Tān-í-lí-su 5

Tān-í-lí-su 5 - 現代台語譯本羅馬字版(TTVR)-闽南语

Pek-sa-sat-ông ê Iàn-hōe

1 Pek-sa-sat-ông kú-hêng tōa iàn-hōe, iau-chhiáⁿ chi̍t-chheng ê tāi-sîn lâi kap i chòe-hé lim-chiú.

2Pek-sa-sat lim-chiú lim kàu sóng-khoài ê sî, i bēng-lēng lâng chiong i ê chó͘-sian Nî-pò͘-kah-nî-sat tùi Iâ-lō͘-sat-léng ê sèng-tiān chhiúⁿ--lâi ê kim-khì gûn-khì poaⁿ--chhut-lâi, hō͘ ông kap hiah-ê tāi-sîn, í-ki̍p ông ê hō͘-hui tóe chiú lim.

3Lâng chiū chiong tùi Iâ-lō͘-sat-léng Siōng-tè ê sèng-tiān chhiúⁿ--lâi ê khì-khū, the̍h-lâi hō͘ ông, tāi-sîn, kap hō͘-hui lim-chiú.

4In ná lim-chiú, ná o-ló in ēng kim, gûn, tâng, thih, chhâ, chio̍h-thâu chō ê sîn-bêng.

5Hit-sî, hut-jiân chhut-hiān chi̍t ki lâng ê chńg-thâu-á, tī ông-kiong teng-tâi tùi-bīn ê chio̍h-he-piah siá-jī. Ông khòaⁿ-tio̍h siá-jī ê chhiú,

6bīn chiū sit-sek, hui-siông kiaⁿ-hiâⁿ, io-kut bô-la̍t, kha-thâu-u kho̍k-kho̍k-tiô.

7Ông tōa-siaⁿ hoah, bēng-lēng hiah-ê kiâⁿ hoat-su̍t--ê, seng-siōng-ka, chiam-pok--ê lóng lâi kàu i hia. Ông kā chiah-ê Pa-pí-lûn ū tì-hūi ê lâng kóng, “Nā ū lâng bat chiah-ê jī, koh ōe-hiáu kā góa kóe-seh, góa chiū beh sù i chi̍t niá chí-sek ê gōa-phàu, kā i kòa kim phoa̍h-liān, hō͘ i chòe choân-kok tē-saⁿ tōa--ê.”

8Ông só͘-ū ê kò͘-būn lóng chìn-chêng, m̄-kú in bōe-hiáu tha̍k hiah-ê jī, mā bōe-hiáu kā ông kóe-seh hiah-ê jī ê ì-sù.

9Pek-sa-sat-ông chiū chin kiaⁿ-hiâⁿ, bīn sit-sek; i ê tāi-sîn mā m̄-chai beh án-chóaⁿ.

Thài-hō͘ Chhui-chiàn Tān-í-lí

10Thài-hō͘ thiaⁿ-kìⁿ ông kap i ê tāi-sîn ê ōe, chiū ji̍p-khì iàn-hōe-thiaⁿ, tùi ông kóng, “Tāi-ông bān-sòe! Lí m̄-bián kiaⁿ-hiâⁿ sit-sek.

11Lí kok-lāi ū chi̍t ê lâng, i ū chì-sèng sîn-bêng ê sîn, lí ê chó͘-sian Nî-pò͘-kah-nî-sat chāi-siⁿ ê sî, chiū hoat-kiàn chit-ê lâng ū tōng-chhat-le̍k, chin chhong-bêng, chhin-chhiūⁿ sîn-bêng hiah-ni̍h ū tì-hūi. Lí ê chó͘-sian Nî-pò͘-kah-nî-sat-ông ū siat-li̍p i koán-lí su̍t-sū, kiâⁿ hoat-su̍t--ê, seng-siōng-ka, kap chiam-pok--ê,

12sī in-ūi i ū hui-siông hó ê lêng-sèng, ū tì-hūi kap tōng-chhat-le̍k, ōe kái-bāng, ōe kái-tap būn-tôe, kóe-seh ò-pì ê sū. Chit-ê lâng kiò-chòe Tān-í-lí, Nî-pò͘-kah-nî-sat-ông koh kā i hō-miâ chòe Pek-thê-sa-sat. Lí hiān-chāi chiū thang tiàu Tān-í-lí lâi, i ōe kā lí kóe-seh chiah-ê jī ê ì-sù.”

Tān-í-lí Kóe-seh Piah-téng ê Jī

13 Tān-í-lí sûi-sî hō͘ lâng chhōa-khì kìⁿ ông. Ông mn̄g i, “Lí sī góa ê sian-ông tùi Iû-tāi-tōe lia̍h--lâi ê Iû-thài-lâng Tān-í-lí sī--bô?

14Thiaⁿ-kóng lí ū chì-sèng sîn-bêng ê sîn, ū tōng-chhat-le̍k kap chhong-bêng, koh ū tì-hūi.

15Hiān-chāi góa ū tiàu chiah-ê kò͘-būn kap su̍t-sū lâi góa chia, ài in tha̍k chiah-ê jī, koh chiong lāi-bīn ê ì-sù kā góa kóe-seh, m̄-kú in lóng bōe-hiáu.

16Góa ū thiaⁿ-kóng lí chin gâu kóe-seh, ōe kái-tap būn-tôe. Taⁿ, lí nā ōe-hiáu tha̍k chiah-ê jī, koh kóe-seh hō͘ góa thiaⁿ, góa chiū beh sù lí chí-sek ê gōa-phàu, kā lí kòa kim phoa̍h-liān, koh hō͘ lí chòe choân-kok tē-saⁿ tōa--ê.”

17 Tān-í-lí ìn ông kóng, “Chhiáⁿ hông-siōng pó-liû lí ê lé-mi̍h kap siúⁿ-phín, á-sī sàng hō͘ pa̍t-lâng. Taⁿ, góa beh tha̍k chit-ê bûn-jī, koh chiong lāi-bīn ê ì-sù kā ông kóe-seh.

18“Hông-siōng, chì-koân ê Siōng-tè ū chiong kok-ka, koân-pèng, kong-êng, chun-giâm sù hō͘ lí ê sian-ông Nî-pò͘-kah-nî-sat-ông.

19In-ūi Siōng-tè ū chiong tōa ê koân-le̍k sù hō͘ i, hō͘ chiah-ê bîn-cho̍k, pang-kok, kap kóng ta̍k-chióng gú-giân ê jîn-bîn lóng tī i ê bīn-chêng kiaⁿ-kiaⁿ-hiâⁿ-hiâⁿ; mā hō͘ i ōe-tàng chiàu ka-kī ê ì-sù hō͘ lâng sí hō͘ lâng oa̍h, kā lâng ko-seng, kā lâng kàng-kē.

20M̄-kú i lāi-sim chū-ko chū-tāi, sèng-chêng kò͘-chip, gán-tiong-bû-jîn, só͘-í Siōng-tè chiong i tùi ông-ūi kóaⁿ--lo̍h-khì, chiong i ê chun-êng chhiúⁿ-cháu.

21I chiū hō͘ lâng kóaⁿ lī-khui jîn-kûn, i ê sim pìⁿ-chòe iá-siù ê sim, kap iá-lû chòe-hé tòa, chhin-chhiūⁿ gû chia̍h-chháu, hō͘ lō͘-chúi tàng, ti̍t-kàu i sêng-jīn Chì-koân Siōng-tè teh chiáng-koán sè-kan ê kok-ka, chiàu I ê chí-ì soán-li̍p lâng tī-lí.

22“Pek-sa-sat, lí sī Nî-pò͘-kah-nî-sat ê hō͘-tāi; sui-jiân chai-iáⁿ só͘-ū chiah-ê tāi-chì, m̄-kú lí iû-goân bô beh khiam-pi,

23kèng-jiân chū-ko chū-tāi, kong-kek thiⁿ-téng ê Chú, phài lâng chiong thiⁿ-téng ê Chú sèng-tiān lāi-bīn ê khì-khū tòa-lâi lí chia, hō͘ lí, lí ê tāi-sîn, kap hō͘-hui ēng lâi lim-chiú. Lí koh o-ló hiah-ê ēng kim, gûn, tâng, thih, chhâ, chio̍h-thâu chō, bōe khòaⁿ, bōe thiaⁿ, sím-mi̍h lóng m̄ bat ê sîn-bêng; tian-tò bô chun-chông hit-ūi koat-tēng lí siⁿ-sí, chiáng-ak lí ê miā-ūn ê Siōng-tè.

24Só͘-í Siōng-tè hō͘ chi̍t ki chhiú chhut-hiān siá hiah-ê jī.

25“Hiah-ê jī sī ‘Bí-nî, Bí-nî, Thê-khek-le̍k, kap Pí-le̍k-su’,

26ì-sù sī án-ni: ‘Bí-nî’ chiū-sī Siōng-tè í-keng kè-sǹg lí ê kok-ka ê nî-sò͘, beh hō͘ i kiat-sok.

27‘Thê-khek-le̍k’ chiū-sī Siōng-tè ēng thian-phêng kā lí chhìn, lí bô kúi niú tāng.

28‘Pí-le̍k-su’ chiū-sī lí ê kok-ka ōe hun-lia̍t, ōe kau hō͘ Bí-tí-a kap Pho-su

.”

29 Pek-sa-sat chiū hā-lēng, kā Tān-í-lí chhēng chí-sek ê gōa-phàu, kòa kim phoa̍h-liān, koh soan-pò͘ i chòe choân-kok tē-saⁿ tōa--ê.

30Hit-àm, Pa-pí-lûn-ông Pek-sa-sat hō͘ lâng thâi-sí.

31Bí-tí-a-lâng Tāi-liû-sū la̍k-cha̍p-jī hè ê sî, siau-bia̍t Pa-pí-lûn-kok.

Tān-í-lí-su 5 - 現代台語譯本羅馬字版(TTVR)-闽南语

Learn More About Us