Lia̍t-ông-kì Siōng-koàn 17

Lia̍t-ông-kì Siōng-koàn 17 - 現代台語譯本羅馬字版(TTVR)-闽南语

Í-lī-a Ū-giân Khòng-hān

1Tòa tī Ki-lia̍t ê Thê-su-pí-lâng Í-lī-a tùi A-hap kóng, “Góa kí góa só͘ ho̍k-sāi éng-oa̍h Siōng Chú — Í-sek-lia̍t ê Siōng-tè chiù-chōa, ‘Chit kúi nî, góa nā bô kî-kiû, chiū bô lō͘-chúi, mā bōe lo̍h-hō͘.’”

2Siōng Chú ê ōe lîm-kàu Í-lī-a kóng,

3“Lí tio̍h lī-khui chia, oat tùi tang-pêng khì, bih tiàm Iok-tàn-hô ê tang-sì Ki-li̍p khoe-piⁿ.

4Lí beh lim hit-tiâu khoe ê chúi; góa í-keng bēng-lēng o͘-a tī hia kiong-kip lí.”

5I chiū chiàu Siōng Chú ê ōe, khì tiàm tī Iok-tàn tang-sì ê Ki-li̍p-khoe.

6Ta̍k-ji̍t ê chá-khí-sî kap ji̍t lo̍h ê sî, o͘-a lóng tòa piáⁿ kap bah lâi hō͘ i; i lim khoe--ni̍h ê chúi.

7Āu-lâi khoe-chúi ta, in-ūi hit-ê tōe-hng bô lo̍h-hō͘.

Í-lī-a kap Sat-le̍k-hoat ê Kóaⁿ-hū

8Siōng Chú ê ōe lîm-kàu Í-lī-a, kóng,

9“Khí--lâi, khì Se-tùn ê Sat-le̍k-hoat, tòa tiàm hia. Góa í-keng bēng-lēng hit só͘-chāi chi̍t ê kóaⁿ-hū kiong-kip lí.”

10I chiū khí--lâi, khì Sat-le̍k-hoat; kàu siâⁿ-mn̂g ê sî, tú-hó ū chi̍t ê kóaⁿ-hū tī hia teh khioh-chhâ. Í-lī-a chiū kiò i, kóng, “Chhiáⁿ ēng khì-khū iúⁿ tām-po̍h chúi hō͘ góa lim.”

11I khì iúⁿ-chúi ê sî, Í-lī-a koh kiò i kóng, “Chhiáⁿ sūn-chhiú the̍h tām-po̍h piáⁿ lâi hō͘ góa.”

12Hū-jîn-lâng kóng, “Góa kí éng-oa̍h ê Siōng Chú — lí ê Siōng-tè chiù-chōa, góa liân chi̍t tè piáⁿ to bô, tháng-á lāi chí-ū chi̍t-pé-á mī-hún, pân-lāi mā chí-ū chi̍t-sut-á iû. Lí khòaⁿ, góa khioh chit nn̄g ki chhâ, beh tò-khì ūi-tio̍h góa kap góa ê kiáⁿ chòe piáⁿ; goán chia̍h-liáu chiū beh tán sí.”

13 Í-lī-a kā i kóng, “Bián kiaⁿ! Lí khì, chiàu lí só͘ kóng--ê khì chòe; m̄-kú tāi-seng chòe chi̍t tè sòe-tè piáⁿ hō͘ góa, jiân-āu ūi-tio̍h lí kap lí ê kiáⁿ chòe piáⁿ.

14In-ūi Siōng Chú — Í-sek-lia̍t ê Siōng-tè án-ni kóng, ‘Tháng-lāi ê mī-hún bōe kiám-chió, pân-lāi ê iû ēng bōe liáu, ti̍t-kàu Siōng Chú lo̍h-hō͘ hit-ji̍t.’”

15Hū-jîn-lâng chiū chiàu Í-lī-a ê ōe chòe. Í-lī-a, hū-jîn-lâng, í-ki̍p i chhù-lāi ê lâng chia̍h chin chōe ji̍t,

16tú chiàu Siōng Chú thong-kè Í-lī-a só͘ kóng--ê, tháng-lāi ê mī-hún bô liáu, pân-lāi ê iû bô kiám.

17Chiah-ê tāi-chì liáu-āu, hit-ke ê lú-chú-lâng ê kiáⁿ phòa-pīⁿ, pīⁿ kah chin siong-tiōng, soah tn̄g-khùi.

18Hū-jîn-lâng kā Í-lī-a kóng, “Siōng-tè tiōng-iōng ê lâng ah, góa kap lí ū sím-mi̍h koan-hē? Lí lâi góa chia soah hō͘ Siōng-tè siūⁿ-khí góa ê chōe, hāi góa ê kiáⁿ sí.”

19 Í-lī-a kā i kóng, “Chiong lí ê kiáⁿ kau hō͘ góa.” Í-lī-a tùi hū-jîn-lâng ê heng-chêng kā gín-á phō--khì, tòa-khì lâu-téng i ê pâng-keng, hē tī i ka-kī ê bîn-chhn̂g.

20I kiû-kiò Siōng Chú kóng, “Siōng Chú — góa ê Siōng-tè ah, góa tòa tī chit-ê kóaⁿ-hū ê chhù, lí ná beh kàng chai-hō hō͘ i, hāi-sí i ê kiáⁿ?”

21Í-lī-a chiū phak tī gín-á ê seng-khu saⁿ piàn, kî-kiû Siōng Chú kóng, “Siōng Chú — góa ê Siōng-tè ah, kiû lí hō͘ chit-ê gín-á hôe-hûn.”

22Siōng Chú thiaⁿ Í-lī-a ê kî-tó, hō͘ gín-á hôe-hûn, koh oa̍h--khí-lâi.

23 Í-lī-a chiū phō hit-ê gín-á tùi lâu-téng lo̍h--lâi, ji̍p-khì chhù-lāi kau hō͘ gín-á ê lāu-bú. Í-lī-a kóng, “Lí khòaⁿ, lí ê kiáⁿ oa̍h lah.”

24Hū-jîn-lâng tùi Í-lī-a kóng, “Taⁿ góa chai lí sī Siōng-tè tiōng-iōng ê lâng, Siōng Chú thong-kè lí só͘ kóng ê ōe lóng sī chin-si̍t.”

Lia̍t-ông-kì Siōng-koàn 17 - 現代台語譯本羅馬字版(TTVR)-闽南语

Learn More About Us