Í-sài-a-su 46

Í-sài-a-su 46 - 現代台語譯本羅馬字版(TTVR)-闽南语

Pa-pí-lûn ê Ngó͘-siōng

1 Pí-le̍k kūi--lo̍h-khì lah, Nî-pho phak--lo̍h-khì lah!

Chiah-ê Pa-pí-lûn ê sîn-bêng hē tī cháu-siù kap cheng-siⁿ ê ka-chiah-phiaⁿ.

Lín teh kng ê ngó͘-siōng chiâⁿ-chòe ià-siān ê cheng-siⁿ ê tāng-tàⁿ.

2In í-keng lóng kūi--lo̍h-khì, phak--lo̍h-khì,

bô hoat-tō͘ kiù ka-kī,

tian-tò hō͘ te̍k-jîn chhiúⁿ-khì chòe chiàn-lī-phín.

3 Ngá-kok lâu--lo̍h-lâi ê kiáⁿ-sun,

Í-sek-lia̍t-lâng ah, lín lóng tio̍h thiaⁿ!

Lín chi̍t-ē chhut-sì góa chiū it-ti̍t kā lín phō,

tùi chhut bú-thai chiū kā lín āiⁿ.

4Kàu lín nî-lāu, góa lóng siâng-khoán;

kàu lín thâu-mn̂g pe̍h, góa iáu ōe kā lín hû-chhî.

Góa chhòng-chō lín, ōe kā lín phō;

góa ōe kè-sio̍k kā lín āiⁿ, kā lín kái-kiù.

5Siōng Chú kóng:

Lín beh ēng siáⁿ-lâng kap góa pí, kap góa phēng?

Siáⁿ-lâng chhin-chhiūⁿ góa, ōe-tàng kap góa siâng-khoán?

6Lâng tùi tē-á piàⁿ kui-tui kim-á chhut--lâi,

ēng chhìn-á chhìn gûn.

In chhiàⁿ sai-hū ēng chiah-ê kim-gûn chù-chō sîn-siōng,

jiân-āu phak lo̍h-khì kūi-pài.

7In chiong ngó͘-siōng giâ--khí-lâi, khǹg tī keng-thâu-téng kng,

kā i chhāi tī chi̍t ê só͘-chāi,

hō͘ i bōe-tàng lī-khui pún-ūi.

Lâng kā i kiû-kiò, i lóng bōe ìn-tap;

i mā bô hoat-tō͘ kiù lâng thoat-lī chai-lān.

8Ū-chōe ê lâng ah, tio̍h kì hō͘ tiâu;

pōe-poān ê lâng ah, tio̍h hó-hó siūⁿ.

9Tio̍h ōe-kì-tit kó͘-chá hoat-seng ê tāi-chì.

Góa sī Siōng-tè, kî-tha bô pa̍t-ê;

góa sī Siōng-tè, bô chi̍t ê ōe-tàng kap góa pí.

10Tùi khí-chho͘ góa chiū ū-chhek chiong-kio̍k ê sū;

tùi kó͘-chá góa chiū soan-kò iáu-bē hoat-seng ê tāi-chì.

Góa kóng: Góa ê kè-ōe bōe kái-piàn;

góa ài chòe ê sū, it-tēng ōe hō͘ i si̍t-hiān.

11Góa beh chhe chi̍t ê sù-chiá tùi tang-hng chin hn̄g ê só͘-chāi lâi;

i beh chhin-chhiūⁿ eng-chiáu chhiong--lo̍h-lâi.

Góa í-keng kóng chhut-chhùi, it-tēng beh si̍t-hiān;

góa í-keng kè-ōe, it-tēng beh oân-sêng.

12Lín chiah-ê sim ngī,

siūⁿ-kóng sèng-lī bô-bāng ê lâng,

tio̍h thiaⁿ góa kóng.

13Góa beh hō͘ sèng-lī pek-kūn, liâm-piⁿ kàu;

góa ê chín-kiù bōe iân-tî.

Góa beh kái-kiù Iâ-lō͘-sat-léng,

beh hō͘ Í-sek-lia̍t tit-tio̍h êng-kng.

Í-sài-a-su 46 - 現代台語譯本羅馬字版(TTVR)-闽南语

Learn More About Us