Bîn-sò͘-kì 26

Bîn-sò͘-kì 26 - 現代台語譯本羅馬字版(TTVR)-闽南语

Tē-jī Piàn Hō͘-kháu-phó͘-cha

1Un-e̍k kè-liáu, Siōng Chú bēng-lēng Mô͘-se kap chè-si A-lûn ê kiáⁿ Í-lī-a-sat kóng,

2“Tio̍h chiong Í-sek-lia̍t choân-thé hōe-chiòng tiong-kan, jī-cha̍p hè í-siōng, ōe-tàng chhut-khì kau-chiàn ê ta-po͘-lâng, chiàu in ê chong-cho̍k tiám-sǹg chóng-sò͘.”

3-4Mô͘-se kap chè-si Í-lī-a-sat chiū chiàu Siōng Chú ê bēng-lēng, tī Iâ-lī-ko tùi-bīn, Iok-tàn hô-piⁿ ê Mô͘-ap pêng-goân, tùi Í-sek-lia̍t-lâng soan-pò͘: Lín tio̍h tiám-sǹg jī-cha̍p hè í-siōng ê ta-po͘-lâng ê jîn-sò͘.

Tùi Ai-ki̍p chhut--lâi ê Í-sek-lia̍t-lâng ū:

5 Í-sek-lia̍t ê tōa-kiáⁿ sī Lū-piān; Lū-piān ê hō͘-tāi ū Í-lo̍k, Hoat-lō͘,

6Hi-su-lûn, kap Ka-bí chiah-ê chong-cho̍k.

7In keng-kè tiám-sǹg ê jîn-sò͘ ū sì-bān saⁿ-chheng chhit-pah saⁿ-cha̍p miâ.

8Hoat-lō͘ ê hō͘-tāi ū Í-lī-ap;

9Í-lī-ap siⁿ Nî-bō͘-lī, Tāi-tan, kap A-pí-lân; Tāi-tan kap A-pí-lân sī hōe-chiòng soán-chhut ê léng-siù; Khó-la hit-tīn lâng hoán-khòng Siōng Chú ê sî, in mā chham-ú kong-kek Mô͘-se kap A-lûn.

10Hit-sî tōe li̍h--khui, chiong in kap Khó-la thun-bia̍t; koh ū hé sio-sí nn̄g-pah gō͘-cha̍p ê lâng; in chiâⁿ-chòe jîn-bîn ê kéng-kài.

11M̄-kú Khó-la hiah-ê kiáⁿ bô sí.

12 Se-biān ê hō͘-tāi ū Nî-bō͘-lī, Ngá-bín, Ngá-kun,

13Siā-la, kap Sò-lô chiah-ê chong-cho̍k,

14kiōng nn̄g-bān nn̄g-chheng nn̄g-pah miâ.

15 Ka-tek ê hō͘-tāi ū Sé-hun, Hap-ki, Su-nî,

16A-su-nî, Í-lī,

17A-lu̍t, kap A-lia̍t-lī chiah-ê chong-cho̍k.

18In keng-kè tiám-sǹg ê jîn-sò͘ kiōng sì-bān khòng gō͘-pah miâ.

19 Iû-tāi ê kiáⁿ tiong-kan, Ní kap Gô-lâm sí tī Ka-lâm-tōe.

20Iû-tāi kî-tha ê hō͘-tāi ū Sī-la, Hoat-le̍k-su, kap Siā-la chiah-ê chong-cho̍k.

21Hoat-le̍k-su ê hō͘-tāi ū Hi-su-lûn kap Hap-bō͘-le̍k chiah-ê ka-cho̍k.

22Chiah-ê sī Iû-tāi ê chong-cho̍k; in keng-kè tiám-sǹg ê jîn-sò͘ kiōng chhit-bān la̍k-chheng gō͘-pah miâ.

23 Í-sat-ka ê hō͘-tāi ū Tô-la, Phó͘-óa,

24Ngá-su̍t, kap Sin-lûn chiah-ê chong-cho̍k.

25In keng-kè tiám-sǹg ê jîn-sò͘ kiōng la̍k-bān sì-chheng saⁿ-pah miâ.

26 Se-pò͘-lûn ê hō͘-tāi ū Se-lia̍t, Í-lûn, kap Ngá-lī chiah-ê chong-cho̍k.

27In keng-kè tiám-sǹg ê jîn-sò͘ kiōng la̍k-bān khòng gō͘-pah miâ.

28 Iok-sek ū nn̄g ê kiáⁿ Má-ná-se kap Í-hoat-liân, in chiâⁿ-chòe nn̄g ê chi-cho̍k.

29 Má-ná-se ê kiáⁿ sī Má-kiat; Má-kiat ê kiáⁿ sī Ki-lia̍t;

30Ki-lia̍t ê hō͘-tāi ū I-í-siā, Hi-le̍k,

31A-su-lia̍t, Sī-kiàm,

32Sī-bí-tāi, kap Hi-hut chiah-ê chong-cho̍k.

33Hi-hut ê kiáⁿ Se-lô-hui-hap bô kiáⁿ, chí-ū cha-bó͘-kiáⁿ, chiū-sī Má-la, Ná-a, Hat-la, Bi̍t-ka, Tek-sat.

34Chiah-ê sī Má-ná-se ê ka-cho̍k. In keng-kè tiám-sǹg ê jîn-sò͘ kiōng gō͘-bān nn̄g-chheng chhit-pah miâ.

35 Í-hoat-liân ê hō͘-tāi ū Su-thê-la, Pí-kiat, kap Tha-hán chiah-ê chong-cho̍k.

36Su-thê-la ê hō͘-tāi ū Í-lân ka-cho̍k.

37In keng-kè tiám-sǹg ê jîn-sò͘ kiōng saⁿ-bān nn̄g-chheng gō͘-pah miâ.

Chit nn̄g ê chi-cho̍k sī Iok-sek ê hō͘-tāi.

38 Piān-ngá-bín ê hō͘-tāi ū Pí-la, A-si̍t-pia̍t, A-hi-lân,

39Su-hoán, kap Hō͘-hoán chiah-ê chong-cho̍k.

40Pí-la ê hō͘-tāi ū A-le̍k kap Nái-bān nn̄g ê chong-cho̍k.

41In keng-kè tiám-sǹg ê jîn-sò͘ kiōng sì-bān gō͘-chheng la̍k-pah miâ.

42 Tān ê hō͘-tāi ū Su-hâm chong-cho̍k.

43In keng-kè tiám-sǹg ê jîn-sò͘ kiōng la̍k-bān sì-chheng sì-pah miâ.

44 A-siat ê hō͘-tāi ū Im-ná, E̍k-si-úi, kap Pí-lī-a.

45Pí-lī-a ê hō͘-tāi ū Hi-pek kap Má-kiat chiah-ê chong-cho̍k.

46A-siat ê cha-bó͘-kiáⁿ kiò-chòe Se-la.

47In keng-kè tiám-sǹg ê jîn-sò͘ kiōng gō͘-bān saⁿ-chheng sì-pah miâ.

48 Ná-hut-tha-lī ê hō͘-tāi ū Ngá-sih, Ko͘-nî,

49Iâ-sek, kap Sī-léng chiah-ê chong-cho̍k.

50In keng-kè tiám-sǹg ê jîn-sò͘ kiōng sì-bān gō͘-chheng sì-pah miâ.

51Í-siōng chiah-ê lóng sī Í-sek-lia̍t ê hō͘-tāi. In keng-kè tiám-sǹg ê jîn-sò͘ kiōng la̍k-cha̍p-bān chi̍t-chheng chhit-pah saⁿ-cha̍p miâ.

52Siōng Chú bēng-lēng Mô͘-se, kóng,

53“Lí tio̍h chiàu kok chi-cho̍k ê jîn-sò͘ pun thó͘-tōe hō͘ in chòe sán-gia̍p.

54-56Lâng chōe ê chi-cho̍k, pun khah-tōa ê thó͘-tōe, lâng chió ê chi-cho̍k, pun khah-sòe ê thó͘-tōe; ēng thiu-chhiam ê hong-sek pun hō͘ in.”

57 Lī-bī ū saⁿ ê kiáⁿ: Kek-sūn, Ko-hat, kap Bí-la-lī. Chiàu chong-cho̍k tiám-sǹg,

58Lī-bī ê hō͘-tāi ū Li̍p-nî, Hi-pek-lûn, Boat-lī, Bō͘-sī, kap Khó-la chiah-ê chong-cho̍k. Ko-hat siⁿ Àm-lân;

59Àm-lân ê bó͘ kiò-chòe Iok-ki-pia̍t, sī Lī-bī tī Ai-ki̍p siⁿ ê cha-bó͘-kiáⁿ; i tùi Àm-lân siⁿ A-lûn, Mô͘-se, kap in ê tōa-chí Bí-lī-an.

60A-lûn siⁿ Ná-tap, A-pí-hō͘, Í-lī-a-sat, Í-tha-má.

61Ná-tap kap A-pí-hō͘ tī Siōng Chú ê bīn-chêng hiàn bô sîn-sèng ê hé ê sî, sí--khì.

62Lī-bī-lâng móa-ge̍h í-siōng, keng-kè tiám-sǹg ê ta-po͘-lâng kiōng nn̄g-bān saⁿ-chheng miâ. Tī tiám-sǹg Í-sek-lia̍t-lâng ê sî, bô kā in sǹg chāi-lāi, in-ūi tī Í-sek-lia̍t-lâng tiong-kan, in bô pun-tio̍h sán-gia̍p.

63Í-siōng sī Mô͘-se kap chè-si Í-lī-a-sat tī Iâ-lī-ko tùi-bīn, Iok-tàn hô-piⁿ ê Mô͘-ap pêng-goân, tiám-sǹg ê Í-sek-lia̍t-lâng jîn-kháu.

64Mô͘-se kap chè-si A-lûn tī Se-nāi khòng-iá tē-it piàn tiám-sǹg ê Í-sek-lia̍t-lâng, hiān-chāi bô chi̍t ê oa̍h--teh.

65Koan-hē hiah-ê lâng, Siōng Chú bat kóng, “In it-tēng ōe sí tī khòng-iá.” Só͘-í, Iâ-hu-nî ê kiáⁿ Ka-le̍k, kap Lūn ê kiáⁿ Iok-su-a í-gōa, hiah-ê lâng bô chi̍t ê oa̍h--teh.

Bîn-sò͘-kì 26 - 現代台語譯本羅馬字版(TTVR)-闽南语

Learn More About Us