Nî-hi-bí-kì 6

Nî-hi-bí-kì 6 - 現代台語譯本羅馬字版(TTVR)-闽南语

Hām-hāi Nî-hi-bí ê Im-bô͘

1 Chham-pa-la, To-pí-ngá, A-la-pek-lâng Ki-siān, kap goán kî-tha ê tùi-te̍k thiaⁿ-tio̍h góa í-keng oân-sêng siâⁿ-chhiûⁿ ê tiông-kiàn, só͘-ū ê phòa-khiah lóng siu-pó͘ hó-sè; m̄-kú siâⁿ-mn̂g iáu-bē an mn̂g-sìⁿ.

2Chham-pa-la kap Ki-siān chiū phài lâng lâi kā góa kóng, “Chhiáⁿ lí lâi, lán tī O-ná pêng-goân chi̍t ê chng-siā kìⁿ-bīn.” Kî-si̍t in sī siūⁿ-beh hāi góa.

3Góa chiū phài sù-chiá khì kā in kóng, “Góa chit-chūn teh chìn-hêng tōa ê kang-thêng, bōe-tàng khì; góa ná thang lī-khui chia khì kìⁿ lín, hō͘ chit-ê kang-thêng siū chó͘-tòng?”

4In án-ni sì piàn phài lâng lâi kìⁿ góa, góa lóng ēng kâng-khoán ê ōe hôe-tap in.

5 Chham-pa-la tē-gō͘ piàn phài i ê pō͘-hā lâi kìⁿ góa, chhiú the̍h bô hong--khí-lâi ê phoe;

6phoe-lāi án-ni siá: “Tī lia̍t-kok tiong ū hong-siaⁿ, Ki-siān

mā chèng-si̍t kóng, lí kap Iû-thài-lâng siūⁿ-beh chō-hoán, só͘-í lí chiah teh siu-kiàn siâⁿ-chhiûⁿ; kun-kù chiah-ê ōe, lí siūⁿ-beh chòe in ê ông.

7Lí koh tī Iâ-lō͘-sat-léng chí-phài sian-ti ūi-tio̍h lí soan-thoân kóng, ‘Tī Iû-tāi ū ông.’ Chiah-ê ōe it-tēng ōe thoân kàu ông hia; só͘-í chhiáⁿ lí lâi, lán chòe-hé chham-siông.”

8Góa chiū chhe lâng khì kā i kóng, “Lí kóng ê tāi-chì bô-iáⁿ-bô-chiah, sī lí ka-kī liap-chō--ê.”

9In siūⁿ-beh khióng-hat goán, hō͘ goán ê chhiú bô-la̍t thang oân-sêng chit-ê kang-thêng. Góa kî-tó kóng, “Siōng-tè ah, kiû lí hō͘ góa kian-kiông.”

10Ū chi̍t ji̍t, góa khì Sī-má-ngá ê chhù beh kìⁿ i, i sī Bí-hi-tāi-pia̍t ê sun, Tē-lâi-ngá ê kiáⁿ; hit-sî i ka-kī koaiⁿ tī chhù-lāi. I tùi góa kóng, “Lán lâi-khì Siōng-tè ê chhù, ji̍p-khì tiān-lāi, chiong sèng-tiān ê mn̂g koaiⁿ--khí-lâi; in-ūi in beh lâi hāi lí, beh tī mî--sî thâi lí.”

11Góa kóng, “Góa kiám sī hit-khoán ōe tô-siám ê lâng? Góa kiám thang bih tiàm sèng-tiān lāi pó-choân ka-kī ê sìⁿ-miā? Góa m̄ ji̍p--khì.”

12Hit-sî góa chiah chai, Siōng-tè pèng bô chhe i, sī To-pí-ngá kap Chham-pa-la kā i bóe-siu, kóng ū-giân kong-kek góa.

13In bóe-siu i ê bo̍k-te̍k, sī beh kā góa heh-kiaⁿ, hō͘ góa chiàu in ê ōe khì chòe lâi hoān-chōe, lâu pháiⁿ miâ-siaⁿ hō͘ lâng thí-chhiò.

14Góa ê Siōng-tè ah, kiû lí m̄-thang bōe-kì-tit To-pí-ngá, Chham-pa-la, lú sian-ti Ná-a-tí, kap kî-tha hiah-ê sian-ti só͘ chòe kā góa heh-kiaⁿ ê tāi-chì, m̄-thang pàng in soah.

Tiông-kiàn Kang-thêng Kiat-sok

15Keng-kè gō͘-cha̍p-jī ji̍t ê kang-chok, tī Í-lo̍k-ge̍h jī-cha̍p-gō͘ ji̍t, siâⁿ-chhiûⁿ ê tiông-kiàn chiū oân-sêng.

16Goán sì-ûi lia̍t-kok hiah-ê tùi-te̍k thiaⁿ--tio̍h chiū lóng tio̍h-kiaⁿ, kám-kak làu-khùi kiàn-siàu; in-ūi in lóng chai chit-ê kang-thêng ōe-tàng oân-sêng, sī chhut tī Siōng-tè ê pang-chān.

17Tī hit-tōaⁿ kî-kan, Iû-tāi ê kùi-cho̍k siông-siông siá-phoe hō͘ To-pí-ngá, To-pí-ngá mā kā in hôe-phoe.

18Tī Iû-tāi ū chin chōe lâng kap To-pí-ngá kiat-bêng, in-ūi i sī A-la ê kiáⁿ Sī-ka-nî ê kiáⁿ-sài; koh To-pí-ngá ê kiáⁿ Iok-hap-lân chhōa Pí-lī-ka ê kiáⁿ Bí-su-lân ê cha-bó͘-kiáⁿ chòe bó͘.

19In siông-siông tī góa ê bīn-chêng kóng To-pí-ngá ê hó-ōe, mā chiong góa ê ōe thoân hō͘ i. To-pí-ngá koh siông-siông siá-phoe kā góa khióng-hat.

Nî-hi-bí-kì 6 - 現代台語譯本羅馬字版(TTVR)-闽南语

Learn More About Us