Si-phian 66

Si-phian 66 - 現代台語譯本羅馬字版(TTVR)-闽南语

Chi̍t phiⁿ si-koa, kau hō͘ sèng-ga̍k-tiúⁿ.Chheng-chàn Siōng-tè ê Kiù-un

1Choân-tōe lóng tio̍h tùi Siōng-tè chhut hoaⁿ-hí ê siaⁿ,

2chhiùⁿ-koa chheng-chàn I miâ ê êng-kng,

ēng chàn-bí ê ōe hián-bêng I ê êng-kng.

3Tio̍h tùi Siōng-tè kóng, “Lí ê chok-ûi jōa-ni̍h thang kiaⁿ-ùi!

In-ūi lí ê tōa koân-lêng, lí ê tùi-te̍k ōe hâng-ho̍k lí.

4Choân-tōe ōe kèng-pài lí,

gîm-si chheng-chàn lí;

ōe gîm-si o-ló lí ê miâ.”

5Lâi, lâi khòaⁿ Siōng-tè ê chok-ûi;

I tùi sè-kan-lâng ê só͘-chòe chin thang kiaⁿ-ùi.

6I hō͘ hái pìⁿ-chòe ta-tōe,

hō͘ I ê chú-bîn pō͘-kiâⁿ kè hô.

Tī hia goán in-ūi I lâi hoaⁿ-hí.

7I ēng I ê koân-lêng éng-oán thóng-tī;

I ê ba̍k-chiu kàm-chhat lia̍t-pang;

pōe-ge̍k ê lâng m̄-thang chū-ko.

8Bān-bîn ah, tio̍h chheng-chàn goán ê Siōng-tè,

hō͘ lâng thiaⁿ-tio̍h chheng-chàn I ê siaⁿ.

9I pó-chûn goán ê sìⁿ-miā,

hō͘ goán kian-kò͘ khiā-chāi.

10Siōng-tè ah, lí ū chhì-giām goán,

thoàn-liān goán chhin-chhiūⁿ thoàn-liān gûn.

11Lí hō͘ goán ji̍p lô-bāng,

ēng tāng-tàⁿ teh tī goán sin-chiūⁿ.

12Lí iông-ún lâng sái-chhia kauh-kè goán ê thâu-khak;

goán keng-kè chúi kap hé.

Chóng-sī lí chhōa goán kàu khoan-khoah chū-iû ê só͘-chāi.

13Góa beh tòa sio-hòa-chè chìn-ji̍p lí ê tiān;

góa beh tùi lí siā góa ê goān.

14Góa beh hêng tī hoān-lān ê sî chhùi-tûn só͘ kóng,

chhùi só͘ hē ê goān.

15Góa beh hiàn pûi ê cheng-siⁿ chòe sio-hòa-chè,

hiàn mî-iûⁿ-káng, gû-káng, kap soaⁿ-iûⁿ-káng,

chiong sio-hòa-chè ê phang-bī hiàn hō͘ lí.

16Kèng-ùi Siōng-tè ê lâng lóng tio̍h lâi thiaⁿ;

góa beh kóng-khí I ūi góa só͘ chòe ê sū.

17Góa bat ēng góa ê chhùi kiû-kiò I,

ēng góa ê chi̍h chheng-chàn I, chun-chông I.

18Góa sim-lāi nā ū khǹg pháiⁿ ê liām-thâu,

Chú it-tēng bōe thiaⁿ.

19M̄-kú Siōng-tè si̍t-chāi ū thiaⁿ--kìⁿ;

I í-keng àⁿ-lo̍h thiaⁿ góa kî-tó ê siaⁿ.

20Siōng-tè eng-kai siū chheng-chàn;

I m̄-bat kū-choa̍t góa ê kî-tó,

m̄-bat hō͘ I ê chû-ài lī-khui góa.

Si-phian 66 - 現代台語譯本羅馬字版(TTVR)-闽南语

Learn More About Us