Si-phian 142 - 現代台語譯本羅馬字版(TTVR)-闽南语

Tāi-pi̍t tī tōng-lāi só͘ chòe kà-sī ê si; chi̍t phiⁿ kî-tó.Kiû Pang-chān ê Kî-tó

1Góa tōa-siaⁿ kiû-kiò Siōng Chú,

chhut tōa-siaⁿ khún-kiû Siōng Chú.

2Góa tī I bīn-chêng thò͘-lō͘ góa ê khó͘-chêng,

tī I bīn-chêng kóng-chhut góa ê hoān-lān.

3Góa ê sim-sîn sit-chì, kiông-beh hūn--khì, lí chai góa ê lō͘;

tī góa kiâⁿ ê lō͘, in àm-tiong kā góa siat lô-bāng.

4Kiû lí khòaⁿ góa ê chiàⁿ-pêng, tī hia bô lâng ūi góa;

góa bô só͘-chāi thang bih, mā bô lâng koan-sim góa.

5Siōng Chú ah, góa tùi lí ai-kiû, kóng,

“Lí sī góa ê pī-lān-só͘;

góa iáu oa̍h--teh ê ji̍t, lí sī góa ê it-chhè.”

6Kiû lí àⁿ hī-khang thiaⁿ góa ê kiû-kiò,

in-ūi góa hām-lo̍h kàu siōng pi-chhám ê tōe-pō͘;

kiû lí kiù góa thoat-lī khún-pek góa ê lâng,

in-ūi in pí góa khah kiông.

7Kiû lí kiù góa thoat-chhut kaⁿ-lô,

hō͘ góa thang chheng-chàn lí ê miâ.

Gī-lâng ōe ûi-lûi tī góa sin-piⁿ,

in-ūi lí ēng un-tián tùi-thāi góa.

Learn More About Us