Iâ-lī-bí-su 24

Iâ-lī-bí-su 24 - 現代台語譯本羅馬字版(TTVR)-闽南语

Nn̄g Láng Bû-hoa-kó

1 Pa-pí-lûn-ông Nî-pò͘-kah-nî-sat tùi Iâ-lō͘-sat-léng chiong Iok-ngá-kèng ê kiáⁿ Iû-tāi-ông Iok-ngá-kun, í-ki̍p Iû-tāi-kok ê koaⁿ-oân, choh-kang sai-hū kap phah-thih sai-hū lóng lia̍h-khì Pa-pí-lûn. Chit-ê tāi-chì í-āu, Siōng Chú hō͘ góa khòaⁿ-kìⁿ tī Siōng Chú sèng-tiān thâu-chêng ū nn̄g láng bû-hoa-kó:

2Chi̍t láng chin súi chhin-chhiūⁿ chho͘-se̍k ê bû-hoa-kó, chi̍t láng chin bái, bái kah bōe-chia̍h--tit ê bû-hoa-kó.

3Siōng Chú mn̄g góa, “Iâ-lī-bí, lí ū khòaⁿ-kìⁿ sím-mi̍h?”

Góa ìn kóng, “Góa ū khòaⁿ-kìⁿ bû-hoa-kó; hó--ê chin hó, bái--ê chin bái, bái kah bōe-chia̍h--tit”.

4Siōng Chú koh tùi góa kóng,

5“Góa Siōng Chú — Í-sek-lia̍t ê Siōng-tè beh chiong hiah-ê tùi chit-tè thó͘-tōe liû-hòng khì Pa-pí-lûn ê Iû-tāi-lâng, tòng-chòe hó ê bû-hoa-kó hó khoán-thāi in.

6Góa beh khòaⁿ-kò͘ in, sù-hok in, chhōa in tńg-lâi chit-tè thó͘-tōe. Góa beh kā in tiông-kiàn, bōe kā in thiah-húi; góa beh kā in chai-chèng, bōe kā in pu̍ih-chhut.

7Góa beh sù in chi̍t lia̍p jīn-bat góa ê sim, sêng-jīn góa sī Siōng Chú. In beh chòe góa ê chú-bîn, góa beh chòe in ê Siōng-tè, in-ūi in beh it-sim-it-ì kui-ǹg góa.”

8Siōng Chú koh kóng, “Iû-tāi-ông Se-tí-ka kap i ê koaⁿ-oân, chhun--lo̍h-lâi lâu tī chit-tè thó͘-tōe ê Iâ-lō͘-sat-léng jîn-bîn, í-ki̍p tòa tī Ai-ki̍p ê Iû-tāi-lâng, góa beh kā in tòng-chòe bái kah bōe-chia̍h--tit ê bû-hoa-kó.

9Góa beh hō͘ in tú-tio̍h tōa chai-lān, hō͘ thiⁿ-ē bān-kok ê lâng khòaⁿ-liáu lóng kiaⁿ-hiâⁿ thó-ià in; góa beh hō͘ in tī liû-hòng--khì ê ta̍k só͘-chāi, hō͘ lâng bú-jio̍k, thí-chhiò, hì-lāng, koh siū chiù-chó͘.

10Góa beh ēng chiàn-loān, ki-hng, kap un-e̍k tû-bia̍t in, hō͘ in tùi góa siúⁿ-sù in kap in lia̍t-chó͘ ê chit-tè thó͘-tōe siau-sit.”

Iâ-lī-bí-su 24 - 現代台語譯本羅馬字版(TTVR)-闽南语

Learn More About Us