Í-se-kiat-su 14

Í-se-kiat-su 14 - 現代台語譯本羅馬字版(TTVR)-闽南语

Siōng-tè Chek-pī Pài Ngó͘-siōng

1Ū kúi ê Í-sek-lia̍t-lâng ê tiúⁿ-ló lâi chhē góa, chē tī góa ê bīn-chêng.

2Hit-sî, Siōng Chú tùi góa kóng,

3“Jîn-chú, chiah-ê lâng ê sim choán-ǹg ngó͘-siōng, poa̍h-tó hoān-chōe. Góa kiám thang hôe-èng in ê kî-kiû?

4“Lí tio̍h kā in kóng, ‘Chì-koân ê Siōng Chú án-ni kóng: Í-sek-lia̍t-lâng nā sim choán-ǹg ngó͘-siōng, poa̍h-tó hoān-chōe, koh lâi chhē-kiû sian-ti, góa Siōng Chú beh chiàu in pài ngó͘-siōng ê chōe kā in pò-èng.

5Góa án-ni chòe sī beh hō͘ in ê sim choán-ǹg góa, in-ūi ngó͘-siōng hō͘ Í-sek-lia̍t-lâng lī-khui góa, kap góa so͘-oán.’

6“Só͘-í, lí tio̍h kā Í-sek-lia̍t-lâng kóng, ‘Chì-koân ê Siōng Chú án-ni kóng: Tio̍h hôe-thâu, khì-sak lín ê ngó͘-siōng, sim lī-khui só͘-ū thang iàm-ò͘ⁿ ê sū.’

7“Bô-lūn sī Í-sek-lia̍t-lâng, á-sī tòa tī in tiong-kan ê gōa-cho̍k-lâng, nā lī-khui góa, sim choán-ǹg ngó͘-siōng, bīn ǹg ōe hō͘ in poa̍h-tó ê chōe, chiah lâi sian-ti chia kiû-mn̄g góa, góa Siōng Chú beh chhin-sin pò-èng i.

8Góa beh pìⁿ-bīn kap i choh-tùi, hō͘ i chiâⁿ-chòe lâng ê kàm-kài kap chhiàu-tâm. Góa beh tùi góa ê chú-bîn tiong kā i kek-chhut. Án-ni, lín chiū chai góa sī Siōng Chú.

9“Nā ū sian-ti siū bê-he̍k kóng ū-giân, chún-kóng sī góa Siōng Chú hō͘ i siū bê-he̍k, góa mā beh chhun-chhiú hêng-hoa̍t i, kā i tùi góa ê chú-bîn Í-sek-lia̍t-lâng tiong-kan siau-bia̍t.

10In tio̍h tùi ka-kī ê chōe hū chek-jīm; kiû-mn̄g ê lâng ê hêng-hoa̍t kap sian-ti ê hêng-hoa̍t siâng-khoán.

11Án-ni, Í-sek-lia̍t-lâng chiah bōe koh bê-sit lī-khui góa, bōe koh hoān-chōe hō͘ ka-kī siū ù-jiám. In beh chòe góa ê chú-bîn; góa beh chòe in ê Siōng-tè. Chì-koân ê Siōng Chú án-ni soan-kò.”

Ná-a, Tān-í-lí, Iok-pek

12Siōng Chú tùi góa kóng,

13“Jîn-chú, nā ū chi̍t ê kok-ka hoān-chōe pōe-ge̍k góa, góa beh chhun-chhiú chhiat-tn̄g in niû-si̍t ê lâi-goân, hō͘ ki-hng lîm-kàu, lâng kap cheng-siⁿ lóng gō-sí;

14chún-kóng Ná-a, Tān-í-lí, Iok-pek saⁿ ê lâng lóng tòa tī hia, in ê chèng-ti̍t kan-ta ōe-tàng kiù in ka-kī. Chì-koân ê Siōng Chú án-ni soan-pò͘.

15“Góa nā hō͘ iá-siù kiâⁿ-thàu chit-ê só͘-chāi, sì-kòe thún-ta̍h, kā-sí chū-bîn, hō͘ tōe pha-hng, hō͘ lâng m̄-káⁿ tùi hia keng-kè.

16Góa — Chì-koân ê Siōng Chú kí góa éng-oán ê oa̍h-miā li̍p-sè, chún-kóng hit saⁿ ê lâng tòa tī hia, in mā bōe-tàng kiù in ê kiáⁿ-jî; in kan-ta ōe-tàng kiù ka-kī, thó͘-tōe iû-goân pha-hng.

17“Á-sī, góa nā hō͘ hit só͘-chāi tú-tio̍h chiàn-loān, lâng kap cheng-siⁿ lóng hō͘ to-kiàm thâi-sí,

18góa — Chì-koân ê Siōng Chú kí góa éng-oán ê oa̍h-miā li̍p-sè, chiū-sī hit saⁿ ê lâng tòa tī hia, in mā bōe-tàng kiù in ê kiáⁿ-jî; in kan-ta ōe-tàng kiù ka-kī.

19“Á-sī, góa hoat ke̍k-tōa ê siū-khì, hō͘ un-e̍k tī hit só͘-chāi liû-hêng, chiong lâng kap cheng-siⁿ lóng bia̍t-choa̍t,

20sui-jiân ū Ná-a, Tān-í-lí, Iok-pek tòa tī hia, góa — Chì-koân ê Siōng Chú kí góa éng-oán ê oa̍h-miā li̍p-sè, in mā bōe-tàng kiù in ê kiáⁿ-jî; in ê chèng-ti̍t kan-ta ōe-tàng kiù in ka-kī.

21“Chì-koân ê Siōng Chú án-ni kóng: Góa nā ēng chiàn-loān, ki-hng, iá-siù, kap un-e̍k chit sì chióng khó-phàⁿ ê chai-lān hêng-hoa̍t Iâ-lō͘-sat-léng, chiong lâng kap cheng-siⁿ lóng tû-bia̍t, án-ni kiám m̄-sī koh-khah giâm-tiōng?

22Nā ū lâng oa̍h--lo̍h-lâi, chiong in ê hāu-siⁿ cha-bó͘-kiáⁿ chhōa-lâi lín chia, lín khòaⁿ-kìⁿ in ê só͘-kiâⁿ-só͘-chòe, chiū ōe bêng-pe̍k góa án-ni hêng-hoa̍t Iâ-lō͘-sat-léng sī eng-kai--ê,

23mā ōe liáu-kái góa só͘ chòe--ê m̄-sī bô lí-iû. Chì-koân ê Siōng Chú án-ni soan-kò.”

Í-se-kiat-su 14 - 現代台語譯本羅馬字版(TTVR)-闽南语

Learn More About Us