Thoân-tō-su 8

Thoân-tō-su 8 - 現代台語譯本羅馬字版(TTVR)-闽南语

1Siáⁿ-lâng chin-chiàⁿ ū tì-hūi? Siáⁿ-lâng ōe-hiáu kái-sek tāi-chì? Lâng ê tì-hūi hō͘ i ê bīn ū kong-chhái, mā hō͘ i hiong-ok ê bīn kái-piàn.

Siú Ông ê Bēng-lēng

2Tio̍h siú ông ê bēng-lēng, in-ūi lí ū kí Siōng-tè soan-sè.

3Tī ông ê bīn-chêng m̄-bián kiaⁿ, m̄-kú sè-bīn nā bái, tio̍h kóaⁿ-kín lī-khui; in-ūi i ài chòe sím-mi̍h chiū chòe sím-mi̍h.

4Ông ê ōe ū koân; siáⁿ-lâng káⁿ tùi i kóng: Lí teh chhòng sím-mi̍h?

5Siú bēng-lēng ê lâng bōe tú-tio̍h chai-hō; tì-hūi ê lâng khòaⁿ chheng-chhó sî-sè, ōe-hiáu phòaⁿ-toàn.

6Sui-jiân khó͘-lān tāng-tāng teh tī lâng ê sin-chiūⁿ, m̄-kú ta̍k-hāng sū lóng ū i sek-tòng ê sî kap kiat-kio̍k.

7I m̄ chai chiong-lâi ōe hoat-seng sím-mi̍h tāi-chì; mā bô lâng ōe-tàng kā i kóng chiong-lâi ōe án-chóaⁿ.

8Bô lâng ōe-tàng chi-phòe ka-kī ê sìⁿ-miā, mā bô lâng ū koân koat-tēng i sí ê ji̍t; chit-khoán siⁿ-sí ê cheng-chat lâng bōe-tàng pī-bián, chōe-ok mā bōe-tàng kiù chòe pháiⁿ ê lâng.

Siâ-ok ê Lâng kap Chèng-ti̍t ê Lâng

9Chiah-ê góa lóng ū khòaⁿ--tio̍h, mā choan-sim chhâ-khó ji̍t-kng ê ē-bīn só͘ hoat-seng it-chhè ê tāi-chì; ū-sî chit-ê lâng koán-hat pa̍t-lâng, kiat-kó hāi-tio̍h ka-kī.

10Góa khòaⁿ-tio̍h pháiⁿ-lâng siū-tio̍h liông-tiōng ê bâi-chòng, sàng-chòng ê lâng tùi bōng-tōe tńg--lâi, í-keng bōe-kì--tit hit-ê lâng tī siâⁿ-lāi só͘ chòe ê pháiⁿ-tāi; che mā-sī khang-hu.

11Chōe tēng-liáu bô sûi-sî chip-hêng, sè-kan-lâng chiah ōe tōa-táⁿ chòe pháiⁿ.

12Chōe-jîn chòe pháiⁿ chi̍t-pah piàn, iáu-kú chia̍h tn̂g-hè-siū, m̄-kú góa khak-si̍t chai, kiaⁿ-ùi Siōng-tè ê lâng, in-ūi sim chûn kèng-ùi, chòe-āu ōe tit-tio̍h hok-khì.

13Chóng-sī pháiⁿ-lâng bōe tit-tio̍h hok-khì, chhin-chhiūⁿ iáⁿ chin kín chiū bô--khì, in-ūi i bô kèng-ùi Siōng-tè.

14Tī sè-kan koh ū chi̍t hāng khang-hu ê tāi-chì, chiū-sī gī-lâng tú-tio̍h pháiⁿ-lâng kai siū ê pò-èng, pháiⁿ-lâng tit-tio̍h gī-lâng èng-tit ê pò-siúⁿ; góa kóng: Che mā-sī khang-hu.

15Só͘-í góa kó͘-lē lâng hióng-siū khoài-lo̍k. In-ūi lâng tī ji̍t-kng ê ē-bīn ia̍h-chia̍h-ia̍h-lim sī siōng-tōa ê hióng-lo̍k. Che sī Siōng-tè hō͘ lâng tī ji̍t-kng ê ē-bīn phah-piàⁿ eng-kai tit--tio̍h ê hióng-siū.

16Góa choan-sim tui-kiû tì-hūi koh koan-chhat sè-kan só͘ hoat-seng ê tāi-chì, sīm-chì mî-ji̍t lóng bô khùn.

17Góa ū khòaⁿ-kìⁿ Siōng-tè it-chhè ê chok-ûi, tī ji̍t-kng ê ē-bīn só͘ hoat-seng ê tāi-chì, lâng lóng chhē bōe tio̍h hoat-seng ê lí-iû; lâng bô-lūn án-chóaⁿ chhiau-chhē to chhē bōe tio̍h; liân ū tì-hūi ê lâng, sui-jiân siūⁿ-kóng i chai, mā chhē bōe tio̍h.

Thoân-tō-su 8 - 現代台語譯本羅馬字版(TTVR)-闽南语

Learn More About Us