Si-phian 26 - 現代台語譯本羅馬字版(TTVR)-闽南语

Tāi-pi̍t ê si.Chèng-ti̍t ê Lâng ê Kî-tó

1Siōng Chú ah, kiû lí phòaⁿ góa bô chōe,

in-ūi góa ū chiàu chèng-ti̍t teh kiâⁿ.

Góa óa-khò Siōng Chú bô tōng-iâu.

2Siōng Chú ah, kiû lí kàm-chhat góa, khó-giām góa;

kiû lí chhat-giām góa ê sim-su ì-liām.

3In-ūi lí ê chû-ài tī góa ê ba̍k-chiu chêng;

góa ū chiàu lí ê chin-lí teh kiâⁿ.

4Góa m̄-bat kap hu-ké ê lâng chòe-hé chē,

mā m̄-bat kap ké-hó ê lâng tàu-tīn.

5Góa iàm-ò͘ⁿ kap pháiⁿ-lâng kiat-tóng,

bô ài kap ok-to̍k ê lâng chòe-hé chē.

6Siōng Chú ah, góa sóe-chhiú piáu-sī bô chōe,

se̍h lí ê chè-tôaⁿ chham-ka lé-pài;

7góa ēng kám-siā ê si-koa siōng-chàn,

kóng-khí lí it-chhè kî-biāu ê chok-ûi.

8Siōng Chú ah, góa ì-ài lí tòa ê chhù,

ì-ài lí ê êng-kng lîm-chāi ê só͘-chāi.

9M̄-thang chiong góa ê sìⁿ-miā kap chōe-jîn chòe-hé siau-bia̍t;

m̄-thang chiong góa ê oa̍h-miā kap thâi-lâng--ê chòe-chi̍t-ē siau-bia̍t.

10In ê chhiú put-sî chòe pháiⁿ;

in ê chiàⁿ-chhiú ta̍k só͘-chāi siu hóe-lō͘.

11Nā-sī góa, góa beh chiàu chèng-ti̍t lâi kiâⁿ;

kiû lí kiù-sio̍k góa, lîn-bín góa.

12Góa ê kha khiā tī pîⁿ-tháⁿ ê só͘-chāi;

góa beh tī tāi-hōe tiong chheng-chàn Siōng Chú.

Learn More About Us