Le̍k-tāi-chì Hā-koàn 3

Le̍k-tāi-chì Hā-koàn 3 - 現代台語譯本羅馬字版(TTVR)-闽南语

Khai-sí Khí-chō Sèng-tiān(1 Ông 6.1-38)

1 Só͘-lô-bûn tī Iâ-lō͘-sat-léng ê Mô͘-lī-a-soaⁿ tāng-kang khí-chō Siōng Chú ê sèng-tiān. Chit-ê só͘-chāi chá-chêng sī Iâ-pò͘-su-lâng A-lô-ná ê ngó͘-kok-tiûⁿ; Siōng Chú bat tī chia tùi Só͘-lô-bûn ê lāu-pē Tāi-pi̍t hián-hiān, só͘-í Tāi-pi̍t koat-tēng beh tī chia khí sèng-tiān.

2Só͘-lô-bûn choh-ông tē-sì nî, jī-ge̍h chhoe-jī, khai-sí tāng-kang.

3Só͘-lô-bûn beh khí ê Siōng-tè ê tiān ê tōe-ki, tn̂g jī-cha̍p-chhit kong-chhioh, khoah káu kong-chhioh.

4Tiān-chêng ê cháu-lông khoah káu kong-chhioh, kap tiān pîⁿ khoah; koân gō͘-cha̍p-sì kong-chhioh; lāi-bīn tah sûn-kim.

5Tōa-tiān ê piah ēng siông-chhiū-pán khàm, ēng sûn-kim tah; téng-bīn khek chó-chhiū kap liān-á.

6Hit-keng tiān koh ēng pó-chio̍h kap Pa-óa-im ê kim chong-sek.

7Tiān, pau-koat tiān ê niû, hō͘-tēng, chhiûⁿ-piah, mn̂g-sìⁿ lóng ēng kim tah; piah-téng khek thiⁿ-sài ki-lō͘-pek.

8Koh khí Chì-sèng-só͘, tn̂g káu kong-chhioh, khoah kap sèng-tiān ê khoah sio-siâng káu kong-chhioh, lóng tah sûn-kim, kim ê tāng-liōng jī-cha̍p kong-tùn.

9Kim teng-á tāng gō͘-pah chhit-cha̍p kong-khek. Téng-bīn ê pō͘-hūn mā lóng tah kim.

10Chì-sèng-só͘ ê lāi-bīn tiau-khek chi̍t tùi thiⁿ-sài ki-lō͘-pek, gōa-bīn pau kim.

11-12Nn̄g ê ki-lō͘-pek ê si̍t lóng-chóng tāi-iok káu kong-chhioh. Tē-it ê ki-lō͘-pek chi̍t pêng ê si̍t tú-tio̍h chit-pêng ê piah, tē-jī ê chi̍t pêng ê si̍t tú-tio̍h hit-pêng ê piah; in lēng-gōa nn̄g ki si̍t tī tiān ê tiong-ng sio-kha̍p; múi chi̍t ki si̍t tn̂g nn̄g kong-chhioh jī-cha̍p kong-hun.

13Chit nn̄g ê ki-lō͘-pek thí-khui si̍t, lóng-chóng iok káu kong-chhioh; in ê kha khiā--teh, bīn ǹg ji̍p-kháu.

14Koh ēng nâ-sek, chí-sek, chu-âng-sek ê se, kap iù-môa-pò͘ chòe tiùⁿ, siù ki-lō͘-pek tī hit téng-bīn.

Nn̄g Ki Tâng-thiāu(1 Ông 7.15-22)

15 Só͘-lô-bûn-ông tī tiān-chêng chō nn̄g ki thiāu, koân cha̍p-gō͘ kong-chhioh-pòaⁿ, múi chi̍t ki thiāu ê thiāu-táu koân nn̄g kong-chhioh jī-cha̍p kong-hun.

16Koh chòe liān-á an tī thiāu-táu; koh chòe sia̍h-liû chi̍t-pah lia̍p, an tī liān-á téng.

17Hit nn̄g ki thiāu chhāi tī tiān-chêng, chi̍t ki tī chiàⁿ-pêng, chi̍t ki tī tò-pêng; chiàⁿ-pêng hit-ki kiò-chòe Ngá-kun

, tò-pêng hit-ki kiò-chòe Pho-a-su

Le̍k-tāi-chì Hā-koàn 3 - 現代台語譯本羅馬字版(TTVR)-闽南语

Learn More About Us