iōng góa ê miâ tùi lín kóng ké ê ū-giân, góa beh chiong in kau hō͘ Pa-pí-lûn-ông Nî-pò͘-kah-nî-sat; i ōe tī lín ê bīn-chêng kā in chhú-sí.

22Lín só͘-ū hō͘ lâng lia̍h-khì Pa-pí-lûn ê Iû-tāi-lâng beh kā lâng chiù-chó͘ ê sî, ōe ēng chit nn̄g ê lâng ê miâ kā lâng kóng, ‘Goān Siōng Chú hō͘ lí chhin-chhiūⁿ Pa-pí-lûn-ông ēng hé sio-sí ê Se-tí-ka kap A-hap.’

23In-ūi in tī Í-sek-lia̍t-lâng ê tiong-kan chòe kiàn-siàu-sū, kap chhù-piⁿ ê bó͘ kiâⁿ kan-îm, koh lī-iōng góa ê miâ kóng góa bô bēng-lēng in kóng ê pe̍h-chha̍t-ōe. Góa chai-iáⁿ chiah-ê tāi-chì, mā chhin-sin choh-chèng.” Siōng Chú án-ni soan-kò.

Sī-má-ngá ê Phoe

24Koan-hē Nî-hi-lân-lâng Sī-má-ngá,

25Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng, “Lí ū ēng lí ka-kī ê miâ siá-phoe hō͘ Iâ-lō͘-sat-léng só͘-ū ê jîn-bîn, Má-se-ngá ê kiáⁿ chè-si Se-hoan-ngá, kap só͘-ū ê chè-si, kóng,

26‘Siōng Chú í-keng siat-li̍p lí Se-hoan-ngá chòe chè-si, chhú-tāi Iâ-hô-iâ-tāi chòe Siōng Chú sèng-tiān ê kam-tok, ōe-tàng kā só͘-ū ka-kī hong chòe sian-ti ê siáu-lâng khàu chhâ-kê thih-kho͘.

27Hiān-chāi, A-ná-tu̍t-lâng Iâ-lī-bí chū-chheng sī sian-ti, lí sī-án-chóaⁿ bô kā i chí-chek?

28I ū siá-phoe lâi Pa-pí-lûn, kā goán kóng, goán liû-hòng ê sî-kan ōe thoa chin kú, só͘-í tio̍h tī chia khí-chhù tòa, chèng-choh, chia̍h chhut-sán ê mi̍h.’”

29Chè-si Se-hoan-ngá chiong chit-tiuⁿ phoe tha̍k hō͘ sian-ti Iâ-lī-bí thiaⁿ.

30Hit-sî, Siōng Chú tùi Iâ-lī-bí kóng,

31“Lí tio̍h siá-phoe hō͘ só͘-ū liû-hòng tī Pa-pí-lûn ê tông-pau:

“Koan-hē Nî-hi-lân-lâng Sī-má-ngá, Siōng Chú kóng, ‘Góa bô chhe-phài Sī-má-ngá, m̄-kú i kèng-jiân tùi lín kóng ū-giân, hō͘ lín siong-sìn i ê pe̍h-chha̍t-ōe,

32só͘-í góa Siōng Chú án-ni kóng: Góa beh hêng-hoa̍t Nî-hi-lân-lâng Sī-má-ngá kap i ê hō͘-tāi. I ê hō͘-tāi it-tēng bô chi̍t ê ōe-tàng tòa tī chiah-ê jîn-bîn tiong-kan, mā bōe-tàng oa̍h-teh hióng-siū góa beh sù hō͘ góa ê chú-bîn ê hok-khì, in-ūi i siàn-tōng lâng pōe-poān Siōng Chú.’ Siōng Chú án-ni soan-kò.”

Iâ-lī-bí-su 29 - 現代台語譯本羅馬字版(TTVR)-闽南语

Learn More About Us