Má-khó Hok-im 6

Má-khó Hok-im 6 - 現代台語譯本羅馬字版(TTVR)-闽南语

Iâ-so͘ tī Ná-sat-le̍k Siū Kū-choa̍t(Thài 13.53-58; Lō͘ 4.16-30)

1Iâ-so͘ lī-khui hia, tò-khì ka-kī ê kò͘-hiong, bûn-tô͘ tè I khì.

2An-hioh-ji̍t, I tī hōe-tn̂g kà-sī lâng. Chin chōe lâng thiaⁿ-tio̍h I ê kà-sī, lóng chin tio̍h-kiaⁿ, kóng, “Chit-ê lâng ê pún-sū tùi tó-ūi lâi? I tit--tio̍h-ê tàu-tóe sī sím-mi̍h khoán ê tì-hūi? I ê chhiú ná ōe-tàng kiâⁿ chit-khoán sîn-jiah?

3I kiám m̄-sī ba̍k-chhiūⁿ? Kiám m̄-sī Má-lī-a ê kiáⁿ, Ngá-kok, Iok-se, Iû-tāi, kap Se-bûn ê hiaⁿ-tī? I ê sió-bē kiám m̄-sī kap lán tòa tī chia?” In soah tùi Iâ-so͘ khí hoán-kám.

4Iâ-so͘ kā in kóng, “Sian-ti tī ka-kī ê kò͘-hiong, ka-kī ê chhin-lâng, ka-kī ê ka-cho̍k í-gōa, it-tēng ōe siū chun-tiōng.”

5I tī hia bōe-tàng kiâⁿ sím-mi̍h sîn-jiah, chí-ū kā kúi-ê-á pīⁿ-lâng hōaⁿ-chhiú, kā in i-hó.

6Iâ-so͘ tùi in ê m̄ sìn kám-kak chin kî-koài.

Cha̍p-jī Sù-tô͘ ê Sú-bēng(Thài 10.1, 5-15; Lō͘ 9.1-6)

Iâ-so͘ kiâⁿ-thàu chiu-ûi ê chng-siā kà-sī lâng.

7I tiàu-chi̍p cha̍p-jī sù-tô͘ lâi, chhe in nn̄g-ê nn̄g-ê chhut--khì, hō͘ in ū koân-pèng thang chè-ap siâ-sîn.

8I hoan-hù in, chhut-mn̂g ê sî koáiⁿ-á í-gōa sím-mi̍h lóng m̄-thang tòa; m̄-thang tòa chia̍h-mi̍h; m̄-thang tòa lú-hêng-tē; io-tòa lāi-bīn m̄-thang tòa chîⁿ;

9chí-ū chhēng liâng-ôe; m̄-thang chhēng nn̄g niá lāi-saⁿ.

10I koh kā in kóng, “Lín bô-lūn ji̍p-khì sím-mi̍h-lâng ê chhù, tio̍h tòa hia kàu lī-khui hit só͘-chāi.

11Bô-lūn sím-mi̍h só͘-chāi, lâng nā m̄ chiap-la̍p lín, m̄ thiaⁿ lín ê kà-sī, lín lī-khui ê sî tio̍h chiong kha--ni̍h ê thô͘-hún pōaⁿ-tiāu, piáu-sī tùi in kéng-kò.”

12Sù-tô͘ chiū chhut-khì thoân-tō, khǹg lâng hóe-kái.

13In koh kóaⁿ-chhut chin chōe kúi, mā ēng iû boah chin chōe pīⁿ-lâng, kā in i-hó.

Si-sóe-chiá Iok-hān ê Sí(Thài 14.1-12; Lō͘ 9.7-9)

14 Hi-lu̍t-ông ū thiaⁿ-tio̍h Iâ-so͘ ê sū, in-ūi I ê miâ thoân-piàn ta̍k só͘-chāi. Ū lâng kóng, “I sī Si-sóe-chiá Iok-hān tùi sí-lâng tiong koh-oa̍h, só͘-í ū koân-lêng kiâⁿ chiah-ê sîn-jiah.”

15M̄-kú mā ū lâng kóng, “I sī Í-lī-a”; koh ū lâng kóng, “I sī sian-ti, chhin-chhiūⁿ kó͘-chá ê chi̍t ê sian-ti.”

16 Hi-lu̍t thiaⁿ--tio̍h chiū kóng, “Sī góa kā i chām-thâu hit-ê Iok-hān, i ū koh-oa̍h.”

17Hi-lu̍t ū phài lâng khì lia̍h Iok-hān, kā i liān tī kaⁿ--ni̍h, goân-in sī Hi-lu̍t ū chhōa sió-tī Hui-le̍k ê bó͘ Hi-lô-tí chòe bó͘;

18in-ūi Iok-hān tiāⁿ-tiāⁿ tùi Hi-lu̍t kóng, “Lí chhōa sió-tī ê bó͘ bô ha̍p-hoat!”

19 Hi-lô-tí sim-lāi tùi Iok-hān khioh-hūn, siūⁿ-beh kā i thâi, m̄-kú bōe-tàng chiàu sim-goān,

20in-ūi Hi-lu̍t kiaⁿ Iok-hān, chai-iáⁿ i sī chèng-gī koh sèng-kiat ê lâng, ū kā i pó-hō͘. Hi-lu̍t ta̍k-piàn thiaⁿ Iok-hān ê ōe, hui-siông put-an, iáu-kú chin ài thiaⁿ.

21 Hi-lô-tí ê ki-hōe lâi lah. Hi-lu̍t choh-siⁿ-ji̍t ê sî, pān iàn-se̍k chhiáⁿ bûn-bú-pah-koaⁿ kap Ka-lī-lī bîn-kan ê léng-siù.

22Hi-lô-tí ê cha-bó͘-kiáⁿ ji̍p-lâi thiàu-bú, hō͘ Hi-lu̍t kap chāi-chō ê kùi-pin hoaⁿ-hí. Ông kā hit-ê cha-bó͘ gín-á kóng, “Khòaⁿ lí ài sím-mi̍h, chòe lí kiû, góa lóng beh hō͘ lí.”

23Hi-lu̍t koh tùi i soan-sè kóng, “Lí bô-lūn kiû sím-mi̍h, liân góa ông-kok ê chi̍t-pòaⁿ mā ōe hō͘ lí.”

24Cha-bó͘ gín-á chhut-khì mn̄g i ê lāu-bú, “Góa tio̍h kiû sím-mi̍h?” I ê lāu-bú kā i kóng, “Si-sóe-chiá Iok-hān ê thâu.”

25I sûi-sî kóaⁿ tò-tńg--lâi, tùi ông iau-kiû kóng, “Chhiáⁿ lí sûi-sî chiong Si-sóe-chiá Iok-hān ê thâu-khak khǹg tī pôaⁿ--ni̍h hō͘ góa.”

26Ông ê sim hui-siông kan-khó͘, put-kò in-ūi í-keng tī kùi-pin ê bīn-chêng chiù-chōa, chiū bô kā i kū-choa̍t.

27Ông sûi-sî chhe chi̍t ê kéng-ōe khì the̍h Iok-hān ê thâu. Kéng-ōe chiū khì kaⁿ--ni̍h chām Iok-hān ê thâu,

28chiong thâu-khak hē tī pôaⁿ--ni̍h phâng-lâi hō͘ cha-bó͘ gín-á, cha-bó͘ gín-á chiū hō͘ i ê lāu-bú.

29Iok-hān ê bûn-tô͘ thiaⁿ--tio̍h chiū lâi siu i ê sin-si, kā i bâi-chòng tī bōng--ni̍h.

Iâ-so͘ Hō͘ Gō͘-chheng Lâng Chia̍h Pá(Thài 14.13-21; Lō͘ 9.10-17; Iok 6.1-15)

30Sù-tô͘ tńg-lâi Iâ-so͘ hia, chiong in só͘ chòe só͘ kà-sī--ê lóng kā I pò-kò.

31Iâ-so͘ kā in kóng, “Án-ni, lín mā tio̍h ka-kī khì phian-phiah bô lâng tòa ê só͘-chāi sió-khóa hioh-khùn chi̍t-ē.” In-ūi chhut-chhut-ji̍p-ji̍p ê lâng chin chōe, in liân chia̍h-pn̄g ê sî-kan to bô.

32In chiū chē-chûn kan-ta in ka-kī khì phian-phiah bô lâng tòa ê só͘-chāi.

33Chin chōe lâng khòaⁿ-tio̍h in lī-khui, jīn-chhut sī in, chiū tùi ta̍k-ê siâⁿ-chhī sūn lio̍k-lō͘ cháu chìn-chêng, pí in tāi-seng kàu hit só͘-chāi.

34Iâ-so͘ chiūⁿ-hōaⁿ, khòaⁿ-tio̍h chi̍t tōa-tīn lâng chiū khó-lîn in, in-ūi in chhin-chhiūⁿ bô bo̍k-chiá ê iûⁿ. I chiū kà-sī in chin chōe hāng sū.

35Sî-kan í-keng chin òaⁿ, bûn-tô͘ óa-lâi kā I kóng, “Chit-ê só͘-chāi chin phian-phiah, sî-kan mā chin òaⁿ lah.

36Chhiáⁿ kā in kái-sàn, hō͘ in khì hù-kūn ê hiong-chhoan chng-siā ka-kī bóe mi̍h-kiāⁿ chia̍h.”

37Iâ-so͘ ìn kóng, “Lín hō͘ in chia̍h.”

Bûn-tô͘ mn̄g kóng, “Goán tio̍h khì bóe nn̄g-pah ê gûn-á ê piáⁿ hō͘ in chia̍h o͘h?”

38Iâ-so͘ kóng, “Lín ū jōa-chōe piáⁿ, khì khòaⁿ-bāi leh!” In khòaⁿ-liáu chiū kóng, “Ū gō͘ ê; mā ū nn̄g bé hî.”

39Iâ-so͘ hoan-hù bûn-tô͘ kā chèng-lâng hun-cho͘, hō͘ in chē tī chhiⁿ-chhùi ê chháu-po͘.

40Chèng-lâng chiū chi̍t-cho͘ chi̍t-cho͘ chē--lo̍h-khì, ū ê chi̍t-pah ê, ū ê gō͘-cha̍p ê.

41Āu-lâi Iâ-so͘ the̍h hit gō͘ ê piáⁿ kap nn̄g bé hî, ǹg thiⁿ kám-siā, peh-khui, the̍h hō͘ bûn-tô͘ khì pun hō͘ chèng-lâng. I koh chiong hit nn̄g bé hî pun hō͘ chèng-lâng.

42Tāi-ke lóng chia̍h, chia̍h kàu pá.

43Bûn-tô͘ khioh chia̍h chhun ê piáⁿ-iù-á kap hî-sut-á, móa cha̍p-jī nâ.

44Chia̍h-piáⁿ--ê, kan-ta ta-po͘-lâng chiū ū gō͘-chheng.

Iâ-so͘ tī Ô͘ ê Téng-bīn Kiâⁿ(Thài 14.22-33; Iok 6.16-21)

45Iâ-so͘ sûi-sî pek I ê bûn-tô͘ chiūⁿ-chûn seng kè-khì tùi-bīn hōaⁿ, khì Pek-sài-tāi, ka-kī lâu teh kái-sàn kûn-chiòng.

46Iâ-so͘ lī-khui kûn-chiòng liáu-āu chiū chiūⁿ-soaⁿ kî-tó.

47Thiⁿ àm ê sî, chûn kiâⁿ kàu ô͘ ê tiong-ng; Iâ-so͘ ka-kī chi̍t ê tī hōaⁿ-téng.

48I khòaⁿ-tio̍h bûn-tô͘ chìⁿ-hong teh kò-chiúⁿ, kò kah chin kan-khó͘. Thiⁿ beh kng ê sî, Iâ-so͘ tī ô͘ ê téng-bīn ǹg in hia kiâⁿ--khì, siūⁿ-beh tùi piⁿ--á kè--khì.

49Bûn-tô͘ khòaⁿ-tio̍h I tī ô͘ ê téng-bīn teh kiâⁿ, siūⁿ-kóng sī kúi, chiū tōa-siaⁿ hoah,

50in-ūi tāi-ke lóng ū khòaⁿ-tio̍h I, chin kiaⁿ.

Iâ-so͘ sûi-sî kā in kóng, “An-sim, sī góa, bián kiaⁿ!”

51Iâ-so͘ chiūⁿ-chûn khì kap in chòe-hé, hong chiū tiām--khì. Bûn-tô͘ hui-siông tio̍h-kiaⁿ,

52in-ūi in bô bêng-pe̍k hit-ê piáⁿ ê ì-gī, sim iáu chin tūn.

Iâ-so͘ tī Kek-nî-sat-le̍k I-hó Pīⁿ-lâng(Thài 14.34-36)

53Iâ-so͘ kap bûn-tô͘ kè ô͘ liáu-āu tī Kek-nî-sat-le̍k chiūⁿ-hōaⁿ, kā chûn pha tī hōaⁿ-piⁿ.

54In chi̍t-ē lo̍h-chûn, chèng-lâng sûi-sî jīn-chhut Iâ-so͘,

55chiū sì-kòe kiâⁿ-thàu-thàu, thiaⁿ-tio̍h Iâ-so͘ tī tó-ūi chiū ēng chhn̂g-pho͘ kng pīⁿ-lâng khì hia.

56Iâ-so͘ bô-lūn kiâⁿ kàu sím-mi̍h chng-siā, siâⁿ-chhī, hiong-chhoan, lâng chiū kā pīⁿ-lâng kng-lâi khǹg tī chhī-tiûⁿ-kháu, khún-kiû Iâ-so͘ siōng-bô mā hō͘ pīⁿ-lâng bong-tio̍h I saⁿ-á-ku ê chhiu; só͘-ū bong--tio̍h ê lâng lóng tit-tio̍h i-hó.

Má-khó Hok-im 6 - 現代台語譯本羅馬字版(TTVR)-闽南语

Learn More About Us