Í-se-kiat-su 13

Í-se-kiat-su 13 - 現代台語譯本羅馬字版(TTVR)-闽南语

Chek-pī Ké Sian-ti

1Siōng Chú tùi góa kóng,

2“Jîn-chú, lí tio̍h chek-pī Í-sek-lia̍t hiah-ê chiàu ka-kī ê ì-sù kóng ū-giân ê sian-ti, kā in kóng, ‘Tio̍h thiaⁿ Siōng Chú ê ōe.’”

3Chì-koân ê Siōng Chú án-ni kóng, “Gû-gōng ê sian-ti chhám ah! In bô khòaⁿ-kìⁿ sím-mi̍h īⁿ-siōng, kan-ta chiàu ka-kī ê ì-sù phian-chō ū-giân.

4Í-sek-lia̍t-lâng ah, lín ê sian-ti kap tòa tī hong-hòe ê só͘-chāi ê hô͘-lî siâng-khoán.

5Siâⁿ-chhiûⁿ ê phòa-khiah, in bô khì pó͘, bô siu-kiàn, tì-kàu tī Siōng Chú ê ji̍t, tú-tio̍h chiàn-cheng ê sî, Í-sek-lia̍t bô hoat-tō͘ khiā-chāi.

6In ê īⁿ-siōng sī ké--ê; in ê ū-giân sī pe̍h-chha̍t. In kóng ‘Che sī Siōng Chú kóng--ê’, kî-si̍t, góa Siōng Chú bô chhe-phài in; in kèng-jiân teh kî-thāi hiah-ê ōe si̍t-hiān.

7Góa kā in kóng, ‘Lín khòaⁿ--kìⁿ ê īⁿ-siōng kiám m̄-sī ké--ê? Lín kóng ê ū-giân kiám m̄-sī pe̍h-chha̍t? Lín kèng-jiân kóng che sī Siōng Chú kóng--ê, kî-si̍t, góa bô kā lín kóng sím-mi̍h!’”

8Só͘-í, Chì-koân ê Siōng Chú án-ni kóng, “In-ūi lín ê ū-giân sī hu-ké, lín ê īⁿ-siōng sī hoàn-sióng, góa beh kap lín choh-tùi.

9Góa beh chhun-chhiú kong-kek hiah-ê phian-chō hu-ké ê īⁿ-siōng, kap kóng pe̍h-chha̍t ê ū-giân ê sian-ti. In bōe-ēng-tit chham-ka góa chú-bîn ê chū-hōe, bōe-ēng-tit teng-kì tī Í-sek-lia̍t-ke ê miâ-chheh, mā bōe-ēng-tit tńg-khì Í-sek-lia̍t-tōe. Án-ni, lín chiū chai góa sī Chì-koân ê Siōng Chú.

10“In kā góa ê chú-bîn chhōa bê-lō͘, tī bô pêng-an ê sî kóng ‘Pêng-an’, chhin-chhiūⁿ khí chhiûⁿ-piah ê sî, in kā piah boah pe̍h-he.

11Lí tio̍h kā hiah-ê boah pe̍h-he ê lâng kóng, ‘Ōe ū kông-hong-pō-ú kap tōa peng-pha̍uh kā chhiûⁿ phah-tó.’

12Chhiûⁿ tó-hoāi liáu-āu, lâng beh mn̄g, ‘Lín án-ni boah ū siáⁿ lō͘-ēng?’”

13Só͘-í, Chì-koân ê Siōng Chú án-ni kóng, “Góa beh hoat tōa siū-khì, ēng kông-hong-pō-ú kap tōa peng-pha̍uh phah-tó chit-ê chhiûⁿ.

14Góa beh thiah-húi lín boah pe̍h-he ê chhiûⁿ, thiah kah pîⁿ-pîⁿ-pîⁿ, lō͘-chhut tōe-ki; chhiûⁿ beh tó-hoāi, lín beh sí tī siâⁿ-lāi. Án-ni, lín chiū chai góa sī Siōng Chú.

15“Góa beh tùi chhiûⁿ kap kā chhiûⁿ boah pe̍h-he ê lâng hoat tōa siū-khì. Góa beh kā in kóng, ‘Chhiûⁿ kap boah pe̍h-he ê lâng lóng o͘-iú--khì ah.

16Hiah-ê tī bô pêng-an ê sî, kā Iâ-lō͘-sat-léng pó-chèng pêng-an ê sian-ti lóng bô--khì lah.’” Chì-koân ê Siōng Chú án-ni soan-kò.

Chek-pī Ké ê Lú-sian-ti

17Siōng Chú kóng, “Jîn-chú, lí tio̍h tng-bīn chek-pī hiah-ê chiàu ka-kī ê ì-sù kóng ū-giân ê cha-bó͘-lâng,

18kā in kóng, Chì-koân ê Siōng Chú án-ni kóng, ‘Lín chiah-ê cha-bó͘-lâng chhám ah! Lín kā lâng ê chhiú-kut pa̍k hû-á-tòa, hō͘ in tì phek-siâ ê thâu-kun, siūⁿ-beh khòng-chè lâng ê sìⁿ-miā. Kiám kóng lín siūⁿ-beh khòng-chè góa chú-bîn ê siⁿ-sí lâi kiû ka-kī ê lī-ek?

19Lín ūi-tio̍h kúi pé tōa-be̍h, kúi tè piáⁿ, tī góa chú-bîn ê bīn-chêng siat-to̍k góa. Bô eng-kai sí--ê, lín kā in thâi-sí; kai-sí--ê, lín lâu in ê sìⁿ-miā. Lín ǹg hiah-ê bô ài thiaⁿ chin-si̍t-ōe ê chú-bîn kóng pe̍h-chha̍t.

20“‘Só͘-í, Chì-koân ê Siōng Chú án-ni kóng, lín tio̍h chai, góa thòng-hūn lín ēng lâi chho-chhiòng lâng sìⁿ-miā ê hû-á-tòa. Góa beh pak lín chhiú-kut téng-bīn ê hû-á-tòa, kái-kiù hō͘ lín khòng-chè ê lâng, tháu-pàng hiah-ê chhin-chhiūⁿ chiáu-á hō͘ lín lia̍h--khì ê lâng.

21Góa beh thiah-li̍h lín phek-siâ ê thâu-kun, kái-kiù góa ê chú-bîn, hō͘ in bô koh siū lín khòng-chè. Án-ni, lín chiū chai góa sī Siōng Chú.

22“‘Góa m̄-bat hō͘ gī-lâng siong-sim, m̄-kú lín kóng pe̍h-chha̍t hō͘ in ê sim kan-khó͘. Lín kó͘-lē siâ-ok ê lâng, bô hō͘ in hóe-kái lī-khui pháiⁿ-lō͘ lâi pó-choân in ê sìⁿ-miā.

23Só͘-í, lín bōe koh khòaⁿ hu-ké ê īⁿ-siōng, bōe koh kóng pe̍h-chha̍t ê ū-giân. Góa beh kái-kiù góa ê chú-bîn thoat-lī lín ê chhiú. Án-ni, lín chiū chai góa sī Siōng Chú.’”

Í-se-kiat-su 13 - 現代台語譯本羅馬字版(TTVR)-闽南语

Learn More About Us