Chim-giân 25

Chim-giân 25 - 現代台語譯本羅馬字版(TTVR)-闽南语

1Ē-bīn mā-sī Só͘-lô-bûn ê chim-giân, sī Iû-tāi-ông Hi-se-ka kiong-têng ê lâng chhau-siá--ê.

2Lâng chun-chông Siōng-tè, in-ūi I chiong tāi-chì khàm-ba̍t;

lâng chun-kèng kun-ông, in-ūi i chiong tāi-chì chhâ-bêng.

3Chhin-chhiūⁿ thiⁿ hiah-ni̍h koân, tōe hiah-ni̍h chhim,

ông ê sim, lâng oh-tit liáu-kái.

4Gûn ê che-tái seng tû--khì,

gûn-chhiūⁿ chiah ōe-tàng chòe-chhut súi ê khì-khū;

5ông sin-piⁿ ê pháiⁿ-lâng seng tû--khì,

ông-ūi chiah ōe-tàng ēng kong-gī chòe ki-chhó͘ kiàn-li̍p.

6M̄-thang tī ông ê bīn-chêng chū-ko chū-tāi,

mā m̄-thang chiàm tōa-ūi.

7Lêng-khó tán lâng chhiáⁿ lí chē tōa-ūi,

m̄-thang tī ū tōe-ūi ê lâng bīn-chêng hō͘ lâng kiò lí lo̍h--khì.

8M̄-thang chhong-pōng beh kap lâng sio-kò,

chiah bián kàu-bé siū chhù-piⁿ lêng-jio̍k ê sî m̄ chai beh án-chóaⁿ chòe.

9Lí kap chhù-piⁿ ū kiù-hun,

m̄-thang lāu-sia̍p pa̍t-lâng ê pì-bi̍t,

10chiah bián thiaⁿ--kìⁿ ê lâng chek-pī lí,

lí ê chhàu-miâ oh-tit sóe-chheng.

11Kóng-ōe ha̍p-gî,

chhin-chhiūⁿ kim phōng-kó siuⁿ tī gûn-pôaⁿ.

12Tì-hūi ê lâng ê chek-pī, tùi hoaⁿ-hí thiaⁿ-siū ê lâng

chhin-chhiūⁿ kim ê hī-kau kap sûn-kim ê phoa̍h-liān.

13Khó-khò ê sù-chiá hō͘ chhe i ê chú-lâng cheng-sîn khin-sang,

chhin-chhiūⁿ joa̍h-thiⁿ siu-koah ê sî ū sng-seh ê liâng-léng.

14Bô sàng lé-mi̍h, kan-ta khoa-kháu lé-mi̍h jōa hó,

chhin-chhiūⁿ ū hong ū hûn, bô lo̍h-hō͘.

15Kú-tn̂g jím-nāi, koân-le̍k-chiá mā ōe siū kám-tōng;

un-jiû ê chhùi-chi̍h ōe kòng-tn̄g kut-thâu.

16Lí nā chhē-tio̍h bi̍t, chia̍h kàu-gia̍h chiū hó,

chiah bián chia̍h kè-thâu soah thò͘--chhut-lâi.

17M̄-thang chia̍p-chia̍p khì chhē chhù-piⁿ,

chiah bián i khí-hoân soah iàm-ò͘ⁿ lí.

18Choh gūi-chèng hām-hāi chhù-piⁿ ê lâng,

chhin-chhiūⁿ thûi, to, kap lāi-chìⁿ ōe siong-hāi lâng.

19Hoān-lān ê sî sìn-nāi khò-put-chū ê lâng,

chhin-chhiūⁿ chhùi-khí tn̄g--khì, kha thu̍t-lûn.

20Tùi siong-sim ê lâng chhiùⁿ-koa,

chhin-chhiūⁿ tang-thiⁿ kā i thǹg gōa-saⁿ,

chhin-chhiūⁿ iâm iā tī khang-chhùi.

21Lí ê tùi-te̍k nā iau, tio̍h hō͘ i chia̍h,

chhùi-ta, tio̍h hō͘ i lim;

22in-ūi lí án-ni chòe, ná-chún chiong teh to̍h ê hé-thòaⁿ thia̍p tī i ê thâu-khak téng, hō͘ i bīn âng chai thang kiàn-siàu;

Siōng Chú mā ōe pò-siúⁿ lí.

23Pak-hong thàu chiū lo̍h-hō͘;

húi-pòng ê chi̍h ōe jiá lâng pìⁿ-bīn.

24Lêng-khó tiàm chhù-téng ê kak-thâu,

mā m̄ kap chháu-nāu ê hū-jîn-lâng chòe-hé tòa tōa keng chhù.

25Thiaⁿ-tio̍h hó siau-sit tùi hn̄g-hn̄g lâi,

chhin-chhiūⁿ ià-siān chhùi-ta ê lâng lim-tio̍h liâng-chúi.

26Gī-lâng tī pháiⁿ-lâng ê bīn-chêng khut-ho̍k,

chhin-chhiūⁿ phah lâ-sâm ê chíⁿ, thún lô--khì ê chúi-chôaⁿ.

27Bi̍t chia̍h siuⁿ chōe m̄ hó;

lâng kè-thâu kiû ka-kī ê êng-kng mā m̄ hó.

28Bōe-hiáu khòng-chè ka-kī ê lâng,

chhin-chhiūⁿ bô chhiûⁿ ê siâⁿ chin kín siū kong-phòa.

Chim-giân 25 - 現代台語譯本羅馬字版(TTVR)-闽南语

Learn More About Us