Sin-bēng-kì 27

Sin-bēng-kì 27 - 現代台語譯本羅馬字版(TTVR)-闽南语

Chiong Siōng Chú ê Lu̍t-hoat Khek tī Chio̍h-thâu

1 Mô͘-se kap Í-sek-lia̍t chèng tiúⁿ-ló bēng-lēng jîn-bîn, kóng: Lín tio̍h chun-siú góa kin-á-ji̍t só͘ hoan-hù lín it-chhè ê kài-bēng.

2Lín kè Iok-tàn-hô, khì kàu Siōng Chú — lín ê Siōng-tè siúⁿ-sù lín ê tōe hit-ji̍t, tio̍h chhāi kúi tè tōa chio̍h, téng-bīn boah chio̍h-he,

3chiong lu̍t-hoat só͘-ū ê ōe khek tī tōa chio̍h téng-bīn. Lín ji̍p-khì Siōng Chú — lín ê Siōng-tè siúⁿ-sù lín ê tōe, chiū-sī I tùi lín ê lia̍t-chó͘ só͘ èng-ún lâu lin kap bi̍t ê tōe,

4kè Iok-tàn-hô hit-pêng hōaⁿ liáu-āu, tio̍h chiàu góa kin-á-ji̍t ê bēng-lēng, tī Í-pa-lō͘-soaⁿ chhāi hiah-ê chio̍h-thâu, téng-bīn boah chio̍h-he.

5Tī hia, lín tio̍h ūi Siōng Chú — lín ê Siōng-tè ēng chio̍h-thâu khí chi̍t chō chè-tôaⁿ; hiah-ê chio̍h-thâu m̄-thang ēng thih ê kang-khū phah--kè.

6Tio̍h ēng bô phah--kè ê chio̍h-thâu khí Siōng Chú — lín ê Siōng-tè ê tôaⁿ; tī hit téng-bīn hiàn sio-hòa-chè hō͘ I,

7mā tī hia hiàn pêng-an-chè; koh tī Siōng Chú — lín ê Siōng-tè bīn-chêng hoaⁿ-hí lim-chia̍h.

8Lín tio̍h chiong chit-ê lu̍t-hoat it-chhè ê ōe, chheng-chheng-chhó-chhó khek tī hiah-ê chio̍h-thâu.

9 Mô͘-se kap Lī-bī-lâng chòe chè-si--ê koh hoan-hù Í-sek-lia̍t chèng-lâng, kóng: Í-sek-lia̍t-lâng, tio̍h chēng-chēng, tio̍h chù-ì thiaⁿ! Kin-á-ji̍t lín chiâⁿ-chòe Siōng Chú — lín ê Siōng-tè ê chú-bîn,

10tio̍h thiaⁿ-thàn Siōng Chú — lín ê Siōng-tè ê ōe, chun-hêng góa só͘ pan-pò͘ ê Siōng Chú ê kài-bēng kap kui-lē.

Ûi-pōe Kài-bēng Siū Chiù-chó͘

11Hit-ji̍t, Mô͘-se koh hoan-hù jîn-bîn kóng:

12Lín kè Iok-tàn-hô liáu-āu, Lī-bī-lâng chiok-hok jîn-bîn ê sî, Se-biān, Lī-bī, Iû-tāi, Í-sat-ka, Iok-sek, Piān-ngá-bín chiah-ê chi-cho̍k, tio̍h khiā tī Ki-lī-sim-soaⁿ;

13soan-pò͘ chiù-chó͘ ê sî, Lū-piān, Ka-tek, A-siat, Se-pò͘-lûn, Tān, Ná-hut-tha-lī chiah-ê chi-cho̍k, tio̍h khiā tī Í-pa-lō͘-soaⁿ.

14Jiân-āu, Lī-bī-lâng tio̍h tùi Í-sek-lia̍t chèng-lâng tōa-siaⁿ soan-pò͘:

15Chè-chō Siōng Chú só͘ iàm-ò͘ⁿ ê sîn-siōng, bô-lūn sī tiau-khek--ê, á-sī chù-chō--ê, koh hō͘ lâng àm-tiong chè-pài, hit-ê sai-hū tio̍h siū chiù-chó͘. Chèng-lâng lóng tio̍h ìn kóng, “Amen!”

16Tùi pē-bú put-hàu--ê, tio̍h siū chiù-chó͘. Chèng-lâng lóng tio̍h kóng, “Amen!”

17Î-sóa chhù-piⁿ ê kài-chí--ê, tio̍h siū chiù-chó͘. Chèng-lâng lóng tio̍h kóng, “Amen!”

18Hō͘ sit-bêng ê lâng kiâⁿ m̄-tio̍h lō͘--ê, tio̍h siū chiù-chó͘. Chèng-lâng lóng tio̍h kóng, “Amen!”

19Pak-toa̍t gōa-cho̍k-lâng kap ko͘-jî kóaⁿ-hū ê koân-lī--ê, tio̍h siū chiù-chó͘. Chèng-lâng lóng tio̍h kóng, “Amen!”

20Kap lāu-pē ê bó͘ chòe-hé khùn--ê, tio̍h siū chiù-chó͘, in-ūi i ū phah lâ-sâm i lāu-pē ê bîn-chhn̂g. Chèng-lâng lóng tio̍h kóng, “Amen!”

21Kap tōng-bu̍t kau-ha̍p--ê, tio̍h siū chiù-chó͘. Chèng-lâng lóng tio̍h kóng, “Amen!”

22Kap kâng-pē ê chí-bē, á-sī kâng-bú ê chí-bē, chòe-hé khùn--ê, hit-ê lâng tio̍h siū chiù-chó͘. Chèng-lâng lóng tio̍h kóng, “Amen!”

23Kap tiūⁿ-ḿ chòe-hé khùn--ê, tio̍h siū chiù-chó͘. Chèng-lâng lóng tio̍h kóng, “Amen!”

24Àm-sat chhù-piⁿ--ê, tio̍h siū chiù-chó͘. Chèng-lâng lóng tio̍h kóng, “Amen!”

25Chiap-siū hóe-lō͘ hāi-sí bû-ko͘ ê lâng--ê, tio̍h siū chiù-chó͘. Chèng-lâng lóng tio̍h kóng, “Amen!”

26Bô chhiat-si̍t chun-hêng chiah-ê lu̍t-hoat ê ōe--ê, tio̍h siū chiù-chó͘. Chèng-lâng lóng tio̍h kóng, “Amen!”

Sin-bēng-kì 27 - 現代台語譯本羅馬字版(TTVR)-闽南语

Learn More About Us