Si-phian 83 - 現代台語譯本羅馬字版(TTVR)-闽南语

A-sat ê si.Kiû Siōng Chú Siau-bia̍t Tùi-te̍k

1Siōng-tè ah, kiû lí m̄-thang tiām-tiām;

Siōng-tè ah, kiû lí m̄-thang bô khui-chhùi, bô chhut-siaⁿ.

2In-ūi lí ê tùi-te̍k teh jiáu-loān;

oàn-hūn lí ê lâng teh hoán-poān.

3In ēng kan-chà ê kè-bô͘ beh hāi lí ê chú-bîn;

in chham-siông beh hāi lí pó-hō͘ ê lâng.

4In kóng, “Lâi, lán lâi siau-bia̍t in, hō͘ in bông kok,

hō͘ Í-sek-lia̍t ê miâ éng-oán siau-sit.”

5In tâng-sim chham-siông,

li̍p-iok liân-bêng beh tùi-khòng lí;

6in chiū-sī tòa pò͘-pîⁿ ê Í-tong kap Í-si̍t-má-lī-lâng,

Mô͘-ap kap Hā-kah-lâng,

7 Ka-pa-le̍k, A-bûn, kap A-má-le̍k,

Hui-lī-sū, í-ki̍p Thài-ní ê chū-bîn;

8 A-su̍t mā kap in liân-ha̍p,

chòe Lô-tek kiáⁿ-sun ê liân-bêng.

9Kiû lí tùi-hù in chhin-chhiūⁿ tùi-hù Bí-tiân-lâng,

chhin-chhiūⁿ lí tī Ki-sūn-hô tùi-hù Se-se-la kap Iâ-pin.

10In tī Ún To-ní bia̍t-bông,

pìⁿ-chòe tōe-chiūⁿ ê pùn-sò.

11Kiû lí hō͘ in ê léng-siù chhin-chhiūⁿ Gô-li̍p kap Se-i-pek,

hō͘ in ê kun-tiúⁿ lóng chhin-chhiūⁿ Se-pa kap Sat-bō͘-ná.

12In kóng, “Lán tio̍h lâi-khì,

kā Siōng-tè ê bo̍k-tiûⁿ chiàm-chòe lán ê.”

13Góa ê Siōng-tè ah, kiû lí hō͘ in chhin-chhiūⁿ kńg-lê-á-hong kńg--khí-lâi ê tîn-ai,

chhin-chhiūⁿ hō͘ hong chhe-cháu ê chháu-á-iù.

14Hé án-chóaⁿ sio chhiū-nâ,

hé-iām án-chóaⁿ sio soaⁿ-niá,

15kiû lí mā án-ni ēng lí ê kông-hong tui-kóaⁿ in,

ēng lí ê pō-ú hō͘ in kiaⁿ-hiâⁿ.

16Siōng Chú ah, kiû lí hō͘ in móa-bīn kiàn-siàu,

thang lâi chhē-kiû lí.

17Goān in éng-oán kiàn-siàu kiaⁿ-hiâⁿ;

goān in làu-khùi bia̍t-bông.

18Goān in chai chí-ū lí sī Siōng Chú,

sī chiáng-koán choân-tōe Chì-koân ê Siōng-tè.

Learn More About Us