Ngá-ko 5

Ngá-ko 5 - 現代台語譯本羅馬字版(TTVR)-闽南语

(Lâm)

1Góa ê sió-bē, góa ê sin-niû ah, góa ū ji̍p-khì góa ê hn̂g-lāi,

bán góa ê bu̍t-io̍h kap phang-liāu,

chia̍h bi̍t-pô͘ kap bi̍t,

lim góa ê chiú kap lin.

(Iâ-lō͘-sat-léng ê Cha-bó͘ gín-á)

Góa ê pêng-iú, lâi chia̍h, lâi lim;

chīn-chêng lâi hióng-siū ài-chêng.

Tē-sì Siú(Lú)

2Góa teh khùn, m̄-kú sim iáu cheng-sîn.

Thiaⁿ leh, góa chhin-ài--ê teh phah-mn̂g, kóng:

(Lâm)

Góa ê sió-bē, góa ê ài-jîn,

góa sûn-choân ê hún-chiáu, kā góa khui-mn̂g;

góa ê thâu-khak hō͘ lō͘-chúi tih-tâm,

góa ê thâu-mn̂g tâm-lok-lok.

(Lú)

3Góa í-keng thǹg-saⁿ, tio̍h koh chhēng o͘h?

Góa í-keng sóe-kha, tio̍h koh phah lâ-sâm o͘h?

4Góa chhin-ài--ê tùi mn̂g-phāng chhun-chhiú ji̍p--lâi;

góa ê sim ūi-tio̍h i kek-tōng.

5Góa khí--lâi, beh kā góa chhin-ài--ê khui-mn̂g;

bu̍t-io̍h tùi góa ê siang-chhiú tih--lo̍h-khì,

tùi chńg-thâu-á tih lo̍h-khì mn̂g-chhòaⁿ.

6Góa kā góa chhin-ài--ê khui-mn̂g;

m̄-kú góa só͘ ài--ê í-keng oa̍t-tńg-sin khì ah.

I tú-chiah kóng ê ōe, hō͘ góa sîn-put-hū-thé.

Góa chhē i, chhē bô; góa kiò i, i bô ìn.

7Siâⁿ-lāi sûn-lô ê lâng tú-tio̍h góa,

phah góa, siong góa;

kò͘ siâⁿ-chhiûⁿ ê lâng chiong góa moa seng-khu ê kun chhiúⁿ--khì.

8 Iâ-lō͘-sat-léng ê cha-bó͘ gín-á ah, góa pài-thok lín,

lín nā tú-tio̍h góa chhin-ài--ê, tio̍h kā i kóng:

Góa in-ūi ài-chêng tì-pīⁿ.

(Iâ-lō͘-sat-léng ê Cha-bó͘ Gín-á)

9Lí chit-ê cha-bó͘ gín-á tiong siōng-súi--ê ah,

lí chhin-ài--ê, pí pa̍t-lâng chhin-ài--ê ū sím-mi̍h khah hó?

Lí chhin-ài--ê, pí pa̍t-lâng chhin-ài--ê ū sím-mi̍h khah hó,

ta̍t-tit goán tah-èng lí ê iau-kiû?

(Lú)

10Góa chhin-ài--ê eng-chùn koh ióng-chòng,

sī bān-lâng tiong ê tē-it.

11I ê thâu-khak ná sûn-kim;

i ê thâu-mn̂g ām koh khiû, o͘ chhin-chhiūⁿ o͘-a.

12I ê ba̍k-chiu chhin-chhiūⁿ hioh tī khoe-piⁿ ê hún-chiáu,

ēng lin sóe--kè, chhin-chhiūⁿ pó-chio̍h an-tì hó-sè.

13I ê chhùi-phóe chhin-chhiūⁿ hoe-hn̂g chhèng-chhut phang-bī;

i ê chhùi-tûn chhin-chhiūⁿ pek-ha̍p-hoe, tih-lo̍h chin phang ê bu̍t-io̍h.

14I ê siang-chhiú chhin-chhiūⁿ kim ê koáiⁿ siuⁿ chhiⁿ-ge̍k;

i ê seng-khu chhin-chhiūⁿ kng-ku̍t ê chhiūⁿ-gê siuⁿ nâ-pó-chio̍h.

15I ê siang-kha chhin-chhiūⁿ tāi-lí-chio̍h ê thiāu, an-tì tī sûn-kim ê chō;

i ê thé-keh hiông-úi chhin-chhiūⁿ Lê-pa-lūn,

súi chhin-chhiūⁿ pek-hiuⁿ-chhiū.

16I ê chhùi chin tiⁿ, lâng-lâng ì-ài.

Iâ-lō͘-sat-léng ê cha-bó͘ gín-á ah,

i chiū-sī góa chhin-ài--ê, sī góa ê ài-jîn.

Ngá-ko 5 - 現代台語譯本羅馬字版(TTVR)-闽南语

Learn More About Us