Chim-giân 18

Chim-giân 18 - 現代台語譯本羅馬字版(TTVR)-闽南语

1Ko͘-ta̍k ê lâng tui-kiû ka-kī ê io̍k-bōng,

pâi-thek it-chhè chin-sêng ê khoàn-kò.

2Gōng-lâng bô ài tì-sek,

chí-ū ài tián ka-kī ê ì-kiàn.

3Ū siâ-ok chiū ū biáu-sī;

ū kiàn-siàu chiū ū lêng-jio̍k.

4Lâng chhùi-lāi ê ōe chhin-chhiūⁿ chhim ê chúi;

tì-hūi ê chúi-chôaⁿ chhin-chhiūⁿ teh lâu ê khoe-chúi.

5Phòaⁿ-toàn ê sî phian-thán pháiⁿ-lâng,

á-sī oan-óng bû-ko͘ ê lâng, lóng m̄ hó.

6Gōng-lâng khui-chhùi ín-khí oan-ke,

i chi̍t-ē kóng-ōe chiū jiá-khí sio-phah.

7Gōng-lâng ê chhùi hō͘ i bia̍t-bông;

i ê chhùi-tûn sī i sìⁿ-miā ê lô-bāng.

8Hī-khang piⁿ ê êng-á-ōe chhin-chhiūⁿ hó-chia̍h-mi̍h,

chi̍t-ē ji̍p-chhùi chiū thun lo̍h-pak.

9Bô chiàu-khí-kang kang-chok ê lâng,

sī kap phò-hoāi-chiá chòe hiaⁿ-tī.

10Siōng Chú sī kian-kò͘ ê pó-lúi;

gī-lâng cháu--ji̍p-khì chiū an-ún.

11Hó-gia̍h-lâng siūⁿ-kóng châi-hù sī in ê pó-chiong,

sī an-choân khó-khò ê koân-chhiûⁿ.

12Ū kiau-ngō͘ chiū ū sit-pāi;

ū khiam-pi chiū ū chun-êng.

13Iáu-bē thiaⁿ-liáu chiū ìn-tap,

chiū-sī gû-gōng kap kiàn-siàu.

14Lâng ê sim ōe-tàng jím-siū pīⁿ-thiàⁿ;

sim-lêng phò-chhùi, bô lâng jím-siū ōe tiâu.

15Chhong-bêng-lâng ê sim tit-tio̍h tì-sek;

tì-hūi-lâng ê hī-khang chhē-kiû tì-sek.

16Lé-mi̍h kā lâng khui-lō͘,

ōe chhōa i kàu tōa-jîn-bu̍t ê bīn-chêng.

17Seng sin-sò͘--ê ká-ná ū-lí,

m̄-kú tùi-hong lâi chiū cha-chhut si̍t-chêng.

18Thiu-chhiam ōe hō͘ oan-ke soah,

ōe-tàng kái-koat kiông-chiá chi kan ê kiù-hun.

19Hō͘ kiat-oan ê hiaⁿ-tī koh hô, pí kong-chhú kian-kò͘ ê siâⁿ khah khùn-lân;

chit-khoán hun-cheng chhin-chhiūⁿ siâⁿ-mn̂g ê mn̂g-chhòaⁿ chhòaⁿ-tiâu-tiâu.

20Lâng tùi kóng-ōe só͘ kiat ê ké-chí, pak-tó͘ tit-tio̍h pá-chiok;

lâng tùi chhùi-tûn só͘ siu-sêng--ê tit-tio̍h boán-chiok.

21Chhùi-chi̍h ōe-tàng chi-phòe lâng ê siⁿ-sí;

ài lī-iōng chit-ê koân ê lâng tio̍h sêng-tam hō͘-kó.

22Chhōa-tio̍h hó bó͘ sī hok-khì,

sī Siōng Chú ê un-sù.

23Sàn-chhiah-lâng khún-chhiat kiû-chêng;

hó-gia̍h-lâng pháiⁿ-siaⁿ-sàu ìn-tap.

24Ū chin chōe pêng-iú put-kò sī choh-phōaⁿ;

ū chi̍t ê ti-kí pí hiaⁿ-tī khah chhin.

Chim-giân 18 - 現代台語譯本羅馬字版(TTVR)-闽南语

Learn More About Us