A-mô͘-sū-su 7

A-mô͘-sū-su 7 - 現代台語譯本羅馬字版(TTVR)-闽南语

Chháu-meh ê Īⁿ-siōng

1Chì-koân ê Siōng Chú hō͘ góa khòaⁿ-kìⁿ chi̍t ê kéng-siōng: Ông-ka ê lông-chok-bu̍t siu-koah liáu, koh hoat sin-íⁿ ê sî, Siōng-tè chō chi̍t kûn chháu-meh.

2Chháu-meh kā kéng-lāi ê lông-chok-bu̍t lóng chia̍h-liáu, góa chiū kóng, “Chì-koân ê Siōng Chú ah, kiû lí sià-bián; Í-sek-lia̍t bōe-tàng koh oa̍h--lo̍h-khì lah, in-ūi in bî-sòe loán-jio̍k.”

3Siōng Chú in-ūi án-ni kái-piàn sim-ì, chiū kóng, “Chit-ê sū bōe hoat-seng.”

Hé ê Īⁿ-siōng

4Chì-koân ê Siōng Chú koh hō͘ góa khòaⁿ-kìⁿ chi̍t ê kéng-siōng: Chì-koân ê Siōng Chú bēng-lēng hé lâi chhú-hoa̍t; hé kā chhim-ian sio-ta, koh sio-húi choân-tōe.

5Góa chiū kóng, “Chì-koân ê Siōng Chú ah, góa kiû lí, chhiáⁿ thêng-chí! Í-sek-lia̍t bōe-tàng koh oa̍h--lo̍h-khì lah, in-ūi in sī bî-sòe loán-jio̍k.”

6Siōng Chú in-ūi án-ni kái-piàn sim-ì. Chì-koân ê Siōng Chú chiū kóng, “Chit-ê sū mā bōe hoat-seng.”

Tūi-chîn ê Īⁿ-siōng

7I koh hō͘ góa khòaⁿ-kìⁿ chi̍t ê kéng-siōng: Chú chhiú the̍h tūi-chîn, khiā tī chiàu tūi-chîn khí ê chhiûⁿ téng-bīn.

8Siōng Chú tùi góa kóng, “A-mô͘-sū, lí khòaⁿ-kìⁿ sím-mi̍h?”

Góa ìn kóng, “Góa khòaⁿ-kìⁿ tūi-chîn.”

Chú kóng, “Góa beh ēng tūi-chîn niû góa ê chú-bîn Í-sek-lia̍t; góa bōe koh pàng in soah.

9Í-sat ê soaⁿ-thâu-tôaⁿ ōe hong-hòe, Í-sek-lia̍t ê sèng-só͘ ōe pha-hng; góa beh khí--lâi, ēng to kong-kek Iâ-lô-pho-an ông-tiâu.”

A-mô͘-sū kap A-má-siā

10 Pek-te̍k-lī ê chè-si A-má-siā phài sù-chiá khì kā Í-sek-lia̍t-ông Iâ-lô-pho-an kóng, “A-mô͘-sū tī Í-sek-lia̍t tiong-kan siàn-tōng lâng hoán-tùi lí; i ê giân-lūn tùi kok-ka put-lī.

11In-ūi i kóng, ‘Iâ-lô-pho-an ōe hō͘ lâng thâi-sí, Í-sek-lia̍t-lâng it-tēng ōe liû-bông lī-khui pún-kok.’”

12 A-má-siā koh tùi A-mô͘-sū kóng, “Lí chit-ê sian-kiàn, kā góa chhut--khì, tò-tńg-khì lín pún-kok Iû-tāi, tī hia thàn-chia̍h, tī hia kóng ū-giân.

13M̄-thang koh tī Pek-te̍k-lī kóng ū-giân; in-ūi chia ū ông ê sèng-só͘, ū ông-ka ê kiong-tiān.”

14 A-mô͘-sū ìn A-má-siā kóng, “Góa m̄-sī sian-ti, mā m̄-sī sian-ti ê tô͘-tē; góa sī chhī iûⁿ--ê, mā teh chiàu-kò͘ sng-châi-chhiū.

15Góa teh kò͘ iûⁿ-kûn ê sî, Siōng Chú ho͘-tiàu góa, kā góa kóng, ‘Lí khì, tùi góa ê chú-bîn Í-sek-lia̍t thoân-ta̍t góa ê ōe.’

16Án-ni, A-má-siā, lí tio̍h thiaⁿ Siōng Chú ê ōe. Lí kóng ‘M̄-thang thoân-ta̍t Siōng-tè ê ōe hoán-tùi Í-sek-lia̍t, m̄-thang kóng-ōe kong-kek Í-sat ê ke’,

17só͘-í, Siōng Chú án-ni kóng, ‘Lí ê bó͘ ōe tī siâⁿ-lāi chòe chhiong-ki; lí ê kiáⁿ cha-bó͘-kiáⁿ ōe sí tī to-ē; lí ê thó͘-tōe ōe hō͘ lâng hun-koah chiàm--khì; lí ka-kī ōe sí tī gōa-kok; Í-sek-lia̍t-lâng it-tēng ōe liû-bông lī-khui pún-kok.’”

A-mô͘-sū-su 7 - 現代台語譯本羅馬字版(TTVR)-闽南语

Learn More About Us