Iâ-lī-bí-su 10

Iâ-lī-bí-su 10 - 現代台語譯本羅馬字版(TTVR)-闽南语

Pài Ngó͘-siōng kap Chin-si̍t ê Kèng-pài

1 Í-sek-lia̍t-lâng, tio̍h thiaⁿ Siōng Chú tùi lín kóng ê ōe.

2Siōng Chú án-ni kóng:

Lín m̄-thang o̍h gōa-cho̍k-lâng ê chong-kàu hêng-ûi;

sui-jiân lia̍t-kok ōe in-ūi kî-koài ê thian-siōng kiaⁿ-hiâⁿ,

m̄-kú lín lóng m̄-bián kiaⁿ.

3Bān-bîn só͘ pài--ê lóng sī hu-bû,

put-kò sī tùi chhiū-nâ ēng pó͘-thâu chhò--lo̍h-lâi ê chhâ-kho͘;

sai-hū tiau-khek,

4ēng kim gûn chng-thāⁿ,

ēng kòng-thûi tèng teng-á,

kā i chhāi tiâu--teh,

hō͘ i bōe tín-tāng.

5In ê sîn-siōng chhin-chhiūⁿ chhì-koe-á-hn̂g ê tiū-chháu-lâng,

bōe kóng-ōe, bōe kiâⁿ-lō͘,

tio̍h hō͘ lâng kng.

M̄-bián kiaⁿ in!

In bōe kàng chai-hō, mā bōe sù hok-khì.

6Siōng Chú ah, bô lâng ōe-tàng kap lí pí;

chí-ū lí sī úi-tāi, lí ū tōa koân-lêng.

7Bān-kok ê Ông, siáⁿ-lâng káⁿ m̄ kèng-ùi lí?

Chí-ū lí eng-kai siū kèng-ùi.

Lia̍t-kok só͘-ū tì-hūi ê lâng

kap it-chhè ū koân-le̍k ê lâng,

bô lâng ōe-tàng kap lí pí.

8In lóng gû-gōng bû-ti;

hiah-ê ngó͘-siōng bōe-tàng hō͘ in sím-mi̍h kà-sī;

in put-kò sī chhâ-thâu nā-tiāⁿ.

9Phah-chòe kui-phìⁿ ê gûn tùi Tha-si ūn--lâi,

kim tùi O͘-hoat chìn-kháu,

lóng sī sai-hū kap gûn-chhiūⁿ ê chok-phín;

in só͘ chhēng nâ-sek, chí-sek ê saⁿ,

mā-sī ki-su̍t kháu-biāu ê sai-hū chòe--ê.

10Chí-ū Siōng Chú sī chin Sîn,

sī oa̍h ê Siōng-tè, sī éng-oán chûn-chāi ê Kun-ông.

I chi̍t-ē siū-khì, tāi-tōe iô-tāng;

I hoat tōa siū-khì, lia̍t-kok lóng tòng bōe tiâu.

11Lín tio̍h kā in kóng, “Hiah-ê m̄-sī chhòng-chō thiⁿ-tōe ê sîn-bêng, lóng beh tùi thiⁿ-ē tōe-chiūⁿ siau-sit.”

Chheng-chàn Siōng Chú

12Siōng Chú ēng ka-kī ê tāi-lêng chhòng-chō tāi-tōe,

ēng I ê tì-hūi kian-li̍p sè-kài,

ēng chhong-bêng thí-khui kiong-chhong.

13Siōng Chú chi̍t-ē chhut-siaⁿ, thiⁿ-téng ê chúi chiū ká-kún,

hûn-bū chiū tùi thiⁿ-piⁿ-hái-kak chhèng--chhut-lâi;

I tùi hō͘ ê tiong-kan siā-chhut sih-nà,

tùi I ê chhng-khò͘ sàng hong chhut--lâi.

14Sè-kan-lâng lóng gû-gōng bû-ti;

ta̍k-ê phah-kim sai-hū lóng ūi-tio̍h ka-kī chō ê sîn-siōng kiàn-siàu,

in-ūi in chù ê sîn-siōng lóng sī hu-ké, lāi-bīn bô sìⁿ-miā.

15Ngó͘-siōng lóng sī hu-ké,

sī lâng thí-chhiò ê tùi-siōng;

hêng-hoa̍t chi̍t-ē kàu, in lóng ōe siau-sit.

16Choh Ngá-kok sán-gia̍p ê Siōng-tè kap in bô kâng-khoán;

I sī chhòng-chō bān-iú ê Chú;

Í-sek-lia̍t sī I ê chú-bîn, sī I ê sán-gia̍p.

I ê chheng-ho͘ sī Siōng Chú — Bān-kun ê Thóng-sòe.

Ū-kò Liû-bông

17Lín tòa tī siū ûi-khùn ê siâⁿ ê lâng, tio̍h siu-si̍p lín ê hêng-lí lī-khui.

18In-ūi Siōng Chú kóng, “Chit-piàn góa beh chiong chit só͘-chāi ê chū-bîn tàn hiat-ka̍k; kā in chiat-bôa, hō͘ in kak-chhíⁿ.”

19 Iâ-lō͘-sat-léng-lâng tōa-siaⁿ hoah, kóng:

Goán chhám ah, goán tio̍h-siong lah!

Goán siū ê siong chin tāng.

M̄-kú goán siūⁿ,

che sī goán tio̍h jím-siū ê thòng-khó͘.

20Goán ê pò͘-pîⁿ húi-hoāi lah,

pò͘-pîⁿ ê soh-á tn̄g--khì lah,

goán ê gín-á lóng lī-khui goán, bōe koh tò--lâi;

bōe koh ū lâng lâi kā goán tah pò͘-pîⁿ,

kā goán kòa pò͘-lî.

21Góa ìn kóng:

Léng-tō-chiá lóng gû-gōng bû-ti, bô beh chhē-kiû Siōng Chú,

só͘-í lóng bōe sūn-lī;

in ê iûⁿ-kûn mā lóng siū kóaⁿ-sòaⁿ.

22Thiaⁿ leh, ū siau-sit thoân--lâi!

Ū tōa jiáu-tōng tùi pak-hng lâi,

beh hō͘ Iû-tāi ê siâⁿ-tìn pìⁿ-chòe hong-po͘,

pìⁿ-chòe chhâi-lông ê siū.

23Siōng Chú, góa chai, lâng bōe-tàng koat-tēng ka-kī ê lō͘,

bōe-tàng khòng-chè ka-kī ê kha-pō͘.

24Siōng Chú ah, lí koán-kàu góa ê sî,

kiû lí kong-tō tùi-thāi góa,

m̄-thang tī lí tōa siū-khì tiong hō͘ góa it-bû-só͘-iú.

25Kiû lí chiong tōa siū-khì piàⁿ tī bô kèng-ùi lí ê kok-ka,

í-ki̍p bô beh kiû-kiò lí ê miâ ê bîn-cho̍k;

in thun-chia̍h Ngá-kok,

kā i oân-choân siau-bia̍t,

hō͘ i khiā-khí ê só͘-chāi pha-hng.

Iâ-lī-bí-su 10 - 現代台語譯本羅馬字版(TTVR)-闽南语

Learn More About Us