Si-phian 14 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ.Lâng ê Siâ-ok(Si 53)

1Gōng-lâng sim-lāi kóng, “Bô Siōng-tè!”

In lóng hú-pāi, chòe khó-ò͘ⁿ ê tāi-chì,

bô kah chi̍t ê chòe hó.

2Siōng Chú tùi thiⁿ àⁿ lo̍h-lâi khòaⁿ sè-kan-lâng,

beh khòaⁿ ū bêng-lí, ū chhē-kiû Siōng-tè ê lâng á bô.

3In lóng kiâⁿ bê-lō͘, pîⁿ-pîⁿ pìⁿ-chòe ù-òe;

bô lâng chòe hó, liân chi̍t ê to bô.

4Chòe pháiⁿ ê lâng kiám lóng m̄ chai?

In thun-chia̍h góa ê chú-bîn chhin-chhiūⁿ teh chia̍h-pn̄g;

in bô kiû-kiò Siōng Chú.

5Chòe pháiⁿ ê lâng ōe tōa kiaⁿ-hiâⁿ;

in-ūi Siōng-tè tī gī-lâng ê tiong-kan.

6Sàn-chhiah-lâng ê kè-ōe, lín hō͘ in sit-pāi,

m̄-kú Siōng Chú sī in ê pī-lān-só͘.

7Goān Í-sek-lia̍t ê chín-kiù tùi Sek-an chhut!

Goān Siōng Chú chhōa I siū-lia̍h ê chú-bîn tò-tńg--lâi!

Hit-sî, Í-sek-lia̍t ōe hoaⁿ-hí,

Ngá-kok ōe khoài-lo̍k!

Learn More About Us