Ai-ko 5

Ai-ko 5 - 現代台語譯本羅馬字版(TTVR)-闽南语

Ai-kiû Lîn-bín

1Siōng Chú ah, kiû lí ōe-kì-tit goán ê cho-gū,

àⁿ-lo̍h khòaⁿ goán só͘ siū ê lêng-jio̍k.

2Goán ê sán-gia̍p lo̍h tī siⁿ-hūn-lâng ê chhiú-tiong;

goán ê chhù-the̍h hō͘ gōa-cho̍k-lâng the̍h--khì.

3Goán chiâⁿ-chòe bô pē ê ko͘-jî;

goán ê lāu-bú chhin-chhiūⁿ kóaⁿ-hū.

4Goán liân lim ka-kī ê chúi mā tio̍h hù-chîⁿ,

liân ka-kī beh hiâⁿ ê chhâ mā tio̍h bóe.

5Goán chhin-chhiūⁿ ām-kún kòa taⁿ ê gû hō͘ lâng kóaⁿ,

lô-lo̍k ià-siān, bô thang hioh-khùn.

6Goán tio̍h ǹg Ai-ki̍p kap A-su̍t tâu-hâng,

chiah chia̍h ōe pá.

7Goán ê chó͘-sian hoān-chōe; taⁿ in mā í-keng bô tī--teh lah,

m̄-kú goán soah in-ūi in ê chōe siū-khó͘.

8Chòe lô͘-châi ê lâng koán-hat goán,

mā bô lâng kiù goán thoat-lī in ê chhiú.

9Khòng-iá ū kiông-tō,

goán tio̍h mō͘ sìⁿ-miā ê gûi-hiám chhē-chia̍h.

10Goán in-ūi iau-gō hoat-jia̍t,

phê-hu o͘ chhin-chhiūⁿ hé-lô͘.

11Hū-jîn-lâng tī Sek-an siū kiông-pō,

siàu-lú tī Iû-tāi ê siâⁿ-tìn siū lêng-jio̍k.

12Goán ê léng-siù hō͘ lâng tiàu--khí-lâi;

lāu-lâng bô siū chun-tiōng.

13Siàu-liân-lâng siū-pek oe chio̍h-bō;

gín-á in-ūi phāiⁿ chhâ poa̍h-tó.

14Lāu-lâng bô koh tī siâⁿ-mn̂g-kháu chū-chi̍p;

siàu-liân-lâng bô koh tôaⁿ-khîm chok-ga̍k.

15Goán ê sim bô koh ū hí-lo̍k;

thiàu-bú pìⁿ-chòe ai-khàu.

16Goán ê ông-koan tùi thâu-khak lak--lo̍h-lâi;

goán hoān-chōe, goán ū chai-hō lah.

17Goán in-ūi chiah-ê sū sim-hoân-ì-loān;

ba̍k-sái hō͘ goán ê ba̍k-chiu bông-bū.

18 Sek-an-soaⁿ í-keng pha-hng,

chhâi-lông tī hia lōa-lōa-sô.

19Siōng Chú, lí éng-oán chûn-chāi;

lí ê thóng-tī ti̍t-kàu bān sè-tāi.

20Lí sī-án-chóaⁿ it-ti̍t bōe-kì-tit goán?

Lí sī-án-chóaⁿ tn̂g-kî khì-sak goán?

21Siōng Chú ah, kiû lí hō͘ goán hôe-sim-tńg-ì,

hō͘ goán oa̍t-thâu kui-ǹg lí.

Kiû lí ōaⁿ-sin goán ê sìⁿ-miā, chhin-chhiūⁿ chá-sî ê ji̍t-chí!

22Lí ná thang éng-oán siū-khì goán?

Lí ná thang éng-oán khì-sak goán?

Ai-ko 5 - 現代台語譯本羅馬字版(TTVR)-闽南语

Learn More About Us