Hap-pa-kok-su 2

Hap-pa-kok-su 2 - 現代台語譯本羅馬字版(TTVR)-闽南语

Siōng Chú Hôe-tap

1Góa beh peh-chiūⁿ siú-bōng-tâi,

khiā tī pó-lúi téng koan-khòaⁿ,

thèng-hāu Siōng Chú tùi góa kóng sím-mi̍h,

khòaⁿ I beh án-chóaⁿ ìn-tap góa ê bâi-oàn.

2Siōng Chú ìn góa kóng,

“Chiong chit-ê khé-sī siá--lo̍h-lâi,

chheng-chhó khek tī pán--ni̍h,

hō͘ lâng chi̍t-ē khòaⁿ chiū bêng-pe̍k.

3Chit-ê khé-sī teh thèng-hāu chí-tēng ê sî-kan;

sî-kan chi̍t-ē kàu, só͘ kóng ê kiat-kio̍k chiū ōe si̍t-hiān.

Chí-tēng ê sî-kan sui-jiân kám-kak khah bān, iáu-kú tio̍h tán,

in-ūi it-tēng ōe lâi, bōe iân-tî.

4Lí khòaⁿ, sim bô chèng-ti̍t ê lâng chū-ko chū-tāi,

m̄-kú gī ê lâng ōe tùi sìn lâi oa̍h.”

Put-gī ê Kiat-kio̍k

5Châi-hù ōe bê-he̍k lâng, hō͘ lâng kiau-ngō͘,

tham-io̍k chhin-chhiūⁿ Im-hú thūn bōe tīⁿ;

i ê sim chhin-chhiūⁿ sí-bông bōe boán-chiok,

siūⁿ-beh cheng-ho̍k bān-kok, hō͘ bān-bîn lóng kui-sūn i.

6Siū cheng-ho̍k ê lâng ōe ēng sio̍k-gú phì-jū kā i ki-chhì phì-siùⁿ kóng,

“Lí chhám ah!

Lí tún-chek thau-the̍h--lâi ê mi̍h-kiāⁿ,

ēng pa̍t-lâng ê tí-ah thàn tōa chîⁿ,

lí chòe chit-khoán pháiⁿ-tāi beh kàu tī-sî?”

7Hō͘ lí pak-siah ê lâng kiám bōe hut-jiân heng-khí?

In kiám bōe heng-ōng hō͘ lí phi̍h-phi̍h-chhoah?

Hit-sî lí ōe pìⁿ-chòe in ê la̍h-bu̍t.

8Lí ū chhiúⁿ-kiap chin chōe kok-ka,

lia̍t-kok tiong só͘ chhun ê lâng mā ōe kā lí chhiúⁿ;

in-ūi lí ū lâu lâng ê huih,

húi-bia̍t kéng-lāi ê siâⁿ-chhī kap lāi-bīn ê chū-bîn.

9Ūi ka-kī ê ke chek-chū put-gī ê chîⁿ-châi,

tī koân ê só͘-chāi choh-siū ǹg-bāng thoat-lī chai-lān,

chit-khoán lâng chhám ah!

10Lí kè-bô͘ beh húi-bia̍t chin chōe kok ê jîn-bîn,

soah hō͘ lí ê ke siū thí-jio̍k,

hāi-tio̍h ka-kī ê sìⁿ-miā,

11liân piah ê chio̍h to ōe âu-kiò,

chhù ê niû mā ōe ìn-siaⁿ.

12Ēng thâi-lâng lâu-huih kiàn-chō siâⁿ,

ēng chōe-kò kiàn-li̍p siâⁿ-chhī,

chit-khoán lâng chhám ah!

13Lí khòaⁿ, jîn-bîn lô-lo̍k tit--tio̍h-ê hō͘ hé sio--khì,

lia̍t-kok thoa-bôa tit--tio̍h-ê lóng lo̍k-khong,

che kiám m̄-sī Siōng Chú — Bān-kun ê Thóng-sòe ê chok-ûi?

14Choân-tōe beh chhiong-móa tùi Siōng Chú êng-kng ê jīm-sek,

chhin-chhiūⁿ chúi chhiong-móa hái-iûⁿ.

15Hō͘ chhù-piⁿ lim-chiú, lim kah chùi-bâng-bâng,

thang khòaⁿ in chhiah-sin-lō͘-thé,

chit-khoán lâng chhám ah!

16Lí tit--tio̍h-ê m̄-sī chun-êng, sī ke̍k-tōa ê lêng-jio̍k.

Taⁿ ōaⁿ lí lim, lim kah tang-tó-sai-oai.

Siōng Chú tōa siū-khì ê poe ōe lûn kàu lí hia,

lí ê êng-kng ōe pìⁿ-chòe kiàn-siàu.

17Lí ū tùi Lê-pa-lūn chòe hiong-pō ê sū,

lí ōe siū khah-tōa ê hiong-pō;

iá-siù tú--tio̍h ê húi-bia̍t,

ōe hō͘ lí kiaⁿ-hiâⁿ.

Lí it-tēng ōe siū pò-èng,

in-ūi lí ū lâu lâng ê huih,

húi-bia̍t kéng-lāi ê siâⁿ-chhī kap lāi-bīn ê chū-bîn.

18Tiau-khek ê siōng sī lâng chō--ê, ū sím-mi̍h lī-ek?

Chù-chō ê ngó͘-siōng kà lâng hu-ké, ū sím-mi̍h lō͘-ēng?

Sai-hū óa-khò ka-kī só͘ chō--ê,

i chō--ê put-kò sī bōe kóng-ōe ê ngó͘-siōng.

19Tùi chhâ-thâu kóng “Chhíⁿ--khí-lâi”,

tùi bōe kóng-ōe ê chio̍h-thâu kóng “Peh--khí-lâi”,

chit-khoán lâng chhám ah!

Ngó͘-siōng kiám ōe kà-sī lâng?

Lí khòaⁿ, ngó͘-siōng put-kò sī ēng kim ēng gûn pau--ê,

lāi-bīn lóng bô sìⁿ-miā.

20Siōng Chú tī I ê sèng-tiān,

choân-tōe tī I ê bīn-chêng lóng tio̍h siok-chēng.

Hap-pa-kok-su 2 - 現代台語譯本羅馬字版(TTVR)-闽南语

Learn More About Us