Thoân-tō-su 3

Thoân-tō-su 3 - 現代台語譯本羅馬字版(TTVR)-闽南语

Bān-sū Lóng Ū I ê Sî

1Thiⁿ-ē bān-hāng-sū lóng ū i ê kî;

sū-sū lóng ū i ê sî:

2Siⁿ ū sî, sí ū sî;

chai-chèng ū sî, khau só͘ chai-chèng--ê ū sî;

3thâi ū sî, i-hó ū sî;

thiah-húi ū sî, khí-chō ū sî;

4khàu ū sî, chhiò ū sî;

ai-siong ū sî, thiàu-bú ū sî;

5tâng-pâng ū sî, hun-pâng ū sî;

chhin-jia̍t ū sî, léng-tām ū sî;

6chhiau-chhē ū sî, sit-lo̍h ū sî;

pó-chûn ū sî, pàng-sak ū sî;

7thiah ū sî, pó͘ ū sî;

chēng-chēng ū sî, kóng-ōe ū sî;

8thiàⁿ ū sî, oàn ū sî;

chiàn-cheng ū sî, hô-pêng ū sî.

9Choh-kang ê lâng tùi i só͘ lô-lo̍k phah-piàⁿ--ê ū tit-tio̍h sím-mi̍h?

10Góa ū khòaⁿ-kìⁿ Siōng-tè hō͘ sè-kan-lâng pē tāng-tàⁿ, hō͘ in bōe-tàng chheng-êng.

11Siōng-tè hō͘ I só͘ chō ê it-chhè ha̍h in ê sî, lóng chin hó; koh chiong éng-oán chit-ê koan-liām hē tī lâng ê sim; m̄-kú Siōng-tè tùi thâu kàu bé só͘ chòe--ê, lâng bōe-tàng liáu-kái.

12Góa chai lâng oa̍h--teh siōng-hó sī khoài-lo̍k koh chòe hó-sū.

13Lâng mā chia̍h mā lim, hióng-siū i phah-piàⁿ tit--tio̍h-ê, tī i it-chhè só͘ lô-lo̍k--ê lâi hióng-hok, che mā-sī Siōng-tè só͘ sù.

14Góa chai Siōng-tè só͘ chòe ê it-chhè lóng ōe lâu kàu éng-oán, bōe ke-thiⁿ, bōe kiám-chió. Siōng-tè án-ni chòe, sī beh hō͘ lâng tī I ê bīn-chêng sim chûn kèng-ùi.

15Hiān-chāi ū--ê í-chêng í-keng ū; chiong-lâi beh ū--ê chá í-keng ū; kè--khì ê tāi-chì Siōng-tè ōe koh hō͘ i hoat-seng.

Sè-kan ê Bô Kong-pêng

16Góa koh khòaⁿ-tio̍h ji̍t-kng ê ē-bīn, tī sím-phòaⁿ ê só͘-chāi ū siâ-ok, tī kong-gī ê só͘-chāi mā ū siâ-ok.

17Góa sim-lāi kóng: Siōng-tè beh pîⁿ-pîⁿ sím-phòaⁿ gī-lâng kap pháiⁿ-lâng, in-ūi ta̍k-hāng tāi-chì, ta̍k-hāng hêng-ûi lóng ū i it-tēng ê sî.

18Góa sim-lāi kóng: Koan-hē sè-kan-lâng, Siōng-tè beh chhì-giām in, hō͘ in chai in put-kò kap cheng-siⁿ kâng-khoán.

19In-ūi sè-kan-lâng ê miā-ūn kap cheng-siⁿ ê miā-ūn lóng siâng-khoán; chit-ê sí, hit-ê mā sí, lóng siâng-khoán chí-ū chi̍t-kháu-khùi; lâng bô pí cheng-siⁿ khah hó, che lóng sī khang-hu.

20In lóng khì kàu kâng chi̍t ê só͘-chāi; lóng tùi thô͘-hún chhut, mā lóng kui thô͘-hún.

21Siáⁿ-lâng chai lâng ê sìⁿ-miā chiūⁿ téng-bīn, siù ê sìⁿ-miā lo̍h tōe-ē?

22Só͘-í, lâng siōng-hó sī ōe-tàng hióng-siū ka-kī só͘ phah-piàⁿ ê sêng-kó, in-ūi che sī i ê pò-siúⁿ. Sí-āu ê tāi-chì, siáⁿ-lâng ōe-tàng hō͘ i khòaⁿ--tio̍h?

Thoân-tō-su 3 - 現代台語譯本羅馬字版(TTVR)-闽南语

Learn More About Us