Sin-bēng-kì 18

Sin-bēng-kì 18 - 現代台語譯本羅馬字版(TTVR)-闽南语

Chè-si kap Lī-bī-lâng Èng-tit ê Hūn-gia̍h

1 Lī-bī-lâng chòe chè-si--ê, kap choân Lī-bī chi-cho̍k, tī Í-sek-lia̍t-lâng ê tiong-kan bô pun-tio̍h sán-gia̍p; in thang chia̍h ēng hé sio hiàn hō͘ Siōng Chú ê chè-mi̍h, chiah-ê sī in ê hūn-gia̍h.

2In tī in ê tông-pau tiong-kan bô pun-tio̍h sán-gia̍p; chiàu Siōng Chú tùi in ê èng-ún, Siōng Chú chiū-sī in ê sán-gia̍p.

3Ē-bīn sī chè-si tùi jîn-bîn eng-kai tit--tio̍h ê hūn-gia̍h: Lâng hiàn gû iûⁿ chòe chè-mi̍h, tio̍h chiong chêng-thúi, nn̄g ê chhùi-phóe, kap tō͘, hō͘ chè-si.

4Khí-thâu siu-sêng ê ngó͘-kok, sin-chiú, sin-iû, kap tú-tú chián ê iûⁿ-mn̂g, mā lóng tio̍h hō͘ in.

5In-ūi Siōng Chú — lín ê Siōng-tè tùi lín ê chi-cho̍k tiong-kan kéng-soán in, hō͘ in kap in ê hō͘-tāi, hōng Siōng Chú ê miâ éng-oán khiā tī I ê bīn-chêng sū-hōng.

6Nā ū Lī-bī-lâng, bô-lūn in tòa tī Í-sek-lia̍t kéng-lāi tó chi̍t chō siâⁿ, it-sim-it-ì beh lī-khui hia khì Siōng Chú kéng-soán ê só͘-chāi ho̍k-sāi,

7in thang chhin-chhiūⁿ kâng chong-cho̍k ê hiaⁿ-tī, hōng Siōng Chú — in ê Siōng-tè ê miâ khiā tī I ê bīn-chêng sū-hōng.

8Tû-liáu bōe chó͘-sán tit--tio̍h-ê í-gōa, in iû-goân thang tit-tio̍h kâng-khoán hūn-gia̍h ê chè-mi̍h.

M̄-thang Tè Gōa-cho̍k-lâng ê Hong-sio̍k

9Lín nā chìn-ji̍p Siōng Chú — lín ê Siōng-tè siúⁿ-sù lín ê tōe, m̄-thang o̍h hiah-ê bîn-cho̍k khó-ò͘ⁿ ê hong-sio̍k.

10Lín m̄-thang sio ka-kī ê kiáⁿ cha-bó͘-kiáⁿ hiàn-chòe chè, kiâⁿ siâ-su̍t, pok-kòa, khòaⁿ-miā, chòe sai-kong,

11ōe-hû, chòe tâng-ki, chòe toh-thâu, khan-bông;

12só͘-ū chòe chiah-ê sū ê lâng, lóng sī Siōng Chú só͘ iàm-ò͘ⁿ; hiah-ê bîn-cho̍k in-ūi chòe chiah-ê sū, Siōng Chú — lín ê Siōng-tè tùi lín ê bīn-chêng kā in kóaⁿ-cháu.

13Lín tio̍h tī Siōng Chú — lín ê Siōng-tè bīn-chêng, chòe bô hâ-chhû ê lâng.

Èng-ún Heng-khí Chi̍t Ê Sian-ti

14Lín só͘ beh kóaⁿ-chhut hiah-ê kok ê jîn-bîn, lóng thiaⁿ-thàn pok-kòa--ê, kiâⁿ siâ-su̍t--ê; lín leh, Siōng Chú — lín ê Siōng-tè kìm-chí lín án-ni chòe.

15Siōng Chú — lín ê Siōng-tè beh tùi lín ê tông-pau tiong-kan, heng-khí chi̍t ê chhin-chhiūⁿ góa ê sian-ti, lín tio̍h thiaⁿ-thàn i.

16Lín tī Hô-lia̍t-soaⁿ chū-hōe ê sî, tùi Siōng Chú — lín ê Siōng-tè khún-kiû, kóng, “M̄-thang hō͘ goán koh thiaⁿ-kìⁿ Siōng Chú — goán ê Siōng-tè ê siaⁿ, mā m̄-thang hō͘ goán koh khòaⁿ-kìⁿ Siōng Chú tī hé-iām tiong hián-hiān, chiah bián goán lóng sí.”

17Siōng Chú chiū tùi góa kóng, “In kóng-liáu chin tio̍h.

18Góa beh tī in tông-pau tiong-kan, heng-khí chi̍t ê chhin-chhiūⁿ lí ê sian-ti. Góa beh chiong góa ê ōe kau-tài i; i beh chiong góa ê bēng-lēng thoân-ta̍t hō͘ jîn-bîn.

19I hōng góa ê miâ thoân-ta̍t ê ōe, lâng nā m̄ thiaⁿ, góa beh kā in hêng-hoa̍t.

20M̄-kú sian-ti nā tōa-chú-tōa-ì ēng góa ê miâ kóng góa bô bēng-lēng i kóng ê ōe, á-sī hōng pa̍t-ê sîn-bêng ê miâ kóng-ōe, hit-ê sian-ti tio̍h sí.”

21Lín khó-lêng ōe siūⁿ, “Goán ná ōe chai, chit-ê sian-ti kóng ê ōe m̄-sī Siōng Chú só͘ kau-tài--ê?”

22Sian-ti hōng Siōng Chú ê miâ thoân-ta̍t ê ōe, nā bô si̍t-hiān, bô èng-giām, che chiū m̄-sī Siōng Chú ê ōe, sī hit-ê sian-ti tōa-chú-tōa-ì kóng--ê, lín m̄-bián kiaⁿ i.

Sin-bēng-kì 18 - 現代台語譯本羅馬字版(TTVR)-闽南语

Learn More About Us