Í-se-kiat-su 32

Í-se-kiat-su 32 - 現代台語譯本羅馬字版(TTVR)-闽南语

Ēng Hái-koài Pí-phēng Ai-ki̍p-ông

1Tē-cha̍p-jī nî cha̍p-jī-ge̍h chhoe-it, Siōng Chú tùi góa kóng,

2“Jîn-chú ah, lí tio̍h ūi Ai-ki̍p-ông chòe ai-ko, kā i kóng: Lí siūⁿ-kóng ka-kī tī lia̍t-kok tiong sī siàu-chòng ê sai, kî-si̍t, lí sī hái--ni̍h ê hái-koài. Lí tī kang-hô phah-phún, ēng kha lā chúi, hō͘ hô-chúi pìⁿ lô.

3Chì-koân ê Siōng Chú án-ni kóng: Tī chin chōe kok-ka ê jîn-bîn chū-chi̍p ê sî, góa beh pha góa ê bāng kā lí lia̍h--khí-lâi, kiò in kā lí thoa-chiūⁿ hōaⁿ.

4Góa beh kā lí hiat tī thô͘-kha, tàn tī iá-tōe, hō͘ lí chòe khong-tiong ê pe-chiáu kap tōe-chiūⁿ cháu-siù ê chia̍h-mi̍h.

5Góa beh kā lí ê sin-si tàn tī soaⁿ--ni̍h, ēng lí nōa--khì ê si-thé kā soaⁿ-kok thūn-tīⁿ.

6Góa beh hō͘ thó͘-tōe lim lí ê huih; hō͘ lí ê huih im kàu soaⁿ-niá, tiòng-móa kang-hô.

7Góa siau-bia̍t lí ê sî, beh jia-khàm thiⁿ, hō͘ chhiⁿ-sîn o͘-àm; góa beh ēng ba̍t-hûn jia ji̍t-thâu, hō͘ ge̍h-niû mā bōe hoat-kng.

8Góa beh hō͘ thiⁿ-téng ê kng-thé bōe koh hoat-kng, hō͘ lí ê thó͘-tōe hām-ji̍p o͘-àm. Góa — Chì-koân ê Siōng Chú án-ni soan-kò.

9“Góa hō͘ lí tī lia̍t-kok tiong bia̍t-bông ê siau-sit, thoân kàu lí m̄-bat ê kok-ka ê sî, góa beh hō͘ hiah-ê jîn-bîn ê sim kiaⁿ-hiâⁿ.

10Góa tī lia̍t-kok bīn-chêng lāng to-kiàm ê sî, in ê jîn-bîn beh in-ūi lí kiaⁿ-hiâⁿ, kun-ông mā beh in-ūi lí ngia̍uh-ngia̍uh-chhoah. Lí tó-hoāi hit-ji̍t, in lóng beh ūi-tio̍h ka-kī ê sìⁿ-miā put-sî phi̍h-phi̍h-chhoah.

11“Chì-koân ê Siōng Chú án-ni kóng: Pa-pí-lûn-ông beh gia̍h to kong-kek lí.

12Góa beh ēng in ê chiàn-sū siau-bia̍t lí ê kun-tūi; in sī lia̍t-kok tiong siōng hiong-ok--ê. Ai-ki̍p ê khoa-iāu beh thiat-tóe siau-sit, i ê kun-tūi beh bia̍t-bông.

13Góa beh thâi-sí hô-piⁿ ê cheng-siⁿ; bô koh ū lâng kap cheng-siⁿ ēng kha lā hô-chúi, hō͘ chúi lô--khì.

14Hit-sî, góa beh hō͘ in ê hô-chúi chheng-chheng, hō͘ hô-chúi chhin-chhiūⁿ iû khoaⁿ-khoaⁿ-á lâu. Góa — Chì-koân ê Siōng Chú án-ni soan-kò.

15Góa hō͘ Ai-ki̍p pha-hng, thó͘-tōe bô chhun pòaⁿ-hāng, kā i ê chū-bîn lóng thâi-sí ê sî, in chiū chai góa sī Siōng Chú.

16Che sī chi̍t siú lâng ai-siong ê sî chhiùⁿ ê ai-ko. Lia̍t-kok ê lú-chú beh ūi-tio̍h Ai-ki̍p kap i ê jîn-bîn chhiùⁿ chit-siú ai-ko. Chì-koân ê Siōng Chú án-ni soan-kò.”

Im-kan

17Tē-cha̍p-jī nî bó͘-ge̍h ê cha̍p-gō͘, Siōng Chú tùi góa kóng,

18“Jîn-chú ah, lí tio̍h ūi Ai-ki̍p ê kûn-chiòng thî-khàu, in kap kî-tha kiông-kok ê jîn-bîn beh siū hiat-lo̍h tōe chhim ê só͘-chāi, kap hiah-ê í-keng tī Im-kan ê lâng chòe-hé.

19Lí tio̍h tùi in kóng:

Lí siūⁿ-kóng lí siōng súi o͘h?

Lí lo̍h-khì Chhim-khiⁿ, khì kap bô siū kat-lé ê lâng chòe-hé!

20“In beh kap hiah-ê hō͘ to-kiàm thâi-sí ê lâng tó chòe-hé. To í-keng chhut-siù, Ai-ki̍p kap i ê jîn-bîn lóng ōe hō͘ lâng thâi-sí.

21Tī Im-hú siōng kiông-béng ê chiàn-sū beh kā Ai-ki̍p í-ki̍p kap i kiat-bêng ê kok-ka kóng, ‘Hiah-ê bô siū kat-lé, hō͘ to thâi-sí ê lâng lóng lo̍h-lâi tó tī chia!’

22“A-su̍t kap i ê chiàn-sū lóng tī hia, i ê chiàn-sū tâi tī sì-chiu-ûi; in lóng hō͘ to-kiàm thâi-sí.

23In ê hûn-bōng tī Im-kan ke̍k-chhim ê só͘-chāi, i ê chiàn-sū tâi tī sì-chiu-ûi; in lóng sī hō͘ to-kiàm thâi--sí-ê. In chāi-siⁿ ê sî, lâng hui-siông kiaⁿ in.

24“Í-lân kap i ê chiàn-sū lóng tī hia, i ê chiàn-sū tâi tī sì-chiu-ûi. Hiah-ê bô siū kat-lé, hō͘ to-kiàm thâi-sí ê lâng lóng lo̍h tī Im-kan. In chāi-siⁿ ê sî, lâng hui-siông kiaⁿ in; taⁿ sí-liáu, in kap só͘-ū sí ê lâng siâng-khoán siū bú-jio̍k.

25Tī hō͘ lâng thâi-sí ê lâng tiong-kan, in ūi-tio̍h Í-lân chòe chi̍t téng bîn-chhn̂g, in ê chiàn-sū lóng tâi tī sì-chiu-ûi. In sī bô siū kat-lé, hō͘ to-kiàm thâi-sí ê lâng. In chāi-siⁿ ê sî, lâng hui-siông kiaⁿ in; taⁿ sí-liáu, in kap só͘-ū sí ê lâng siâng-khoán siū bú-jio̍k.

26“Bí-siat, Thó͘-pa kap in ê chiàn-sū mā tī hia, in ê chiàn-sū lóng tâi tī sì-chiu-ûi. In lóng sī bô siū kat-lé, hō͘ to-kiàm thâi-sí ê lâng. In chāi-siⁿ ê sî, lâng hui-siông kiaⁿ in.

27In bô kap hiah-ê kó͘-chá ê ióng-sū chòe-hé bâi-chòng; chiah-ê ióng-sū tòa kun-khì lo̍h-khì Im-hú, to-kiàm chòe chím-thâu, chōe ê hêng-hoa̍t khàm tī in ê kut-thâu téng. In chāi-siⁿ ê sî, lâng hui-siông kiaⁿ in.

28“Hoat-ló, lí beh hō͘ lâng chhùi-kut-hun-si, tó tī bô siū kat-lé, hō͘ to-kiàm thâi-sí ê lâng tiong-kan.

29“Í-tong mā tī hia, i ê ông kap só͘-ū ê léng-siù sui-jiân sī ióng-béng ê chiàn-sū, m̄-kú mā beh kap bô siū kat-lé, hō͘ lâng thâi-sí, kap lo̍h Im-kan ê lâng tó chòe-hé.

30“Só͘-ū pak-hng ê léng-siù kap Se-tùn-lâng mā tī hia; in ê koân-sè bat hō͘ lâng khióng-hông kiaⁿ-hiâⁿ. Taⁿ in mā kap bô siū kat-lé, hō͘ to-kiàm thâi-sí ê lâng chòe-hé tó tī Im-kan, siū bú-jio̍k.”

31“Chì-koân ê Siōng Chú kóng: Ai-ki̍p-ông khòaⁿ-kìⁿ hiah-ê kok-ka ê bia̍t-bông, ōe ūi-tio̍h hō͘ to thâi-sí ê kun-peng kám-kak an-ùi.

32“Sui-jiân góa bat ēng Ai-ki̍p-ông hō͘ sè-kan-lâng kiaⁿ-hiâⁿ, m̄-kú i kap i ê kun-tūi mā lóng beh kap hiah-ê bô siū kat-lé, hō͘ to-kiàm thâi-sí ê lâng tó chòe-hé. Chì-koân ê Siōng Chú án-ni soan-kò.”

Í-se-kiat-su 32 - 現代台語譯本羅馬字版(TTVR)-闽南语

Learn More About Us