Le̍k-tāi-chì Hā-koàn 28

Le̍k-tāi-chì Hā-koàn 28 - 現代台語譯本羅馬字版(TTVR)-闽南语

Iû-tāi-ông A-hap-su(2 Ông 16.1-4)

1 A-hap-su chē-ūi ê sî jī-cha̍p hè, tī Iâ-lō͘-sat-léng choh-ông cha̍p-la̍k nî; i bô chhin-chhiūⁿ i ê chó͘-sian Tāi-pi̍t chòe Siōng Chú khòaⁿ-chòe hó ê sū,

2tian-tò khì kiâⁿ Í-sek-lia̍t hiah-ê ông ê lō͘, sīm-chì chù-chō Pa-le̍k ê sîn-siōng,

3tī Him-lūn-chú Soaⁿ-kok sio-hiuⁿ, sio i ê kiáⁿ-jî hiàn-chòe chè, o̍h Siōng Chú tī in bīn-chêng kóaⁿ-chhut ê lia̍t-kok só͘ chòe khó-ò͘ⁿ ê sū;

4koh tī soaⁿ-thâu-tôaⁿ, ta̍k-ê soaⁿ-lûn-á, ta̍k-châng chhiⁿ-chhùi ê chhiū ē-bīn hiàn-chè sio-hiuⁿ.

Kap Sū-lī-a, Í-sek-lia̍t Kau-chiàn(2 Ông 16.5)

5 A-hap-su hoān-chōe, Siōng Chú — i ê Siōng-tè chiū chiong i kau tī Sū-lī-a-ông ê chhiú. Sū-lī-a-ông kā i phah-pāi, lia̍h i chin chōe ê jîn-bîn khì Tāi-má-sū-kek. Siōng Chú koh kā i kau tī Í-sek-lia̍t-ông ê chhiú, thâi-sí chin chōe Iû-tāi-lâng.

6Lī-má-lī ê kiáⁿ Í-sek-lia̍t-ông Pí-ka chi̍t ji̍t ê tiong-kan thâi-sí cha̍p-jī-bān ê Iû-tāi cheng-peng; in-ūi in khì-sak Siōng Chú — in lia̍t-chó͘ ê Siōng-tè.

7Ū chi̍t ê Í-sek-lia̍t ê ióng-sū Sè-ki-lī, thâi-sí ông ê kiáⁿ Má-se-ngá, koán-lí ông-kiong ê A-su-lī-kan, kap cháiⁿ-siòng Í-lī-ka-ná.

8Í-sek-lia̍t-lâng lia̍h in ê hiaⁿ-tī Iû-tāi-lâng, pau-koat hū-jîn-lâng, kiáⁿ, cha-bó͘-kiáⁿ, kiōng jī-cha̍p-bān; koh chhiúⁿ chin chōe chiàn-lī-phín, tòa-khì Sat-má-lī-a.

Sian-ti Gô-tek

9Tī Sat-má-lī-a, ū chi̍t ê Siōng Chú ê sian-ti kiò-chòe Gô-tek. I chhut-khì gêng-chiap hiah-ê tńg-lâi Sat-má-lī-a ê kun-peng, kā in kóng, “Siōng Chú — lín lia̍t-chó͘ ê Siōng-tè tùi Iû-tāi siū-khì, só͘-í chiong in kau tī lín ê chhiú, lín kèng-jiân siū-khì tú-thiⁿ, thâi-sí in hiah chōe lâng.

10Taⁿ lín siūⁿ-beh kiông-pek chiah-ê Iû-tāi-lâng kap Iâ-lō͘-sat-léng-lâng, bô-lūn lâm-lú lóng chòe lín ê lô͘-lē, án-ni lín kiám m̄-sī tek-chōe Siōng Chú — lín ê Siōng-tè?

11Tio̍h thiaⁿ góa kóng, lín lia̍h--lâi-ê sī lín ê hiaⁿ-tī chí-bē, tio̍h pàng in tò--khì, in-ūi Siōng Chú ê tōa siū-khì í-keng lîm-kàu lín.”

12Tùi án-ni, ū kúi-nā ê Í-hoat-liân ê léng-siù, chiū-sī Iok-hap-lân ê kiáⁿ A-sat-lī-ngá, Bí-si̍t-lī-boa̍t ê kiáⁿ Pí-lī-ka, Sa-liông ê kiáⁿ Hi-se-ka, kap Hap-tek-lâi ê kiáⁿ A-má-sat khí-lâi chó͘-chí hiah-ê tùi chiàn-tiûⁿ tò--lâi ê kun-peng,

13tùi in kóng, “Lín m̄-thang chiong chiah-ê hu-ló͘ tòa-lâi chia. Lán í-keng tek-chōe Siōng Chú, lín siūⁿ-beh koh ke-thiⁿ lán ê chōe kap kè-sit sī--bô? Lán ê chōe í-keng chin tāng, ū Siōng Chú ê tōa siū-khì lîm-kàu Í-sek-lia̍t lah.”

14Tùi án-ni, kun-peng chiū tī hiah-ê léng-siù kap hōe-chiòng ê bīn-chêng, chiong lia̍h--lâi ê lâng kap chiàn-lī-phín kau--chhut-lâi.

15Téng-bīn hit sì ê léng-siù chiū khí--lâi, chiàu-kò͘ hiah-ê siū-lia̍h ê lâng; tùi chiàn-lī-phín the̍h saⁿ kap ôe hō͘ thǹg-theh--ê chhēng, koh hō͘ in lim-chia̍h, ēng iû kā in boah; hō͘ kiâⁿ bōe khì--ê khiâ-lû; chiong hiah-ê siū-lia̍h--ê sàng-khì Chang-chhiū-siâⁿ Iâ-lī-ko in ê tông-pau hia. Āu-lâi Í-sek-lia̍t-lâng chiū tò-khì Sat-má-lī-a.

A-hap-su Chhéng-kiû A-su̍t-ông Oān-chō͘(2 Ông 16.7-9)

16Hit-sî, A-hap-su-ông phài sù-chiá khì kìⁿ A-su̍t hiah-ê ông, chhéng-kiû in oān-chō͘,

17in-ūi Í-tong-lâng koh lâi phah Iû-tāi, lia̍h chin chōe lâng chòe hu-ló͘.

18Hui-lī-sū-lâng mā lâi chhim-hoān sai-pêng soaⁿ-po͘ kap Iû-tāi lâm-pêng ê siâⁿ-tìn, kong-chiàm Pek Sī-be̍k, A-ngá-lûn, Ki-te-lô, í-ki̍p So-ko, Têng-ná, Kín-só chiah-ê siâⁿ kap hù-kūn ê chng-siā, koh tòa tī hia.

19Siōng Chú ūi-tio̍h Iû-tāi-ông A-hap-su ê iân-kò͘, hō͘ Iû-tāi soe-bî, in-ūi A-hap-su tī Iû-tāi lām-sám chòe, pōe-ge̍k Siōng Chú.

20A-su̍t-ông Thê-kek-la Pí-lia̍t-sek chiūⁿ--lâi, bô pang-chān i, tian-tò kā i khi-ap.

21A-hap-su tùi Siōng Chú ê tiān, ông-kiong, kap koaⁿ-oân ê ke the̍h châi-pó sàng hō͘ A-su̍t-ông, m̄-kú A-su̍t-ông bô beh lâi pang-chān i.

A-hap-su ê Chōe

22 A-hap-su chit-ê ông tī gûi-kip ê sî, jú tek-chōe Siōng Chú.

23I hiàn-chè hō͘ phah i ê Tāi-má-sū-kek ê sîn-bêng; i kóng, “In-ūi Sū-lī-a-ông ê sîn-bêng pang-chān in, góa mā beh ǹg chiah-ê sîn-bêng hiàn-chè, hō͘ in thang pang-chān góa.” M̄-kú hiah-ê sîn-bêng tian-tò hō͘ A-hap-su kap choân Í-sek-lia̍t jîn-bîn soe-pāi.

24A-hap-su chiong Siōng-tè sèng-tiān ê khì-khū lóng chi̍p óa--lâi, kā in phah-chhùi; i koh chiong Siōng Chú sèng-tiān ê mn̂g koaiⁿ--khí-lâi, tī Iâ-lō͘-sat-léng ta̍k-tiâu koe-lō͘ ê oat-kak khí chè-tôaⁿ.

25I koh tī Iû-tāi ta̍k-ê siâⁿ khí soaⁿ-thâu-tôaⁿ, sio-hiuⁿ hō͘ pa̍t-ê sîn-bêng, jiá Siōng Chú — i ê lia̍t-chó͘ ê Siōng-tè siū-khì.

26 A-hap-su kî-tha ê sū-chek kap i ê só͘-chòe, tùi thâu kàu bé lóng kì-chài tī Iû-tāi kap Í-sek-lia̍t Lia̍t-ông-sú.

27A-hap-su tńg-khì i ê lia̍t-chó͘ hia, lâng kā i an-chòng tī Iâ-lō͘-sat-léng-siâⁿ, bô chòng tī Í-sek-lia̍t chiah-ê ông ê bōng. I ê kiáⁿ Hi-se-ka sòa-chiap i choh-ông.

Le̍k-tāi-chì Hā-koàn 28 - 現代台語譯本羅馬字版(TTVR)-闽南语

Learn More About Us