Si-phian 112 - 現代台語譯本羅馬字版(TTVR)-闽南语

Kèng-ùi Siōng-tè ê Lâng Ū Hok-khì

1Ha-lé-lú-iah, chheng-chàn Siōng Chú!

Kèng-ùi Siōng Chú, chhim-chhim ì-ài I kài-bēng--ê,

chit-khoán lâng chin ū hok-khì!

2In ê kiáⁿ-sun tī Í-sek-lia̍t-tōe it-tēng kiông-sēng;

chèng-ti̍t ê lâng ê hō͘-tāi it-tēng siū chiok-hok.

3In ê ke-lāi chhiong-móa châi-hù;

in ê hó hêng-ûi chûn kàu éng-oán.

4Chèng-ti̍t ê lâng tī o͘-àm tiong ū kng teh chiò in;

in ū un-hūi, ū lîn-bín, ū kong-gī.

5Khóng-khài chioh--lâng koh kong-chèng chhú-lí ka-kī ê tāi-chì--ê,

chit-khoán lâng sū-sū sūn-lī.

6Gī-lâng choa̍t-tùi bōe sit-pāi;

in éng-oán hō͘ lâng siàu-liām.

7Pháiⁿ siau-sit, in lóng m̄ kiaⁿ,

in-ūi sim kian-tēng, óa-khò Siōng Chú.

8In ê sim chū-chāi, lóng bōe kiaⁿ-hiâⁿ,

chòe-āu ōe khòaⁿ-tio̍h tùi-te̍k hō͘ Siōng Chú phah-pāi.

9In khóng-khài chín-chè sàn-chhiah-lâng;

in ê hó hêng-ûi chûn kàu éng-oán.

In ê thâu ōe-tàng gia̍h-koân, siū lâng chun-kèng.

10Pháiⁿ-lâng khòaⁿ-liáu tōa siū-khì,

kā-gê-chhiat-chhí, ǹg-bāng lóng bô--khì.

Pháiⁿ-lâng ê sim-goān lóng lo̍k-khong.

Learn More About Us