Iâ-lī-bí-su 12

Iâ-lī-bí-su 12 - 現代台語譯本羅馬字版(TTVR)-闽南语

Iâ-lī-bí Chit-būn Siōng Chú

1Siōng Chú, góa kap lí cheng-piān ê sî,

ta̍k-piàn lóng lí iâⁿ,

m̄-kú góa iáu-sī beh kap lí lí-lūn koan-hē kong-gī ê tāi-chì;

sī-án-chóaⁿ pháiⁿ-lâng lóng sū-sū sūn-lī?

Choh-lâng kan-kúi--ê ná ōe hióng-siū êng-hôa?

2Lí kā in chai-chèng, in chiū tèng-kun,

tōa-châng, kiat-si̍t.

In siông-siông kóng-khí lí,

m̄-kú sim-lāi bô lí.

3Siōng Chú ah, lí bat góa, liáu-kái góa,

chhì-giām góa tùi lí ê tiong-sêng.

Kiû lí kā hiah-ê pháiⁿ-lâng thoa--chhut-lâi,

chhin-chhiūⁿ teh giú beh thâi ê iûⁿ;

kā in koaiⁿ--khí-lâi,

koaiⁿ kàu beh thâi hit-ji̍t.

4Chit-ê tōe khòng-hān,

chhân-iá ê chhiⁿ-chháu choân-pō͘ ta--khì beh kàu tī-sî?

In-ūi chit-ê tōe ê chū-bîn chòe pháiⁿ,

chiáu-á kap cheng-siⁿ sí-liáu-liáu;

m̄-kú in kóng, “Siōng Chú bô teh koán lán ê kiat-kio̍k!”

5Siōng Chú kóng:

Lí kap lâng kiâⁿ-lō͘ pí-sài to ōe thiám,

ná cháu ōe iâⁿ chiàn-bé?

Lí tī an-choân khòng-khoah ê só͘-chāi chiah ōe kám-kak an-ún,

nā tī Iok-tàn hô-piⁿ ê chhiū-nâ, lí beh án-chóaⁿ?

6Liân lí ê hiaⁿ-tī, lí ê chhin-chiâⁿ to ōe chhut-bōe lí,

tī lí ê āu-bīn tōa-siaⁿ kong-kek lí;

in chiū-sī tùi lí kóng hó-thiaⁿ-ōe,

lí mā m̄-thang sìn-jīm in.

Siōng Chú ūi I ê Chú-bîn Iu-siong

7Góa pàng-sak Í-sek-lia̍t-ke,

hòng-khì góa ê sán-gia̍p;

chiong góa sim-ài ê chú-bîn kau tī i ê tùi-te̍k ê chhiú-thâu.

8Góa ê chú-bîn tùi góa lâi kóng, chhin-chhiūⁿ chhiū-nâ lāi ê sai,

tōa-siaⁿ kong-kek góa,

só͘-í góa oàn-hūn in.

9Góa ê chú-bîn tùi góa lâi kóng, chhin-chhiūⁿ ū pan-tiám ê eng,

chin chōe chiah eng tī chiu-ûi kong-kek i.

Tio̍h chio-chi̍p chhân-iá ê iá-siù chòe-hé lâi thun-chia̍h i.

10Lia̍t-kok ê thóng-tī-chiá húi-bia̍t góa chai-pôe ê chú-bîn,

thún-ta̍h góa ê chhân-hn̂g,

hō͘ góa pûi-súi ê chhân-hn̂g pìⁿ-chòe pha-hng ê hong-po͘.

11In phò-hoāi thó͘-tōe,

hō͘ thó͘-tōe pha-hng kah tùi góa ai-khàu;

choân-tōe pha-hng, m̄-kú bô lâng koan-sim.

12Húi-bia̍t-chiá lâi kàu khòng-iá kng-ku̍t ê soaⁿ-lûn-á;

Siōng Chú ê to beh húi-bia̍t tāi-tōe, tùi chit-pêng kàu hit-pêng;

bô chi̍t ê lâng an-choân.

13In chèng be̍h-á, siu-sêng chhì-phè;

in lô-khó͘ chèng-choh, m̄-kú bô siu-sêng;

in ê siu-sêng hō͘ in tōa-tōa sit-bāng,

in-ūi góa Siōng Chú tùi in hoat tōa siū-khì.

Siōng Chú Kéng-kò Í-sek-lia̍t Chiu-ûi Lia̍t-kok

14Siōng Chú án-ni kóng, “Góa beh chiong só͘-ū ê pháiⁿ chhù-piⁿ, tùi in ê thó͘-tōe pu̍ih--chhut-lâi; in chhim-hoān góa sù hō͘ góa ê chú-bîn Í-sek-lia̍t ê thó͘-tōe; góa mā beh chiong Iû-tāi jîn-bîn tùi in tiong-kan pu̍ih--chhut-lâi.

15Góa kā Iû-tāi jîn-bîn pu̍ih--chhut-lâi liáu-āu, beh oat tńg-lâi lîn-bín in, kā in chhōa--tò-lâi, hō͘ in ta̍k-ê lâng tńg-khì ka-kī ê kò͘-hiong, hôe-ho̍k in ta̍k-ê lâng ê sán-gia̍p.

16Āu-lâi, chiu-ûi ê kok-ka nā khéng sêng-sim ha̍k-si̍p góa chú-bîn ê sìn-gióng, kí góa — éng-oa̍h ê Siōng Chú ê miâ chiù-chōa, chhin-chhiūⁿ in í-chêng kà góa ê chú-bîn kí Pa-le̍k chiù-chōa kâng-khoán, in chiū ōe tī góa chú-bîn ê tiong-kan tit-tio̍h ho̍k-heng.

17“M̄-kú nā ū kok-ka m̄ thiaⁿ-thàn, góa chiū beh kā i pu̍ih--khí-lâi, chiong i siau-bia̍t.” Siōng Chú án-ni soan-kò.

Iâ-lī-bí-su 12 - 現代台語譯本羅馬字版(TTVR)-闽南语

Learn More About Us