Í-su-la-kì 10

Í-su-la-kì 10 - 現代台語譯本羅馬字版(TTVR)-闽南语

Kìm-chí kap Gōa-cho̍k Thong-hun

1 Í-su-la kî-tó, jīn-chōe, thî-khàu, phak tī Siōng-tè sèng-tiān thâu-chêng ê sî, ū chi̍t tōa-tīn Í-sek-lia̍t ê lâm-lú kap gín-á chū-chi̍p lâi i hia; in lóng khàu kah chin siong-sim.

2Í-lân ê hō͘-tāi, Iâ-hiat ê kiáⁿ Sī-ka-nî tùi Í-su-la kóng, “Goán tùi lán ê Siōng-tè bô tiong-si̍t, in-ūi goán chhōa chit só͘-chāi gōa-cho̍k ê lú-chú chòe bó͘; sui-jiân sī án-ni, Í-sek-lia̍t-lâng iáu-kú ū ǹg-bāng.

3Hiān-chāi lán tio̍h kap lán ê Siōng-tè li̍p-iok, chiàu lí kap hiah-ê kiaⁿ-ùi Siōng-tè ê kài-bēng ê lâng só͘ koat-tēng, chiàu lu̍t-hoat, chiong chiah-ê bó͘ kap in só͘ siⁿ ê jî-lú lóng kóaⁿ--chhut-khì.

4Tio̍h chhái-chhú hêng-tōng, che sī lí eng-kai chòe ê sū. Goán beh chi-chhî lí, lí tio̍h ióng-kám khì chòe.”

5 Í-su-la chiū sûi-sî hō͘ chè-si ê léng-siù kap Lī-bī-lâng, í-ki̍p Í-sek-lia̍t chèng-lâng soan-sè, beh chiàu chiah-ê ōe khì chòe; in chiū án-ni soan-sè.

6Í-su-la tùi Siōng-tè sèng-tiān ê thâu-chêng khí--lâi, ji̍p-khì Í-lī-a-si̍t ê kiáⁿ Iok-hap-lân ê chhù, tòa tī hia, bô chia̍h bô lim, ūi-tio̍h liû-hòng--tò-lâi tùi Siōng-tè bô tiong-si̍t ê lâng ai-siong.

7In tī Iâ-lō͘-sat-léng kap Iû-tāi choân-tōe soan-pò͘, bēng-lēng liû-hòng--tò-lâi ê lâng lóng tio̍h lâi Iâ-lō͘-sat-léng chū-chi̍p.

8Nā ū lâng bô sūn-thàn hiah-ê siú-léng kap tiúⁿ-ló ê bēng-lēng, saⁿ ji̍t lāi bô lâi, chiū beh bu̍t-siu in ê châi-sán, chiong in tùi liû-hòng--tò-lâi ê lâng ê thoân-thé kek-chhut.

9Iû-tāi kap Piān-ngá-bín chit nn̄g chi-cho̍k ê lâng chiū tī saⁿ ji̍t lāi lóng lâi Iâ-lō͘-sat-léng chū-chi̍p; hit-ji̍t sī káu-ge̍h jī-cha̍p, chèng-lâng lóng chē tī Siōng-tè sèng-tiān thâu-chêng ê kóng-tiûⁿ, ūi-tio̍h chit-ê sū, koh in-ūi lo̍h tōa-hō͘, lóng gi̍h-gi̍h-chhoah.

10Chè-si Í-su-la khí--lâi, kā in kóng, “Lín tùi Siōng-tè bô tiong-si̍t, chhōa gōa-pang ê lú-chú chòe bó͘, ke-thiⁿ Í-sek-lia̍t-lâng ê chōe.

11Taⁿ tio̍h ǹg Siōng Chú — lín lia̍t-chó͘ ê Siōng-tè jīn-chōe, chun-hêng I ê chí-ì, kap chāi-tōe ê jîn-bîn í-ki̍p gōa-cho̍k ê lú-chú keh-lī.”

12Hōe-chiòng lóng tōa-siaⁿ ìn kóng, “Goán it-tēng beh chiàu lí só͘ kóng--ê khì chòe.

13M̄-kú lâng chin chōe, koh tú-tio̍h tōa-hō͘, goán bô hoat-tō͘ it-ti̍t khiā tī gōa-bīn, koh che mā m̄-sī chi̍t ji̍t nn̄g ji̍t ōe-tàng kái-koat ê tāi-chì, in-ūi goán só͘ hoān ê chōe chin giâm-tiōng.

14Taⁿ, chhiáⁿ lán ê léng-siù tāi-piáu choân-thé hōe-chiòng lâu tī chia, lán ta̍k-ê siâⁿ só͘-ū chhōa gōa-pang lú-chú chòe bó͘ ê lâng, tio̍h chiàu chí-tēng ê sî-kan, kap hit-ê siâⁿ ê tiúⁿ-ló í-ki̍p sím-phòaⁿ-koaⁿ chòe-hé lâi, pān-lí chiah-ê sū, ti̍t-kàu lán ê Siōng-tè siu-hôe tùi lán ê siū-khì.”

15M̄-kú A-sat-hek ê kiáⁿ Iok-ná-tan, Te̍k-óa ê kiáⁿ Ngá-hap-siā hoán-tùi chit-ê koat-tēng, in mā tit-tio̍h Bí-su-lân kap Lī-bī-lâng Sa-pí-thài ê chi-chhî.

16Tùi liû-hòng ê tōe tò--lâi ê lâng chiàu Í-su-la ê ōe khì chòe. Chè-si Í-su-la chiū tùi cho̍k-tiúⁿ ê tiong-kan chí-phài chi̍t-kóa lâng, teng-kì in ê miâ, tùi cha̍p-ge̍h chhoe-it khai-sí tiâu-cha chit-ê sū.

17Kàu chiaⁿ-ge̍h chhoe-it, só͘-ū chhōa gōa-cho̍k lú-chú ê lâng ê miâ chiah tiâu-cha chheng-chhó.

Chhōa Gōa-cho̍k Lú-chú ê Lâng

18Tī chè-si ê hō͘-tāi, chhâ-chhut ū chhōa gōa-cho̍k lú-chú ê lâng chiū-sī: Iok-sat-ta̍t ê kiáⁿ Iâ-su-a kap i ê hiaⁿ-tī Má-se-ngá, Í-lī-í-siā, Ngá-li̍p, kap Ki-tāi-lī.

19In li̍p-sè beh lî in ê bó͘; in-ūi in ū hoān-chōe, chiū hiàn chi̍t chiah mî-iûⁿ-káng sio̍k in ê chōe.

20 Im-be̍k ê hō͘-tāi, ū Hap-ná-nî kap Se-pa-tē-ngá

21 Hap-lîm ê hō͘-tāi, ū Má-se-ngá, Í-lī-a, Sī-má-ngá, Iâ-hiat, kap O͘-se-a

22 Pa-si-hō͘-ní ê hō͘-tāi, ū Í-lī-iok-nái, Má-se-ngá, Í-si̍t-má-lī, Ná-thán-gia̍p, Iok-sat-poa̍t, kap Í-lī-a-sat

23 Lī-bī-lâng ê tiong-kan, ū Iok-sat-poa̍t, Sī-múi, Ki-la-ngá (chiū-sī Ki-lī-tha), Pí-tha-hi-ngá, Iû-tāi, kap Í-lī-í-siā

24Hū-chek chhiùⁿ-koa ê lâng ê tiong-kan, ū Í-lī-a-si̍t

Sèng-tiān siú-ōe ê tiong-kan ū Sa-liông, Thê-liān, kap O͘-lī

25 Í-sek-lia̍t-lâng Pa-lio̍k ê hō͘-tāi tiong, ū La-bí, Iâ-se-ngá, Má-ki-ngá, Bí-ngá-bîn, Í-lī-a-sat, Má-ki-ngá, kap Pí-ná-ngá

26 Í-lân ê hō͘-tāi tiong, ū Má-tha-nî, Sat-ka-lī-a, Iâ-hiat, A-pek-tí, Iâ-lī-mô͘, kap Í-lī-a

27 Sat-thó͘ ê hō͘-tāi tiong, ū Í-lī-iok-nái, Í-lī-a-si̍t, Má-tha-nî, Iâ-lī-mô͘, Sat-poa̍t, kap A-se-sat.

28 Pí-pài ê hō͘-tāi tiong, ū Iok-hap-lân, Hap-ná-nî-ngá, Sat-pài, kap A-le̍k

29 Pa-nî ê hō͘-tāi tiong, ū Bí-su-lân, Má-lo̍k, A-tāi-ngá, Ngá-su̍t, Sī-ap, kap Iâ-lī-mô͘

30 Pa-hap Mô͘-ap ê hō͘-tāi tiong, ū A-tí-ná, Ki-la, Pí-ná-ngá, Má-se-ngá, Má-tha-nî, Pí-sat-lia̍t, Pin-lōe, kap Má-ná-se

31 Hap-lîm ê hō͘-tāi tiong, ū Í-lī-í-siā, I-sī-ngá, Má-ki-ngá, Sī-má-ngá, Se-biān,

32Piān-ngá-bín, Má-lo̍k, kap Sī-má-lī-ngá

33 Hap-sūn ê hō͘-tāi tiong, ū Má-te̍k-nái, Má-ta̍t-tha, Sat-poa̍t, Í-lī-hoat-lia̍t, Iâ-lī-mái, Má-ná-se, kap Sī-múi

34 Pa-nî ê hō͘-tāi tiong, ū Má-tāi, Àm-lân, O͘-ek,

35Pí-ná-ngá, Pí-tí-ngá, Ki-lo̍k,

36Óa-nî-ngá, Bí-lī-boa̍t, Í-lī-a-si̍t,

37Má-tha-nî, Má-te̍k-nái, kap Ngá-sò

38 Pin-lōe ê hō͘-tāi tiong, ū Sī-múi,

39Sī-lī-bí-ngá, Ná-tan, A-tāi-ngá,

40Má-ná-tí-pài, Sa-sài, Sa-nāi,

41A-sat-lia̍t, Sī-lī-bí-ngá, Sī-má-lī-ngá,

42Sa-liông, A-má-lī-ngá, kap Iok-sek

43 Nî-pho ê hō͘-tāi tiong, ū Iâ-lī, Má-tha-thê-ngá, Sat-poa̍t, Se-pí-ná, Ngá-tāi, Iok-ní, Pí-ná-ngá.

44Chiah-ê lâng lóng chhōa gōa-cho̍k ê lú-chú chòe bó͘; kî-tiong mā ū lâng tùi chiah-ê lú-chú siⁿ-kiáⁿ cha-bó͘-kiáⁿ.

Í-su-la-kì 10 - 現代台語譯本羅馬字版(TTVR)-闽南语

Learn More About Us