Í-se-kiat-su 25

Í-se-kiat-su 25 - 現代台語譯本羅馬字版(TTVR)-闽南语

Ū-giân A-bûn Siū Hêng-hoa̍t

1Siōng Chú tùi góa kóng,

2“Jîn-chú ah, lí tio̍h tùi A-bûn-lâng kóng ū-giân kong-kek in,

3kā in kóng, ‘Tio̍h thiaⁿ Siōng Chú ê ōe! Chì-koân ê Siōng Chú án-ni kóng: Góa ê sèng-tiān siū siat-to̍k, Í-sek-lia̍t ê thó͘-tōe pha-hng, Iû-tāi-lâng siū hòng-tio̍k ê sî, lín kèng-jiân kóng: Ha ha, Í-sek-lia̍t-lâng mā ū chit chi̍t ji̍t o͘h!

4Só͘-í, góa beh hō͘ tang-hng lâi ê bîn-cho̍k cheng-ho̍k lín, chiàm lín ê thó͘-tōe chòe in ê sán-gia̍p. In beh tī lín ê thó͘-tōe chat-iâⁿ, tēng-ku, chia̍h lín chhân-hn̂g ê chhut-sán, lim lín iûⁿ-kûn ê lin.

5Góa beh hō͘ La-pa-siâⁿ pìⁿ-chòe lo̍k-tô ê bo̍k-tiûⁿ, hō͘ A-bûn-lâng ê tōe chiâⁿ-chòe iûⁿ-kûn tó-teh hioh-khùn ê só͘-chāi. Án-ni, lín chiū chai góa sī Siōng Chú.

6“‘Chì-koân ê Siōng Chú koh kóng: In-ūi lín chhiong-móa oàn-hūn, khòaⁿ Í-sek-lia̍t-tōe siū chai-lān chòe hoaⁿ-hí, chhiú phah-pho̍k-á, kha tiô-thiàu.

7Só͘-í góa beh chhun-chhiú kong-kek lín, kā lín kau hō͘ lia̍t-kok chòe hu-ló͘; góa beh tùi bān-bîn tiong kā lín châu-bia̍t, hō͘ lín tùi bān-kok tiong siau-sit. Góa beh tû-bia̍t lín, lín chiū chai góa sī Siōng Chú.’”

Khiàn-chek Mô͘-ap

8Chì-koân ê Siōng Chú kóng, “In-ūi Mô͘-ap-lâng kap Í-tong-lâng kóng, Iû-tāi-kok kap pa̍t-ê kok-ka bô sím-mi̍h bô kâng,

9só͘-í góa beh hō͘ Mô͘-ap pian-kài ê siâⁿ-tìn siū kong-kek, liân in siōng khoa-kháu ê siâⁿ-pó, Pek Iâ-se-boa̍t, Pa-le̍k Bián, kap Ki-lia̍t-têng, lóng siū kong-phòa.

10Góa mā beh chiong A-bûn-lâng kap Mô͘-ap chòe-hé kau hō͘ tang-hng lâi ê bîn-cho̍k chòe sán-gia̍p, koh hō͘ lia̍t-kok bōe-kì-tit Mô͘-ap.

11Góa it-tēng beh hêng-hoa̍t Mô͘-ap. Án-ni, in chiū chai góa sī Siōng Chú.”

Khiàn-chek Í-tong

12Chì-koân ê Siōng Chú án-ni kóng, “Í-tong-lâng in-ūi tùi Iû-tāi-lâng pò-siû, in ê pò-siû hián-lō͘ in ke̍k-tōa ê chōe,

13só͘-í, góa — Chì-koân ê Siōng Chú án-ni kóng: Góa beh hêng-hoa̍t Í-tong, kā in kap in ê cheng-siⁿ siau-bia̍t, hō͘ Í-tong tùi Thê-bān kàu Tí-tān ê thó͘-tōe lóng pha-hng, lâng siū thâi-sí.

14Góa beh ēng góa ê chú-bîn Í-sek-lia̍t ê chhiú tùi Í-tong pò-ho̍k; in beh chiàu góa ke̍k-tōa ê siū-khì pò-ho̍k Í-tong. Hit-sî, Í-tong-lâng chiū chai che sī góa teh ǹg in pò-ho̍k.” Chì-koân ê Siōng Chú án-ni soan-kò.

Khiàn-chek Hui-lī-sū

15Chì-koân ê Siōng Chú án-ni kóng, “Hui-lī-sū-lâng ǹg Iû-tāi-lâng pò in kó͘-chá chiū kiat ê oan-siû, sim chûn ok-ì beh siau-bia̍t Iû-tāi-lâng.

16Só͘-í, góa — Chì-koân ê Siōng Chú án-ni soan-kò: Góa beh chhun-chhiú kong-kek Hui-lī-sū-lâng, châu-bia̍t Ki-lī-thê-lâng, liân tòa tī iân-hái pêng-goân chhun ê lâng mā beh siau-bia̍t.

17Góa beh giâm-giâm kā in pò-ho̍k, hoat tōa siū-khì hêng-hoa̍t in. Góa kā in pò-ho̍k ê sî, in chiū chai góa sī Siōng Chú.”

Í-se-kiat-su 25 - 現代台語譯本羅馬字版(TTVR)-闽南语

Learn More About Us