Í-sài-a-su 38

Í-sài-a-su 38 - 現代台語譯本羅馬字版(TTVR)-闽南语

Hi-se-ka-ông Phòa-pīⁿ(2 Ông 20.1-11; 2 Tāi 32.24-26)

1Hit-ê sî-chūn, Hi-se-ka phòa-pīⁿ, pīⁿ kah teh-beh sí. A-mô͘-su ê kiáⁿ sian-ti Í-sài-a lâi kìⁿ i, kóng, “Siōng Chú án-ni kóng, ‘Lí ê hō͘-sū tio̍h kau-tài hó-sè, in-ūi lí ōe sí, pīⁿ bōe hó.’”

2 Hi-se-ka chiū oa̍t-tńg-sin ǹg piah, tùi Siōng Chú kî-tó kóng,

3“Siōng Chú ah, kiû lí tài-liām góa án-chóaⁿ tiong-sêng chīn-sim ho̍k-sāi lí, chòe lí khòaⁿ-chòe hó ê sū.” Hi-se-ka chiū tōa-siaⁿ thî-khàu.

4Jiân-āu Siōng Chú tùi Í-sài-a kóng,

5“Lí khì kā Hi-se-ka kóng, ‘Siōng Chú — lí ê chó͘-sian Tāi-pi̍t ê Siōng-tè án-ni kóng: Góa ū thiaⁿ-tio̍h lí ê kî-tó, ū khòaⁿ-tio̍h lí ê ba̍k-sái. Khòaⁿ leh, góa beh hō͘ lí ê hè-siū ke-thiⁿ cha̍p-gō͘ nî.

6Góa beh kái-kiù lí kap chit-ê siâⁿ thoat-lī A-su̍t-ông ê chhiú; góa ōe pó-hō͘ chit-ê siâⁿ.’”

21 Í-sài-a kóng, “Tio̍h the̍h chi̍t tè bû-hoa-kó io̍h-ko tah tī lia̍p-á, ông chiū ōe hó.”

22Hi-se-ka mn̄g kóng, “Ū sím-mi̍h tiāu-thâu hō͘ góa chai, góa ōe chiūⁿ-khì Siōng Chú ê tiān?”

7 Í-sài-a kóng, “Siōng Chú beh si̍t-hiān I só͘ kóng ê tāi-chì; che chiū-sī Siōng Chú hō͘ lí ê tiāu-thâu.

8Khòaⁿ leh, Siōng Chú beh hō͘ chiò tī A-hap-su só͘ chō ji̍t-kui ê ji̍t-iáⁿ tò-thè cha̍p tō͘.” Kó-jiân, ji̍t-iáⁿ tò-thè cha̍p tō͘.

9 Iû-tāi-ông Hi-se-ka pīⁿ hó liáu-āu siá chit-siú si:

10Góa siūⁿ-kóng:

Góa tī chòng-liân ê sî tio̍h lī-khui sè-kan,

kiâⁿ-ji̍p Im-kan ê mn̂g,

bōe-tàng hióng-siū góa só͘ chhun ê ji̍t-chí.

11Góa siūⁿ-kóng:

Tī oa̍h-lâng ê tōe,

góa bōe-tàng koh kìⁿ-tio̍h Siōng Chú;

tī sè-kan ê chū-bîn tiong,

góa bōe-tàng koh khòaⁿ-tio̍h lâng.

12Góa tòa ê só͘-chāi siū thiah,

chhin-chhiūⁿ bo̍k-chiá ê pò͘-pîⁿ siū sóa-cháu.

Siōng Chú chhin-chhiūⁿ chit-pò͘ ê lâng,

chiong góa ê sìⁿ-miā kńg--khí-lâi,

koh tùi chit-pò͘-ki kā pò͘ chián-tn̄g;

I tī chi̍t ji̍t ê tiong-kan chiū beh kiat-sok góa ê sìⁿ-miā.

13Góa kui-mî ai-khàu ti̍t-kàu chheng-chá;

I chhin-chhiūⁿ sai thiah-chhùi góa só͘-ū ê kut-thâu;

tī chi̍t ji̍t ê tiong-kan chiū beh kiat-sok góa ê sìⁿ-miā.

14Góa chhin-chhiūⁿ ìⁿ-á chiu̍h-chiu̍h-kiò,

chhin-chhiūⁿ hún-chiáu kū-kū-háu.

Góa gia̍h-thâu ǹg thiⁿ, ba̍k-chiu ian-n̄g ià-siān.

Góa siū khi-ap, Chú ah, kiû lí kái-kiù góa.

15Góa ōe-tàng kóng sím-mi̍h?

I kā góa èng-ún, mā ū chiàu án-ni chòe.

Góa sim-sîn khó͘-thàng,

sit-bîn, ut-chut kè-ji̍t.

16Chú ah, lâng khò lí lâi oa̍h;

góa ê sim-sîn tùi lí ê èng-ún tit-tio̍h khùi-la̍t.

Lí ū hôe-ho̍k góa ê kiān-khong,

hō͘ góa kè-sio̍k oa̍h--lo̍h-khì.

17Góa siū hiah-ni̍h tōa ê khó͘-thàng,

khak-si̍t ū hō͘ góa tit-tio̍h lī-ek.

Lí chín-kiù góa ê sìⁿ-miā thoat-lī bia̍t-bông ê Chhim-khiⁿ,

chiong góa ê chōe hiat tī lí ê ka-chiah-āu.

18In-ūi Im-hú bōe-tàng kám-siā lí,

Sí-bông mā bōe chheng-chàn lí.

Hiah-ê lo̍h Im-hú ê lâng

bōe-tàng kî-thāi lí ê sìn-si̍t.

19Oa̍h ê lâng, chí-ū oa̍h--teh ê lâng ōe-tàng chheng-chàn lí,

chhin-chhiūⁿ góa kin-á-ji̍t án-ni.

Choh lāu-pē--ê beh hō͘ in só͘-ū ê kiáⁿ-jî chai lí ê sìn-si̍t.

20Siōng Chú beh chín-kiù góa;

goán beh chi̍t-sì-lâng tī Siōng Chú ê chhù,

ēng hiân-ga̍k phōaⁿ-chàu chhiùⁿ-koa.

Í-sài-a-su 38 - 現代台語譯本羅馬字版(TTVR)-闽南语

Learn More About Us