Tān-í-lí-su 7

Tān-í-lí-su 7 - 現代台語譯本羅馬字版(TTVR)-闽南语

Tān-í-lí Khòaⁿ-kìⁿ Īⁿ-siōng(7.1-12.13)Sì Chiah Chin Tōa-chiah ê Iá-siù

1 Pa-pí-lûn-ông Pek-sa-sat tē-it nî, Tān-í-lí teh khùn ê sî bāng-tio̍h chi̍t ê bāng, thâu-khak lāi-bīn chhut-hiān chi̍t ê īⁿ-siōng. I chiū kā bāng ê lōe-iông siá--khí-lâi.

2Tān-í-lí siá kóng:

Góa tī mî--sî khòaⁿ-tio̍h chi̍t ê īⁿ-siōng: Thiⁿ ê sì-bīn hut-jiân khí tōa-hong, jiáu-tōng tōa-hái.

3Ū sì chiah hêng-chōng lóng bô kâng-khoán ê tōa-chiah iá-siù tùi hái--ni̍h khí--lâi.

4Thâu chi̍t chiah chhin-chhiūⁿ sai, ū eng-chiáu ê si̍t. Góa tú-teh khòaⁿ ê sî, i ê si̍t hō͘ lâng pu̍ih--khí-lâi, m̄-kú ū lâng kā i tùi thô͘-kha hû--khí-lâi, hō͘ i chhin-chhiūⁿ lâng nn̄g ki kha khiā--teh, koh hō͘ i ū lâng ê thâu-náu.

5Góa koh khòaⁿ-tio̍h tē-jī chiah siù, chhin-chhiūⁿ hîm, pòaⁿ-khû pòaⁿ-khiā, chhùi-khí kā saⁿ ki pín-á-kut, ū lâng tōa-siaⁿ kā i kóng, “Khí--lâi, bah chhut-chāi lí chia̍h.”

6Góa koh khòaⁿ-tio̍h chi̍t chiah siù, chhin-chhiūⁿ pà, ka-chiah-phiaⁿ ū sì ki chiáu-á ê si̍t. I ū sì ê thâu, koh ū koân-pèng.

7Góa tī mî--sî ê īⁿ-siōng tiong iáu-teh khòaⁿ ê sî, tē-sì chiah siù chhut-hiān; i khòaⁿ--khí-lâi chin khó-phàⁿ, chin khióng-pò͘, koh chin hiong-béng. I ū tōa-ki thih ê chhùi-khí, ōe thun-chia̍h thiah-chhùi; chia̍h bô liáu--ê, chiū ēng kha thún-ta̍h. I kap thâu-chêng hit kúi chiah iá-siù bô kâng-khoán, ū cha̍p ki kak.

8Góa teh koan-chhat hiah-ê kak ê sî, hut-jiân tùi hit tiong-kan hoat chi̍t ki sòe-ki kak; chit-ki sòe-ki kak kā hit cha̍p ki tiong-kan ê saⁿ ki, liân kun to pu̍ih--khí-lâi. Chit-ki sòe-ki kak ū chhin-chhiūⁿ lâng ê ba̍k-chiu, ū kóng tōa-siaⁿ-ōe ê chhùi.

Éng-oán Chûn-chāi Hit-ūi

9Góa tú-teh chù-ì khòaⁿ hit-ê īⁿ-siōng ê sî, khòaⁿ-kìⁿ ū pâi hó-sè ê pó-chō, tùi bān-kó͘ í-chêng chiū chûn-chāi Hit-ūi chē tī hia; I ê saⁿ chhin-chhiūⁿ seh hiah pe̍h, thâu-mn̂g chheng-pe̍h chhin-chhiūⁿ iûⁿ-mn̂g. I ê pó-chō sī hé-iām, pó-chō ê lián-á sī iām-jia̍t ê hé.

10Ū hé chhin-chhiūⁿ hô-liû tùi pó-chō lâu--chhut-lâi; ho̍k-sāi i--ê ū chheng-chheng, sū-hāu i--ê ū bān-bān. I beh khui-têng sím-phòaⁿ, àn-kiāⁿ ê chheh-kǹg í-keng phah-khui.

11In-ūi hit-ki kak teh kóng tōa-siaⁿ-ōe, góa chiū chù-ì koan-chhat, khòaⁿ-tio̍h tē-sì chiah siù hō͘ lâng thâi-sí, seng-khu húi-hoāi, hō͘ lâng hiat-lo̍h hé sio.

12Kî-tha hiah-ê siù, in ê koân-sè lóng siau-sit, m̄-kú in iáu siū ún-chún ōe-tàng oa̍h kàu só͘ tēng ê kî-hān.

13Góa koh tī àm-sî ê īⁿ-siōng tiong chù-ì khòaⁿ, khòaⁿ-tio̍h chi̍t ê chhin-chhiūⁿ jîn-chú--ê tùi thiⁿ-téng chē-hûn lo̍h--lâi, hō͘ lâng chhōa kàu tùi bān-kó͘ í-chêng chiū chûn-chāi Hit-ūi ê bīn-chêng,

14niá-siū koân-pèng, êng-iāu, kap ông-koân; ta̍k-cho̍k, ta̍k pang-kok, kap kóng ta̍k-chióng gú-giân ê jîn-bîn lóng ho̍k-sāi i. I ê koân-pèng éng-chûn, bōe siau-sit; i ê ông-koân it-tēng bōe siū húi-hoāi.

Kóe-seh Īⁿ-siōng

15Góa Tān-í-lí in-ūi khòaⁿ--tio̍h ê īⁿ-siōng sim chin iu-siong, put-an,

16chiū kiâⁿ óa-khì chi̍t ê teh sū-hāu ê lâng, mn̄g i koan-hē chiah-ê īⁿ-siōng ê ì-sù. I chiū kóe-seh hō͘ góa chai.

17I kóng, “Hit sì chiah tōa-chiah iá-siù sī teh-beh tùi sè-kài heng-khí ê sì ê ông.

18M̄-kú Chì-koân-chiá sèng ê chú-bîn beh tit-tio̍h chit-ê kok, sè-sè-tāi-tāi chiáng-lí ông-koân.”

19Góa ài-beh koh khak-si̍t chai tē-sì chiah siù ê ì-sù. I kap hit saⁿ chiah siù bô kâng-khoán; i hui-siông khó-phàⁿ, ēng thih ê chhùi-khí thun-chia̍h, ēng tâng ê jiáu thiah-chhùi, koh ēng kha thún-ta̍h chia̍h chhun--ê.

20I ê thâu ū cha̍p ki kak, āu-lâi koh hoat chi̍t ki kak; kî-tiong ê saⁿ ki kak tī chit-ki kak ê bīn-chêng lak--lo̍h-lâi; chit-ki kak ū ba̍k-chiu, chhùi kóng tōa-siaⁿ-ōe; i ê hêng-chōng pí kî-tha ê kak koh-khah khó-phàⁿ.

21Góa koh khòaⁿ-kìⁿ hit-ki kak kap sèng ê chú-bîn kau-chiàn, kā in phah-pāi.

22M̄-kú tùi bān-kó͘ í-chêng chiū chûn-chāi Hit-ūi ōe lâi kàu, thòe Chì-koân-chiá sèng ê chú-bîn sin-oan. Sèng ê chú-bîn tit-tio̍h kok-tō͘ ê sî-kan chiū kàu.

23Hit-ê teh sū-hāu ê lâng kā góa kóng, “Tē-sì chiah siù sī chí teh-beh tùi sè-kan heng-khí ê tē-sì ê kok-ka. I kap kî-tha ê kok-ka bô kâng-khoán, beh thun-chia̍h, thiah-chhùi, pèng-thun choân sè-kài.

24Hit cha̍p ki kak chiū-sī tùi i ê kok ōe ū cha̍p ê ông; āu-lâi koh heng-khí chi̍t ê kap í-chêng ê ông bô kâng-khoán ê ông, beh thui-hoan kî-tiong saⁿ ê ông.

25I kóng-ōe te̍k-tùi Chì-koân-chiá, ap-chè Chì-koân-chiá sèng ê chú-bîn; koh siūⁿ-beh kái-piàn choeh-kî kap lu̍t-hoat; sèng ê chú-bîn ōe kau tī i ê chhiú-thâu, keng-kè chi̍t ê sî-kî, koh nn̄g ê sî-kî, koh pòaⁿ-ê sî-kî.

26M̄-kú Chì-koân-chiá chi̍t-ē khai-sí sím-phòaⁿ, chit-ê ông ê chú-koân beh siū pak-toa̍t, ōe éng-oán siū húi-hoāi siau-bia̍t.

27Chì-koân-chiá ōe chiong koân-pèng, ông-koân, kap thian-hā lia̍t-kok ê thóng-tī-koân sù hō͘ I sèng ê chú-bîn. In ê kok sī éng-oán ê kok; sè-kài só͘-ū kok-ka ê thóng-tī-chiá lóng ōe ho̍k-sāi sūn-ho̍k in.”

28Chit-ê sū kàu chia ûi-chí. Góa Tān-í-lí siūⁿ-liáu chin kiaⁿ-hiâⁿ, bīn piàn-sek. Góa chiong chit-ê sū khǹg tī góa ê sim-lāi.

Tān-í-lí-su 7 - 現代台語譯本羅馬字版(TTVR)-闽南语

Learn More About Us