Si-phian 81 - 現代台語譯本羅馬字版(TTVR)-闽南语

A-sat ê si, kau hō͘ sèng-ga̍k-tiúⁿ; ēng Ka-te̍k ê tiāu.Siōng-tè ê Liông-siān kap Í-sek-lia̍t ê Siâ-ok

1Siōng-tè sī lán ê khùi-la̍t, tio̍h tōa-siaⁿ chheng-chàn I;

tio̍h chhiùⁿ-koa chheng-chàn Ngá-kok ê Siōng-tè.

2Tio̍h chhiùⁿ si-koa, iô lin-long-kó͘,

tôaⁿ hó-thiaⁿ ê khîm kap sek.

3Tio̍h tī chhoe-it cha̍p-gō͘,

lán choeh-kî ê ji̍t, pûn sàu-kak.

4In-ūi che sī ūi Í-sek-lia̍t tēng ê kui-lē,

sī Ngá-kok ê Siōng-tè ūi in siat ê lé-gî.

5I kong-kek Ai-ki̍p-tōe ê sî,

ū kap Í-sek-lia̍t ê chú-bîn li̍p-iok.

Tī hia góa thiaⁿ-kìⁿ í-chêng m̄-bat thiaⁿ--tio̍h ê ōe.

6Siōng-tè kóng, “Góa chiong in keng-thâu téng ê tāng-tàⁿ sóa-khui,

hō͘ in pàng-lo̍h chhiú só͘ kōaⁿ tāng ê nâ-á.

7Lín tī hoān-lān tiong kiû-kiò, góa ū kái-kiù lín;

góa tùi lûi teh tân ê ba̍t-hûn tiong ìn-tap lín,

tī Bí-lī-pa ê chúi-chôaⁿ piⁿ chhì-giām lín.

8Góa ê chú-bîn ah, lín tio̍h thiaⁿ, góa beh kéng-kò lín;

Í-sek-lia̍t ah, góa jōa-á-ni̍h ǹg-bāng lín thiaⁿ-thàn góa!

9Lín tiong-kan m̄-thang ū pa̍t-ê sîn-bêng;

gōa-pang ê sîn-bêng, lín m̄-thang kūi-pài.

10Góa sī Siōng Chú — lín ê Siōng-tè;

góa bat chhōa lín tùi Ai-ki̍p-tōe chiūⁿ--lâi.

Lín ê chhùi tio̍h tōa khui, góa chiū hō͘ lín pá-chiok.

11“M̄-kú góa ê chú-bîn m̄ thiaⁿ góa ê ōe;

Í-sek-lia̍t lóng m̄ chhap góa.

12Góa chiū chhut-chāi in sim ngī,

hō͘ in chiàu ka-kī só͘ ài khì chòe.

13Góa jōa-á-ni̍h ǹg-bāng góa ê chú-bîn thiaⁿ-thàn góa,

Í-sek-lia̍t khéng kiâⁿ góa ê lō͘!

14Góa chin kín chiū ōe chè-ap in ê tùi-te̍k,

ēng chhiú tò-koat kong-kek in ê te̍k-jîn.

15Oàn-hūn Siōng Chú ê lâng ōe tī I bīn-chêng soe-thè;

in ōe éng-oán siū hêng-hoa̍t.

16Siōng Chú beh ēng hó ê be̍h hō͘ Í-sek-lia̍t chia̍h,

ēng tùi chio̍h-pôaⁿ chhut ê bi̍t hō͘ in boán-chiok.”

Learn More About Us