Chim-giân 20

Chim-giân 20 - 現代台語譯本羅馬字版(TTVR)-闽南语

1Po̍h-chiú hō͘ lâng hòng-chhiòng, kāu-chiú hō͘ lâng hoat-kông;

in-ūi chiú lâi bê-sit sī bô tì-hūi.

2Ông tōa siū-khì chhin-chhiūⁿ sai tōa-siaⁿ háu;

jiá i siū-khì ōe hāi-tio̍h ka-kī ê sìⁿ-miā.

3Pī-bián hun-cheng ê lâng thang chheng-chàn,

m̄-kú gōng-lâng ài oan-ke.

4Pîn-tōaⁿ ê lâng bô beh chiàu-sî chèng-choh,

siu-koah ê sî chhē bô pòaⁿ-hāng.

5Lâng sim-lāi ê kè-bô͘ chhin-chhiūⁿ chhim ê chúi,

chí-ū bêng-lí ê lâng chiah ōe kā i chhiūⁿ--khí-lâi.

6Kóng ka-kī tiong-sêng ê lâng chin chōe,

m̄-kú tiong-si̍t ê lâng beh khì tó-ūi chhē?

7Chiàu chèng-ti̍t kiâⁿ ê gī-lâng,

i ê kiáⁿ-kiáⁿ-sun-sun chin ū hok-khì!

8Ông chē tī sím-phòaⁿ ê ūi,

i ê ba̍k-chiu kàm-chhat lóng-chóng ê pháiⁿ.

9Siáⁿ-lâng káⁿ kóng “Góa í-keng kiat-chēng góa ê sim,

góa ê chōe í-keng chheng-khì”?

10Ēng phiⁿ--lâng ê chhìn-thûi, pián--lâng ê táu,

lóng sī Siōng Chú só͘ iàm-ò͘ⁿ.

11Gín-á sī sûn-kiat á-sī chèng-ti̍t,

tùi i ê hêng-ûi khòaⁿ ōe chhut.

12Ōe thiaⁿ ê hī-khang, ōe khòaⁿ ê ba̍k-chiu,

nn̄g hāng lóng sī Siōng Chú só͘ chō.

13M̄-thang tham-bîn chiah bián tì-kàu sàn-chhiah;

ba̍k-chiu peh hō͘ kim chiah ū kàu-gia̍h ê bí-niû.

14Lâng bóe-mi̍h ê sî hiâm kóng “M̄ hó, m̄ hó”,

bóe liáu, ka-kī khoa-kháu chin hó.

15Sui-jiân ū kim, koh ū chin chōe pó-chio̍h,

m̄-kú ū tì-sek ê chhùi-tûn chiah sī tin-pó.

16Kā siⁿ-hūn-lâng tam-pó, tio̍h the̍h ka-kī ê saⁿ khì chòe tí-ah;

thòe gōa-lâng pó-chèng, tio̍h ka-kī sêng-tam hō͘-kó.

17Pián--lâi ê chia̍h-mi̍h chu-bī chin hó,

āu-lâi chiū chhin-chhiūⁿ chhùi teh pō͘ soa.

18Chham-siông ōe hō͘ kè-ōe sêng-kong;

hó ê chhek-lio̍k ōe hō͘ kau-chiàn sèng-lī.

19Sì-kòe kóng lâng sī-hui--ê, ōe lāu-sia̍p lâng ê pì-bi̍t;

kāu-ōe--ê, m̄-thang kap i kiat-kau.

20Chiù-chó͘ pē-bú--ê,

i ê sìⁿ-miā ōe chhin-chhiūⁿ teng tī ke̍k o͘-àm ê tiong-kan sit--khì.

21Chin kín tit--tio̍h ê châi-hù,

kàu-bé bô it-tēng sī chiok-hok.

22M̄-thang kóng “Góa beh pò-oan”;

tio̍h thèng-hāu Siōng Chú, I ōe kiù lí.

23Phiⁿ--lâng ê chhìn-thûi sī Siōng Chú só͘ iàm-ò͘ⁿ;

pián--lâng ê thian-phêng mā m̄ hó.

24Lâng kiám ōe chai i ka-kī ê lō͘?

Lâng ê kha-pō͘ sī Siōng Chú teh koat-tēng.

25M̄-thang sûi-piān kóng “Che sī beh hiàn hō͘ Siōng-tè ê mi̍h”,

chiah bián hē-goān liáu soah hō͘-hóe.

26Tì-hūi ê ông chhin-chhiūⁿ ēng pòa-ki kā pháiⁿ-lâng pòa--chhut-lâi,

ēng chhia-lián kā in géng--kè.

27Lâng ê sim-lêng sī Siōng Chú ê teng,

chhâ-bêng ka-kī ê sim-su ì-liām.

28Chû-ài sìn-si̍t pó-hō͘ kok-ông;

i ê chō-ūi in-ūi jîn-chû tit-tio̍h pó-choân.

29Ióng-kiāⁿ sī siàu-liân-lâng ê êng-kng;

pe̍h thâu-mn̂g sī lāu-lâng ê kong-chhái.

30Piⁿ-phah ōe tû-khì lâng ê chōe-ok;

phah-siong ōe kiat-chēng lâng ê sim-su ì-liām.

Chim-giân 20 - 現代台語譯本羅馬字版(TTVR)-闽南语

Learn More About Us