Chim-giân 29

Chim-giân 29 - 現代台語譯本羅馬字版(TTVR)-闽南语

1Lâng siū chek-hoa̍t iáu m̄-khéng hóe-kái,

ōe hut-jiân sit-pāi bia̍t-bông, bōe hù kā kiù.

2Gī-lâng chip-chèng, jîn-bîn hoaⁿ-hí;

pháiⁿ-lâng chiáng-koân, jîn-bîn thó͘-khùi.

3Ì-ài tì-hūi, pē-bú hoaⁿ-hí;

kiat-kau ki-lú, kheng-ka-tōng-sán.

4Ông si-hêng kong-gī, kok chiū ún-kò͘;

kiông siu hóe-lō͘, kok chiū bia̍t-bông.

5Phô͘-tháⁿ chhù-piⁿ,

sī teh siat lô-bāng tîⁿ ka-kī ê kha.

6Pháiⁿ-lâng ōe hō͘ ka-kī ê chōe tîⁿ--tio̍h;

m̄-kú gī-lâng ū hoan-ho͘ ū khoài-lo̍k.

7Gī-lâng koan-sim sàn-chhiah-lâng ê àn-chêng;

pháiⁿ-lâng lóng bô koan-sim.

8Chū-ko chū-tāi ê lâng kā siâⁿ chè-chō hūn-loān,

m̄-kú ū tì-hūi ê lâng ōe hō͘ siū-khì soah.

9Tì-hūi ê lâng kap gōng-lâng sio-kò,

gōng-lâng chí-ū siū-khì á-sī thí-chhiò, lóng bōe kái-koat.

10Ài thâi-lâng--ê oàn-hūn sûn-choân ê lâng,

m̄-kú chèng-ti̍t ê lâng pó-hō͘ i ê sìⁿ-miā.

11Gōng-lâng ū siū-khì chiū lóng piàⁿ-chhut,

m̄-kú ū tì-hūi ê lâng ōe-hiáu khòng-chè siū-khì.

12Thóng-tī-chiá nā beh thiaⁿ pe̍h-chha̍t-ōe,

koaⁿ-oân lóng ōe pìⁿ-chòe pháiⁿ.

13Sàn-chhiah-lâng kap ap-pek-chiá ū kiōng-tông ê só͘-chāi:

Siōng Chú lóng hō͘ in ê ba̍k-chiu kim, ōe khòaⁿ--kìⁿ.

14Ông nā chiàu kong-chèng phòaⁿ-toàn khùn-khó͘-lâng,

i ê ông-ūi ōe éng-oán kian-kò͘.

15Koán-kàu kap chek-tok ōe ke-thiⁿ tì-hūi;

bô koán-kàu ê gín-á ōe hō͘ lāu-bú kiàn-siàu.

16Pháiⁿ-lâng chiáng-koân, chōe-kò chiū ke-thiⁿ;

gī-lâng ōe khòaⁿ-tio̍h in sit-pāi.

17Koán-kàu lí ê kiáⁿ, i ōe hō͘ lí an-sim,

koh ōe hō͘ lí ê sim hoaⁿ-hí.

18Bô Siōng-tè ê chí-sī, jîn-bîn chiū hòng-chhiòng,

m̄-kú chun-siú lu̍t-hoat ê lâng chin ū hok-khì!

19Kan-ta ēng ōe, lô͘-po̍k bōe siū koán-kàu;

i bêng-pe̍k mā bōe thiaⁿ-thàn.

20Lí bat khòaⁿ-tio̍h sûi-piān kóng-ōe ê lâng--bô?

Liân gōng-lâng to pí i khah ū ǹg-bāng.

21Lô͘-po̍k nā tùi sòe-hàn chiū kā i sēng,

chit-ê lô͘-po̍k kàu-bé ōe chhiúⁿ-toa̍t chú-lâng ê châi-sán.

22Pháiⁿ sèng-tē ê lâng ōe jiá-khí oan-ke;

gâu hoat siū-khì ê lâng ōe hoān chin chōe chōe-kò.

23Lâng kiau-ngō͘ ōe hō͘ ka-kī kiàn-siàu;

sim khiam-pi ōe hō͘ ka-kī tit-tio̍h chun-êng.

24Kap chha̍t pun thau--lâi ê mi̍h sī bô ài ka-kī ê sìⁿ-miā;

i sui-jiân chiù-chōa choh-chèng mā bōe kóng si̍t-ōe.

25Kiaⁿ lâng bô kiaⁿ Siōng-tè sī kā ka-kī siat lô-bāng,

m̄-kú sìn-khò Siōng Chú chiū ū an-ún.

26Chin chōe lâng ài tùi thóng-tī-chiá kiû-chêng,

m̄-kú chí-ū tùi Siōng Chú chiah ōe tit-tio̍h kong-chèng ê phòaⁿ-koat.

27Bô kong-tō ê lâng, gī-lâng iàm-ò͘ⁿ;

hêng-ûi chèng-ti̍t ê lâng, pháiⁿ-lâng iàm-ò͘ⁿ.

Chim-giân 29 - 現代台語譯本羅馬字版(TTVR)-闽南语

Learn More About Us