Iok-su-a-kì 10

Iok-su-a-kì 10 - 現代台語譯本羅馬字版(TTVR)-闽南语

Phah-pāi A-mô͘-lī-lâng

1 Iâ-lō͘-sat-léng-ông A-to-nî Sé-tek thiaⁿ-tio̍h Iok-su-a kong-chhú Ai-siâⁿ, thâi-sí Ai-siâⁿ ê ông, kā in oân-choân châu-bia̍t, chhin-chhiūⁿ í-chêng tùi-thāi Iâ-lī-ko kap i ê ông siâng-khoán; koh thiaⁿ-tio̍h Ki-piàn ê chū-bîn kap Í-sek-lia̍t-lâng tēng hô-pêng tiâu-iok, kap in khiā-khí,

2chiū chin kiaⁿ; in-ūi Ki-piàn pí Ai-siâⁿ khah tōa, chhin-chhiūⁿ chi̍t ê kiaⁿ-siâⁿ, koh siâⁿ-lāi ê lâng lóng gâu sio-thâi.

3Iâ-lō͘-sat-léng-ông A-to-nî Sé-tek chiū phài lâng khì kìⁿ Hi-pek-lûn-ông Hô-hâm, Iâ-boa̍t-ông Pí-lân, La-kiat-ông Ngá-hui-a, kap I-ki-lûn-ông Tí-phek, kóng,

4“Chhiáⁿ lín lâi oān-chō͘ góa; lán tàu-tīn lâi-khì kong-táⁿ Ki-piàn, in-ūi in kap Iok-su-a í-ki̍p Í-sek-lia̍t tēng hô-iok.”

5Tùi án-ni, Iâ-lō͘-sat-léng-ông, Hi-pek-lûn-ông, Iâ-boa̍t-ông, La-kiat-ông, I-ki-lûn-ông, chit gō͘ ê A-mô͘-lī-ông lóng chhōa in ê kun-tūi, chū-chi̍p chat-iâⁿ tī Ki-piàn ê tùi-bīn, beh chìn-kong.

6 Ki-piàn-lâng chiū phài lâng khì Kiat-kah iâⁿ-tōe kìⁿ Iok-su-a, kóng, “Lí m̄-thang kiu-chhiú pàng-sak lí ê lô͘-po̍k; kiû lí kóaⁿ-kín lâi kái-kiù goán, pang-chān goán; in-ūi tòa tī soaⁿ-khu hiah-ê A-mô͘-lī-ông, lóng chū-chi̍p lâi beh kong-kek goán.”

7 Iok-su-a chiū kap i só͘-ū ê chiàn-sū, í-ki̍p kiông-béng ê ióng-sū, tùi Kiat-kah chhut-hoat.

8Siōng Chú tùi Iok-su-a kóng, “M̄-bián kiaⁿ in, in-ūi góa í-keng chiong in kau tī lí ê chhiú; in bô chi̍t ê lâng ōe-tàng tí-khòng lí.”

9Iok-su-a tùi Kiat-kah thàu-mî chiūⁿ--khì, tu̍t-kek A-mô͘-lī-lâng.

10Siōng Chú hō͘ in tī Í-sek-lia̍t-lâng ê bīn-chêng khí hūn-loān, Í-sek-lia̍t-lâng chiū tī Ki-piàn kā in tōa-tōa phah-pāi, tui-jip in kàu Pek Hô-lûn chiūⁿ-kiā ê lō͘, kā in phah kàu A-se-ka kap Má-ki-tāi.

11In tī Í-sek-lia̍t-lâng ê bīn-chêng tô-cháu; tī Pek Hô-lûn lo̍h-kiā ê só͘-chāi, Siōng Chú tùi thiⁿ lo̍h tōa-pha̍uh phah in, ti̍t-kàu A-se-ka, kā in phah-sí. Hiah-ê hō͘ pha̍uh phah--sí-ê, pí hō͘ Í-sek-lia̍t-lâng ēng to thâi--sí-ê khah chōe.

12Siōng Chú chiong A-mô͘-lī-lâng kau hō͘ Í-sek-lia̍t-lâng hit-ji̍t, Iok-su-a tī Í-sek-lia̍t-lâng ê bīn-chêng tùi Siōng Chú kóng,

“Ji̍t ah, tio̍h thêng tī Ki-piàn ê téng-bīn;

ge̍h ah, tio̍h thêng tī A-ngá-lûn Soaⁿ-kok.”

13Ji̍t-thâu chiū tiāⁿ-tiāⁿ, ge̍h chiū bô tín-tāng, ti̍t-kàu Í-sek-lia̍t-lâng phah-pāi in ê tùi-te̍k. Chit-ê sū ū kì-chài tī Ngá-soah-ní-kì. Ji̍t-thâu thêng tī thiⁿ ê tiong-ng, bô kín-kín lo̍h--khì, tāi-iok ū chi̍t ji̍t kú.

14Hit chi̍t ji̍t Siōng Chú thiaⁿ lâng ê kî-tó, í-chêng í-āu lóng bô koh chhin-chhiūⁿ án-ni hoat-seng, sī in-ūi Siōng Chú ūi Í-sek-lia̍t kau-chiàn.

15 Iok-su-a kap Í-sek-lia̍t chèng-lâng tò-lâi Kiat-kah ê iâⁿ-tōe.

Oa̍h-lia̍h A-mô͘-lī Gō͘ Ê Ông

16Hit gō͘ ê ông tô-cháu, bih tī Má-ki-tāi ê soaⁿ-tōng lāi.

17Ū lâng khì kā Iok-su-a pò-kò, kóng, “Hit gō͘ ê ông í-keng chhē--tio̍h lah, lóng bih tī Má-ki-tāi ê soaⁿ-tōng lāi.”

18Iok-su-a kóng, “Sóa tōa tè chio̍h kā tōng-kháu that--khí-lâi, phài lâng tiàm hia kò͘-siú;

19m̄-kú lín tio̍h kè-sio̍k tui-jip lín ê tùi-te̍k, tùi āu-bīn kā in kong-kek, m̄-thang hō͘ in ji̍p in ê siâⁿ; in-ūi Siōng Chú — lín ê Siōng-tè í-keng chiong in kau tī lín ê chhiú.”

20Iok-su-a kap Í-sek-lia̍t-lâng kā in phah-pāi, kā in thiat-tóe siau-bia̍t; chí-ū chhun chi̍t-kóa lâng cháu ji̍p-khì kian-kò͘ ê siâⁿ;

21Í-sek-lia̍t chèng-lâng an-choân tò-lâi Má-ki-tāi ê iâⁿ-tōe, kàu Iok-su-a hia. Í-āu, bô chi̍t ê lâng káⁿ chhut-siaⁿ hoán-tùi Í-sek-lia̍t-lâng.

22 Iok-su-a kóng, “Phah-khui tōng-kháu, kā hit gō͘ ê ông lia̍h chhut-lâi góa chia.”

23In chiū chiong hit gō͘ ê ông: Iâ-lō͘-sat-léng-ông, Hi-pek-lûn-ông, Iâ-boa̍t-ông, La-kiat-ông, I-ki-lûn-ông, tùi tōng-lāi lia̍h--chhut-lâi, tòa-khì i hia.

24In lia̍h hiah-ê ông chhut-lâi kàu Iok-su-a hia ê sî, Iok-su-a kiò Í-sek-lia̍t chèng-lâng lâi, tùi hiah-ê kap i chòe-hé khì ê kun-koaⁿ kóng, “Lín lâi thâu-chêng, kha ta̍h chiah-ê ông ê ām-kún.” In chiū lâi thâu-chêng, ēng kha ta̍h tī hiah-ê ông ê ām-kún.

25Iok-su-a tùi in kóng, “Lín m̄-thang kiaⁿ, m̄-thang lún. Tio̍h ióng-kám chòng-táⁿ, in-ūi Siōng Chú ōe chhin-chhiūⁿ án-ni tùi-thāi só͘-ū lín beh kong-kek ê tùi-te̍k.”

26Āu-lâi Iok-su-a thâi-sí hit gō͘ ê ông, kā in tiàu tī gō͘ châng chhiū téng-bīn kàu hông-hun.

27Ji̍t lo̍h ê sî, Iok-su-a chhut-lēng, tùi chhiū-téng kā in ê sin-si siu--lo̍h-lâi, hiat tī in bih ê soaⁿ-tōng, ēng kúi-nā tè tōa tè chio̍h-thâu thia̍p tī tōng-kháu. Hiah-ê chio̍h-thâu kàu kin-á-ji̍t iáu tī hia.

Kong-chhú Koh-khah Chōe A-mô͘-lī Tōe-khu

28Siâng hit-ji̍t, Iok-su-a kong-chhú Má-ki-tāi, ēng to thâi-sí siâⁿ-lāi só͘-ū ê lâng kap in ê ông, liân chi̍t ê to bô lâu--teh. I tùi-thāi Má-ki-tāi ê ông, chhin-chhiūⁿ í-chêng tùi-thāi Iâ-lī-ko-ông kâng-khoán.

29 Iok-su-a kap Í-sek-lia̍t chèng-lâng tùi Má-ki-tāi khì kong-táⁿ Li̍p-ná.

30Siōng Chú chiong chit-ê siâⁿ kap i ê ông kau tī Í-sek-lia̍t-lâng ê chhiú. Iok-su-a ēng to thâi-sí hit-ê ông kap siâⁿ-lāi só͘-ū ê chū-bîn, liân chi̍t ê to bô lâu--teh. I tùi-thāi Li̍p-ná ê ông, chhin-chhiūⁿ í-chêng tùi-thāi Iâ-lī-ko-ông kâng-khoán.

31 Iok-su-a kap Í-sek-lia̍t chèng-lâng tùi Li̍p-ná khì La-kiat, chat-iâⁿ tī siâⁿ ê tùi-bīn, beh kong-táⁿ chit-ê siâⁿ.

32Siōng Chú chiong La-kiat kau tī Í-sek-lia̍t-lâng ê chhiú; keh-ji̍t in kong-chhú chit-ê siâⁿ, ēng to thâi-sí siâⁿ-lāi só͘-ū ê chū-bîn, chhin-chhiūⁿ in tùi-thāi Li̍p-ná kâng-khoán.

33Hit-sî, Ki-sek ê ông Hô-lân lâi beh oān-chō͘ La-kiat; Iok-su-a chiū phah-sí i kap i ê jîn-bîn, liân chi̍t ê to bô lâu--teh.

34 Iok-su-a kap Í-sek-lia̍t chèng-lâng tùi La-kiat khì I-ki-lûn, tī siâⁿ ê tùi-bīn chat-iâⁿ, beh kong-táⁿ chit-ê siâⁿ.

35Kâng hit-ji̍t, in kong-chhú chit-ê siâⁿ, ēng to thâi-sí siâⁿ-lāi só͘-ū ê lâng, chhin-chhiūⁿ in tùi-thāi La-kiat kâng-khoán.

36 Iok-su-a kap Í-sek-lia̍t chèng-lâng tùi I-ki-lûn khì kong-táⁿ Hi-pek-lûn.

37In kong-chhú chit-ê siâⁿ, ēng to thâi-sí in ê ông kap siâⁿ-lāi ê lâng, liân chi̍t ê to bô lâu--teh; koh kong-chhú hù-kūn ê siâⁿ, châu-bia̍t in só͘-ū ê chū-bîn, chhin-chhiūⁿ in tùi-thāi I-ki-lûn kâng-khoán.

38 Iok-su-a kap Í-sek-lia̍t chèng-lâng tò-lâi kong-táⁿ Tí-phek.

39In kong-chhú chit-ê siâⁿ, lia̍h in ê ông, koh kong-chhú hù-kūn ê siâⁿ, ēng to thâi-sí siâⁿ-lāi só͘-ū ê chū-bîn, liân chi̍t ê to bô lâu--teh, chhin-chhiūⁿ í-chêng tùi-thāi Hi-pek-lûn kap Li̍p-ná kâng-khoán.

40Án-ni, Iok-su-a cheng-ho̍k chit-ê tōe-khu: Soaⁿ-khu, lâm-pêng ê tōe, soaⁿ-po͘, soaⁿ-pho-tōe, í-ki̍p chit-ê tōe-khu ê chu-ông; só͘-ū ōe chhoán-khùi--ê lóng châu-bia̍t, liân chi̍t ê to bô lâu--teh, lóng chiàu Siōng Chú — Í-sek-lia̍t ê Siōng-tè ê bēng-lēng.

41Tùi Ka-te-su Pa-nî-a kàu Ka-sat, Ko-san tōe-khu, í-ki̍p Ki-piàn, lóng hō͘ Iok-su-a cheng-ho̍k.

42Hiah-ê ông kap in ê thó͘-tōe, Iok-su-a tī chi̍t piàn chhut-cheng chiū lóng kā in cheng-ho̍k, in-ūi Siōng Chú — Í-sek-lia̍t ê Siōng-tè ūi Í-sek-lia̍t kau-chiàn.

43 Iok-su-a kap Í-sek-lia̍t chèng-lâng chiū tò-lâi Kiat-kah ê iâⁿ-tōe.

Iok-su-a-kì 10 - 現代台語譯本羅馬字版(TTVR)-闽南语

Learn More About Us