Í-su-la-kì 5

Í-su-la-kì 5 - 現代台語譯本羅馬字版(TTVR)-闽南语

1Hit-sî ū sian-ti Hap-kai, kap E̍k-to ê sun sian-ti Sat-ka-lī-a, hōng Í-sek-lia̍t Siōng-tè ê miâ, tùi Iû-tāi kap Iâ-lō͘-sat-léng ê Iû-thài-lâng thoân-ta̍t Siōng-tè ê ōe.

2Sat-la-thiat ê kiáⁿ Só͘-lô-pa-pek, kap Iok-sat-ta̍t ê kiáⁿ Iâ-su-a, chiū lóng khí-lâi tio̍k-chhiú tiông-kiàn Iâ-lō͘-sat-léng Siōng-tè ê sèng-tiān; ū Siōng-tè ê sian-ti kap in chòe-hé, pang-chān in.

3Siâng hit-sî, Hô-se-séng ê chóng-tok Ta̍t-nái, kap Sī-tha Pho-su-nái, í-ki̍p in ê tông-sū, lâi mn̄g kóng, “Siáⁿ-lâng hā-lēng hō͘ lín khí chit-keng tiān, oân-sêng chit-ê kang-thêng?”

4In koh thó khí-chō sèng-tiān ê lâng ê miâ-toaⁿ.

5M̄-kú Siōng-tè khòaⁿ-kò͘ Iû-tāi ê tiúⁿ-ló, hō͘ in bián siū chó͘-tòng thêng-kang. Hiah-ê koaⁿ-oân chiong chit-ê tāi-chì siōng-chàu Tāi-liû-sū, thèng-hāu i ê hôe-ho̍k.

6 Hô-se-séng ê chóng-tok Ta̍t-nái, kap Sī-tha Pho-su-nái, í-ki̍p i ê tông-sū, chiū-sī Hô-se-séng ê koaⁿ-oân, siōng-chàu Tāi-liû-sū-ông ê phoe kì tī ē-bīn:

7Goān hông-tè Tāi-liû-sū bān-sū sūn-lī.

8Goān hông-siōng cha-bêng. Goán khì Iû-tāi-séng, hoat-kiàn úi-tāi Siōng-tè ê sèng-tiān tú-teh tiông-kiàn. Chit-ê tiān ēng tōa tè chio̍h khí-chō, niû chhah-ji̍p chhiûⁿ-lāi, kang-thêng chìn-hêng chin-kín koh sūn-lī.

9Hit-sî, goán mn̄g hiah-ê tiúⁿ-ló, “Siáⁿ-lâng hā-lēng hō͘ lín khí chit-keng tiān, oân-sêng chit-ê kang-thêng?”

10Koh mn̄g in ê siú-léng ê miâ, thang siōng-chàu hō͘ hông-siōng chai.

11In án-ni ìn goán kóng, “Goán sī thiⁿ tōe ê Chú-cháiⁿ Siōng-tè ê po̍k-jîn. Goán hiān-chāi teh tiông-kiàn ê sèng-tiān, sī chin chōe nî chêng Í-sek-lia̍t chi̍t ūi úi-tāi ê ông khí-chō--ê.

12M̄-kú goán ê lia̍t-chó͘ jiá thiⁿ-téng ê Siōng-tè siū-khì, I chiong in kau tī Ka-le̍k-tí-lâng Pa-pí-lûn-ông Nî-pò͘-kah-nî-sat ê chhiú; ông chiū thiah-húi chit-keng tiān, lia̍h jîn-bîn khì Pa-pí-lûn.

13Sài-ló͘-sū chòe Pa-pí-lûn hông-tè tē-it nî, hā-lēng tiông-kiàn chit-keng Siōng-tè ê tiān.

14Í-chêng Nî-pò͘-kah-nî-sat tùi Iâ-lō͘-sat-léng Siōng-tè ê sèng-tiān chhiúⁿ-khì hē tī Pa-pí-lûn sîn-biō ê kim gûn khì-khū, Sài-ló͘-sū-ông chiong hiah-ê the̍h--chhut-lâi, kau hō͘ i só͘ siat-li̍p ê Iû-tāi séng-tiúⁿ Siat-pa-sat,

15tùi i kóng, ‘Tio̍h tòa chiah-ê khì-khū khì hē tī Iâ-lō͘-sat-léng ê tiān, mā tio̍h tī goân-ūi khí Siōng-tè ê tiān.’

16Tùi án-ni, Siat-pa-sat chiū lâi hē Iâ-lō͘-sat-léng Siōng-tè sèng-tiān ê tōe-ki; chit-keng tiān tiông-kiàn ê kang-thêng tùi hit-sî kàu hiān-chāi iáu-bē oân-sêng.

17“Taⁿ, hông-siōng nā khòaⁿ-chòe thò-tòng, chhiáⁿ cha-bêng Pa-pí-lûn ê hông-ka kì-lio̍k, khòaⁿ Sài-ló͘-sū-ông ū hā-lēng tī Iâ-lō͘-sat-léng tiông-kiàn Siōng-tè ê sèng-tiān á bô. Koan-hē chit-ê sū, chhiáⁿ hông-siōng chhâi-koat, kàng-chí chí-sī goán.”

Í-su-la-kì 5 - 現代台語譯本羅馬字版(TTVR)-闽南语

Learn More About Us