Si-phian 75 - 現代台語譯本羅馬字版(TTVR)-闽南语

A-sat ê si, kau hō͘ sèng-ga̍k-tiúⁿ; tiāu, ēng “M̄-thang húi-hoāi”.Sím-phòaⁿ-chiá Siōng-tè

1Siōng-tè ah, goán kám-siā lí;

goán kám-siā lí, in-ūi lí tī goán sin-piⁿ;

goán beh pò-iông lí kî-biāu ê chok-ûi.

2Siōng-tè kóng: Tī só͘ tēng ê ji̍t-chí,

góa beh chiàu kong-pêng sím-phòaⁿ.

3Tōe kap tōe-chiūⁿ ê chū-bîn lóng iô-choah ê sî,

góa beh hō͘ tōe ê ki-chhó͘ kian-kò͘ khiā-chāi.

4Góa tùi kiau-ngō͘ ê lâng kóng, “M̄-thang kiau-ngō͘”;

tùi pháiⁿ-lâng kóng, “M̄-thang tián-ui,

5m̄-thang chhàng-chhiu,

m̄-thang ngī ām-kún kóng tōa-ōe.”

6Lâng ko-seng m̄-sī tùi tang, m̄-sī tùi sai,

mā m̄-sī tùi khòng-iá.

7Chí-ū Siōng-tè si-hêng sím-phòaⁿ,

I hō͘ chit-ê kàng-kē, hō͘ hit-ê ko-seng.

8Siōng Chú chhiú--ni̍h the̍h poe,

kui-poe lóng sī siū-khì ê kāu-chiú.

I kā chiú tò--chhut-lâi;

tōe-chiūⁿ ê pháiⁿ-lâng lóng lim, lim kàu ta.

9M̄-kú góa beh chhiùⁿ-koa chheng-chàn Ngá-kok ê Siōng-tè,

beh éng-oán pò-iông I ê chok-ûi.

10Pháiⁿ-lâng ê koân-sè, I ōe chām-tn̄g;

gī-lâng ê khùi-la̍t, I ōe ka-kiông.

Learn More About Us