Í-sài-a-su 51

Í-sài-a-su 51 - 現代台語譯本羅馬字版(TTVR)-闽南语

An-ùi Iâ-lō͘-sat-léng

1Lín chiah-ê tui-kiû chèng-gī,

chhē-kiû góa Siōng Chú ê lâng ah, tio̍h thiaⁿ!

Tio̍h khòaⁿ hit-tè chio̍h-pôaⁿ, lín chiū-sī tùi hia phah--chhut-lâi--ê;

chù-ì khòaⁿ hit-ê chio̍h-hia̍t, lín chiū-sī tùi hia ó͘--chhut-lâi--ê.

2Tio̍h chù-ì khòaⁿ lín ê chó͘-sian A-pek-la-hán,

khòaⁿ lín ê lāu-bú Sa-la.

Góa soán-tiàu i ê sî, i kan-ta ka-kī chi̍t ê,

m̄-kú góa sù-hok i, hō͘ i kiáⁿ-sun chin chōe.

3Siōng Chú beh an-ùi Iâ-lō͘-sat-léng,

an-ùi i só͘-ū ê hong-po͘.

Góa beh hō͘ soa-bô͘ pìⁿ-chòe chhin-chhiūⁿ I-tiân-hn̂g,

hō͘ hong-po͘ chhin-chhiūⁿ Siōng Chú ê hn̂g;

tī hn̂g-lāi ū hoaⁿ-hí khoài-lo̍k,

ū kám-siā o-ló ê koa-siaⁿ.

4Góa ê chú-bîn ah, chù-ì thiaⁿ góa kóng;

góa ê kok-bîn ah, tio̍h àⁿ hī-khang thiaⁿ góa.

Góa beh chiong lu̍t-hoat sù hō͘ bān-kok;

góa ê kong-gī beh chòe bān-bîn ê kng.

5Góa ê sèng-lī í-keng pek-kūn;

góa ê chín-kiù í-keng hoat-chhut.

Góa ê chhiú-kut beh thóng-tī bān-bîn.

Hái-tó lóng teh thèng-hāu góa lâi,

it-ti̍t kî-thāi góa lâi kái-kiù.

6Tio̍h gia̍h-thâu khòaⁿ thiⁿ, àⁿ-lo̍h khòaⁿ tōe;

in-ūi thiⁿ teh-beh chhin-chhiūⁿ ian-bū siau-sòaⁿ,

tōe chhin-chhiūⁿ saⁿ chhēng kū--khì,

lāi-bīn ê chū-bîn chhin-chhiūⁿ báng-thâng sí--khì.

M̄-kú góa ê chín-kiù ōe éng-oán chûn-sio̍k,

góa ê kong-gī tāi-tāi bû-kiông.

7Tio̍h thiaⁿ! Lín chiah-ê jīn-bat kong-gī,

ū kā góa ê kà-sī khǹg tī sim-lāi ê lâng.

M̄-bián kiaⁿ lâng kā lín thí-chhiò!

M̄-bián lún pa̍t-lâng kā lín bú-jio̍k!

8In-ūi chiù-thâng ōe kā in thun-bia̍t, ná-chún teh chia̍h saⁿ;

thâng ōe kā in chia̍h-liáu, ná-chún teh chia̍h iûⁿ-mn̂g.

M̄-kú, góa ê kong-gī ōe éng-oán chûn-sio̍k,

góa ê chín-kiù sòa kàu bān-tāi.

9Siōng Chú ah, tio̍h chhíⁿ--khí-lâi! Chhíⁿ--khí-lâi!

Lí ê chhiú-kut tio̍h kian-kiông--khí-lâi!

Chhin-chhiūⁿ chá-sî ê nî-ji̍t,

chhin-chhiūⁿ kó͘-chá ê sî-tāi án-ni, tio̍h khí--lâi!

Kā La-hap-pek tok-chòe chi̍t-tè chi̍t-tè,

koh chha̍k-thàu hit-bé tōa hái-koài--ê kiám m̄-sī lí?

10Hō͘ hái kap tōa chhim-ian ê chúi ta--khì,

tī chhim-ian khui chi̍t tiâu lō͘,

hō͘ tit-tio̍h sio̍k-hôe ê lâng kè--khì-ê kiám m̄-sī lí?

11Án-ni, Siōng Chú sio̍k-hôe ê lâng lóng ōe tò-tńg--lâi.

In ōe hoaⁿ-thâu-hí-bīn, iân-lō͘ chhiùⁿ-koa tńg-lâi Iâ-lō͘-sat-léng;

ai-thàn pi-siong lóng siau-sit.

12Siōng Chú kóng,

“Sī góa, góa chiah sī an-ùi lín ê Siōng-tè.

Sī-án-chóaⁿ lí teh kiaⁿ it-tēng ōe sí ê lâng?

In ê sìⁿ-miā put-kò chhin-chhiūⁿ chháu.

13Lí sī-án-chóaⁿ bōe-kì-tit lí ê Siōng Chú,

bōe-kì-tit hit-ūi thí-khui kiong-chhong,

li̍p tāi-tōe kun-ki ê Chō-bu̍t-chú?

Lí kui-ji̍t kiaⁿ-hiâⁿ bô-thêng,

kiaⁿ hit-ê siūⁿ-beh húi-hoāi lí ê khi-ap-chiá siū-khì.

Kî-si̍t, i ê siū-khì bōe-tàng siong-hāi lí.

14Siū lia̍h--khì ê lâng chin kín chiū ōe tit-tio̍h tháu-pàng;

in bōe sí tī kaⁿ-lô,

mā bōe khiàm-kheh chia̍h-mi̍h.

15“Góa sī Siōng Chú — lí ê Siōng-tè;

góa iô-tāng hái-iûⁿ, hō͘ éng hōa-hōa-háu.

Siōng Chú — Bān-kun ê Thóng-sòe sī góa ê chheng-ho͘.

16Góa chiong góa ê ōe khǹg tī lí ê chhùi,

ēng góa ê chhiú ê iáⁿ jia-khàm lí.

Góa thí-khui kiong-chhong, kā tāi-tōe hē kun-ki,

kā Iâ-lō͘-sat-léng kóng ‘Lí sī góa ê chú-bîn’.”

Iâ-lō͘-sat-léng Bōe koh Ū Thòng-khó͘

17Tio̍h chhíⁿ--khí-lâi! Chhíⁿ--khí-lâi!

Iâ-lō͘-sat-léng, tio̍h peh--khí-lâi!

Lí ū lim Siōng Chú the̍h hō͘ lí tōa siū-khì ê poe,

lim hō͘ lâng tian-lâi-tian-khì ê chiú, kui óaⁿ-kong lim kah ta-ta.

18I siⁿ ê kiáⁿ-jî bô chi̍t ê ōe-tàng kā i chhah--teh;

i chhī tōa-hàn ê jî-lú bô chi̍t ê ōe-tàng kā i hû--teh.

19Chit nn̄g têng ê chai-hō, lí lóng bat tú--tio̍h,

siáⁿ-lâng ōe-tàng kap lí chòe-hé pi-siong?

Húi-hoāi kap hong-hòe, ki-hng kap to-kiàm lîm-kàu,

siáⁿ-lâng ōe-tàng kā lí an-ùi?

20Lí ê kiáⁿ-jî hūn-tó tī koe-lō͘-kháu,

chhin-chhiūⁿ hō͘ lâng bāng--tio̍h ê lêng-iûⁿ.

In chhiong-hun kám-siū Siōng Chú ê tōa siū-khì,

siū-chīn lí ê Siōng-tè ê chek-pī.

21Só͘-í, lín siū-khó͘ ê Iâ-lō͘-sat-léng chū-bîn,

bô lim-chiú mā tian-lâi-tian-khì ê lâng ah, tio̍h thiaⁿ!

22Chì-koân ê Siōng Chú, ūi-tio̍h I chú-bîn sin-oan ê Siōng-tè án-ni kóng,

“Lín khòaⁿ, góa í-keng tùi lín ê chhiú chiong hō͘ lín tian-lâi-tian-khì ê poe the̍h-cháu;

lín m̄-bián koh lim góa tōa siū-khì ê óaⁿ.

23Góa beh chiong chit-óaⁿ chiú the̍h hō͘ khó͘-chhó͘ lín ê lâng lim;

in bat kā lín kóng,

‘Phak--lo̍h-khì, hō͘ goán ta̍h--kè-khì.’

Hit-sî, lín ê ka-chiah-phiaⁿ chhin-chhiūⁿ thô͘-kha,

chhin-chhiūⁿ koe-lō͘ kù-chāi in ta̍h--kè-khì.”

Í-sài-a-su 51 - 現代台語譯本羅馬字版(TTVR)-闽南语

Learn More About Us