Si-phian 29 - 現代台語譯本羅馬字版(TTVR)-闽南语

Tāi-pi̍t ê si.Siōng Chú Chiáng-koán Tāi-chū-jiân

1Thian-kài tāi-lêng-chiá ê chèng kiáⁿ-jî ah,

tio̍h chiong Siōng Chú èng-ū ê êng-kng koân-lêng kui hō͘ I.

Tio̍h kui hō͘ I!

2Tio̍h chiong Siōng Chú ê miâ èng-ū ê êng-kng kui hō͘ I,

chûn sèng-kiat ê sim kèng-pài Siōng Chú.

3Siōng Chú ê siaⁿ tī chúi-bīn teh hiáng;

êng-kng ê Siōng-tè khí-lûi tōa tân.

Siōng Chú lîm-chāi tī hái-iûⁿ téng-bīn.

4Siōng Chú ê siaⁿ ū tōa khùi-la̍t;

Siōng Chú ê siaⁿ ui-giâm móa-móa.

5Siōng Chú ê siaⁿ phah-chi̍h pek-hiuⁿ-chhiū;

Siōng Chú phah-chhùi Lê-pa-lūn ê pek-hiuⁿ-chhiū.

6I hō͘ Lê-pa-lūn tiô-thiàu chhin-chhiūⁿ gû-á-kiáⁿ,

hō͘ Hek-bûn-soaⁿ tiô-thiàu chhin-chhiūⁿ iá-gû-á-kiáⁿ.

7Siōng Chú ê siaⁿ hō͘ sih-nà siám-iāu.

8Siōng Chú ê siaⁿ hō͘ khòng-iá iô-tāng;

Siōng Chú hō͘ Ka-te-su ê khòng-iá tōa tín-tāng.

9Siōng Chú ê siaⁿ hō͘ lo̍k-bú tio̍h-kiaⁿ seng-sán,

hō͘ chhiū-nâ ê chhiū-hio̍h lak kah kng-kng-kng.

Só͘-ū tī I tiān-lāi ê lâng lóng hoah kóng, “Êng-kng kui Siōng Chú!”

10Siōng Chú siat pó-chō tī tōa-chúi téng-bīn;

Siōng Chú choh-ông kàu éng-oán.

11Siōng Chú sù khùi-la̍t hō͘ I ê chú-bîn;

Siōng Chú sù pêng-an hō͘ I ê chú-bîn.

Learn More About Us