Í-su-la-kì 6

Í-su-la-kì 6 - 現代台語譯本羅馬字版(TTVR)-闽南语

Hoat-kiàn Sài-ló͘-sū-ông ê Chiàu-su

1 Tāi-liû-sū-ông chiū kàng-chí, khì Pa-pí-lûn ê hú-khò͘ tiàu-oa̍t hông-ka kì-lio̍k.

2Tī Bí-tí-a-séng A-má-tha-siâⁿ ê kiong-lāi, chhē-tio̍h chi̍t kńg kó͘-koàn, lāi-bīn án-ni kì-chài:

3 Sài-ló͘-sū-ông goân-nî, ông ūi Iâ-lō͘-sat-léng Siōng-tè ê sèng-tiān kàng-chí: Tio̍h tiông-kiàn chit-keng tiān chòe hiàn-chè ê só͘-chāi, hē kian-kò͘ ê tōe-ki, tiān koân jī-cha̍p-chhit kong-chhioh, khoah mā jī-cha̍p-chhit kong-chhioh;

4ēng tōa chio̍h saⁿ chàn, bo̍k-châi chi̍t chàn; keng-hùi iû ông-ka chi-hù.

5Í-chêng Nî-pò͘-kah-nî-sat tùi Iâ-lō͘-sat-léng Siōng-tè ê sèng-tiān chhiúⁿ--khì, hē tī Pa-pí-lûn hiah-ê kim gûn ê khì-khū, tio̍h tòa tńg-khì Iâ-lō͘-sat-léng, chiàu goân-ūi hē tī Siōng-tè ê sèng-tiān.

Tāi-liû-sū-ông Hā-lēng Kè-sio̍k Khí Sèng-tiān

6Tùi án-ni, Tāi-liû-sū-ông hā-lēng:

Hô-se-séng chóng-tok Ta̍t-nái, kap Sī-tha Pho-su-nái, í-ki̍p Hô-se-séng ê koaⁿ-oân, lín m̄-thang kan-sia̍p in,

7m̄-thang chó͘-tòng Siōng-tè sèng-tiān ê kang-thêng, tio̍h hō͘ Iû-tāi séng-tiúⁿ kap tiúⁿ-ló kè-sio̍k tī goân-ūi tiông-kiàn Siōng-tè ê sèng-tiān.

8Góa bēng-lēng lín tio̍h pang-chān Iû-tāi ê tiúⁿ-ló tiông-kiàn Siōng-tè ê sèng-tiān; tùi ông ê hú-khò͘, Hô-se-séng ê sè-siu tiong poah chhiong-chiok ê keng-hùi hō͘ hiah-ê lâng, chiah bián kang-sū thêng-chí.

9In ǹg thiⁿ-téng ê Siōng-tè hiàn sio-hòa-chè só͘ su-iàu ê gû-káng-á, mî-iûⁿ-káng, iûⁿ-ko, í-ki̍p sió-be̍h, iâm, chiú, iû, lóng tio̍h chiàu Iâ-lō͘-sat-léng ê chè-si só͘ kóng--ê, ta̍k-ji̍t kiong-kip hō͘ in, m̄-thang sit-gō͘;

10thang hō͘ in hiàn phang-phang ê chè-mi̍h hō͘ thiⁿ-téng ê Siōng-tè; koh ūi-tio̍h ông kap ông ê kiáⁿ-jî-sun tn̂g-hè-siū kî-tó.

11Góa koh kàng-chí, nā ū lâng kái-piàn chit-ê bēng-lēng, chiū beh tùi i ê chhù thiah chi̍t ki niû, chiong i tèng tī hit téng-bīn, kòa--khí-lâi, hō͘ i ê chhù ūi-tio̍h án-ni pìⁿ-chòe pùn-sò-tui.

12Nā ū kun-ông kap jîn-bîn kái-piàn chit-ê bēng-lēng, húi-hoāi chit-keng Siōng-tè ê sèng-tiān, goān kéng-soán Iâ-lō͘-sat-léng hō͘ lâng lâi kèng-pài I ê hit-ūi Siōng-tè siau-bia̍t in. Góa Tāi-liû-sū chhut chit-ê bēng-lēng, tio̍h khak-si̍t chun-hêng.

Hōng-hiàn Sèng-tiān

13Tùi án-ni, Hô-se-séng chóng-tok Ta̍t-nái, kap Sī-tha Pho-su-nái, í-ki̍p in ê tông-sū, chiū khak-si̍t chun-hêng Tāi-liû-sū-ông ê bēng-lēng.

14Iû-tāi ê tiúⁿ-ló in-ūi sian-ti Hap-kai kap E̍k-to ê sun Sat-ka-lī-a só͘ thoân-ta̍t Siōng-tè ê ōe, chiū tio̍k-chhiú tiông-kiàn, kang-thêng chìn-hêng sūn-lī. In chun-thàn Í-sek-lia̍t Siōng-tè ê bēng-lēng, kap Pho-su hông-tè Sài-ló͘-sū, Tāi-liû-sū, kap A-ta̍t-sih-se ê bēng-lēng, oân-sêng tiông-kiàn.

15Tāi-liû-sū-ông chē-ūi tē-la̍k nî, A-ta̍t-ge̍h chhoe-saⁿ, chit-keng sèng-tiān oân-kang.

16 Í-sek-lia̍t-lâng, chè-si kap Lī-bī-lâng, í-ki̍p kî-tha liû-bông tò--lâi ê lâng, lóng hoaⁿ-hoaⁿ-hí-hí kú-hêng hōng-hiàn Siōng-tè sèng-tiān ê khèng-tián.

17Ūi-tio̍h hōng-hiàn Siōng-tè ê sèng-tiān, in hiàn gû-káng chi̍t-pah chiah, mî-iûⁿ-káng nn̄g-pah chiah, iûⁿ-ko sì-pah chiah. In koh chiàu Í-sek-lia̍t chi-cho̍k ê sò͘-bo̍k, hiàn soaⁿ-iûⁿ-káng cha̍p-jī chiah chòe Í-sek-lia̍t chèng-lâng ê sio̍k-chōe-chè.

18In chiàu Mô͘-se ê chheh ê kì-chài, phài chè-si chiàu in ê cho͘-pia̍t, Lī-bī-lâng chiàu in ê pan-chhù, tī Iâ-lō͘-sat-léng ho̍k-sāi Siōng-tè.

Siú Pôaⁿ-kè-choeh

19Chiaⁿ-ge̍h cha̍p-sì, liû-bông tò--lâi ê lâng siú Pôaⁿ-kè-choeh.

20Chè-si kap Lī-bī-lâng lóng kiat-chēng ka-kī; ta̍k-ê lâng tī lé-gî-siōng lóng chheng-khì, chiū ūi-tio̍h liû-bông tò--lâi ê lâng, kap in ê chhin-cho̍k chèng chè-si, mā ūi-tio̍h ka-kī thâi Pôaⁿ-kè-choeh ê iûⁿ-ko.

21Liû-bông tò--lâi ê Í-sek-lia̍t-lâng, í-ki̍p lī-khui īⁿ-kàu kui-óa Í-sek-lia̍t-lâng, kèng-pài Siōng Chú — Í-sek-lia̍t ê Siōng-tè hiah-ê lâng, lóng chia̍h Pôaⁿ-kè-choeh ê iûⁿ-ko.

22In hoaⁿ-hoaⁿ-hí-hí siú Tû-kàⁿ-choeh chhit ji̍t; in chiah-ni̍h hoaⁿ-hí, sī in-ūi Siōng Chú hō͘ A-su̍t-ông ê sim tùi in iú-siān, chi-chhî in tiông-kiàn Í-sek-lia̍t Siōng-tè ê sèng-tiān.

Í-su-la-kì 6 - 現代台語譯本羅馬字版(TTVR)-闽南语

Learn More About Us