Í-sài-a-su 28

Í-sài-a-su 28 - 現代台語譯本羅馬字版(TTVR)-闽南语

Kéng-kò Pak Ông-kok

1 Í-hoat-liân chiú-chùi ê lâng só͘ teh khoa-iāu ê hoa-koan, taⁿ chhám ah!

Hit-lúi chhia-iāⁿ ê súi-hoe chiām-chiām siā--khì.

In tī pûi-súi ê soaⁿ-kok téng-bīn,

lim kah chùi-bâng-bâng.

2Khòaⁿ leh, Chú phài chi̍t ê ū tōa koân-lêng ū tōa khùi-la̍t ê lâng lâi kong-kek in,

chhin-chhiūⁿ kiông-lia̍t ê pha̍uh,

húi-bia̍t ê kông-hong,

chhin-chhiūⁿ pō-ú, béng-lia̍t ê tōa-chúi chhiâng-lo̍h tāi-tōe.

3Hit-ê chiú-chùi ê lâng só͘ khoa-iāu ê hoa-koan ōe siū thún-ta̍h tī kha-ē.

4Hit-lúi tī pûi-súi ê soaⁿ-kok téng-bīn,

khui kah chin chhia-iāⁿ, chiām-chiām siā--khì ê súi-hoe,

ōe chhin-chhiūⁿ hē-thiⁿ chêng thâu-chúi ê bû-hoa-kó,

lâng khòaⁿ--tio̍h sûi-sî bán khì chia̍h.

5Tī hit-ji̍t, Siōng Chú — Bān-kun ê Thóng-sòe

beh chhin-chhiūⁿ êng-iāu ê hoa-koan,

chòe I só͘ chhun ê chú-bîn êng-kng ê ông-koan,

6hō͘ chē-teh sím-phòaⁿ hit-ūi ū kong-chèng ê sîn,

chiâⁿ-chòe in tī siâⁿ-mn̂g-kháu phah-thè tùi-te̍k ê khùi-la̍t.

Í-sài-a kap Iû-tāi Chiú-chùi ê Sian-ti

7Chè-si kap sian-ti in-ūi lim-chiú tian-tian-tó-tó,

in-ūi kāu-chiú tian-lâi-tian-khì.

Chiah-ê lâng in-ūi lim kāu-chiú kho̍k-kho̍k-tian,

lim po̍h-chiú chùi-bâng-bâng.

In in-ūi kāu-chiú tang-tó-sai-oai,

chhò-kái īⁿ-siōng,

phòaⁿ-koat hoán-khí-hoán-tó.

8In ê toh-téng thò͘ kah móa-sì-kòe,

bô chi̍t ê só͘-chāi bô lâ-sâm.

9In kóng, “Chit-ê sian-ti sī beh kā tì-sek kà siáⁿ-lâng?

I sī teh kā siáⁿ-lâng kóe-seh sìn-sit?

Sī beh kà tú-á tn̄g-lin,

tú-á lī-khui lāu-bú heng-chêng ê gín-á sī--bô?

10I ki-ki-kū-kū, li-li-lū-lū,

chia kóng chi̍t-kóa, hia kóng chi̍t-kóa,

m̄-chai teh kóng sím-mi̍h.”

11Án-ni hó, Chú beh ēng I ê chú-bîn thiaⁿ bô ê gōa-kok-ōe,

ēng pa̍t-khoán khiuⁿ-kháu tùi in kóng-ōe.

12I bat tùi in kóng,

“Che sī an-hioh ê só͘-chāi, ià-siān ê lâng thang lâi an-hioh;

che sī hioh-khùn ê só͘-chāi.”

Iáu-kú in m̄ thiaⁿ.

13Só͘-í, Siōng Chú ê ōe in thiaⁿ--khí-lâi sī:

Ki-ki-kū-kū, li-li-lū-lū,

chia kóng chi̍t-kóa, hia kóng chi̍t-kóa.

Só͘-í, in kiâⁿ chìn-chêng, soah tò-siàng-hiàⁿ,

siū-siong, poa̍h-lo̍h oa̍h-tauh, hō͘ lâng lia̍h--khì.

Sek-an ê Ki-chio̍h

14Lín chiah-ê chū-ko chū-tāi,

Iâ-lō͘-sat-léng chū-bîn ê thóng-tī-chiá,

tio̍h thiaⁿ Siōng Chú ê ōe.

15In-ūi lín khoa-kháu kóng,

“Goán í-keng kap Sí-bông chhiam-iok,

mā ū kap Im-hú kiat-bêng.

Tōa-chúi chhiong--kè-lâi, bōe im-tio̍h goán;

in-ūi goán ū ēng pe̍h-chha̍t chòe pī-lān-só͘,

ēng hu-ké chòe siám-bih ê só͘-chāi.”

16Só͘-í, Chì-koân ê Siōng Chú án-ni kóng,

“Lí khòaⁿ, góa beh tī Sek-an hē chi̍t tè chio̍h,

sī chhì-giām--kè ê chio̍h, pó-kùi ê ki-chio̍h,

thang chòe kian-kò͘ ê kun-ki;

óa-khò I ê lâng choa̍t-tùi bōe kiaⁿ-hiâⁿ tio̍h-kip.

17Góa beh ēng chèng-ti̍t chòe chîn-sòaⁿ,

ēng kong-gī chòe tūi-chîn.

Peng-pha̍uh beh húi-hoāi pe̍h-chha̍t ê lâng ê pī-lān-só͘;

tōa-chúi ōe im-móa lín siám-bih ê só͘-chāi.

18Lín kap Sí-bông li̍p ê iok it-tēng ōe hòe-tû,

kap Im-hú chhiam ê iok mā ōe chhú-siau.

Tōa-chúi im--kè-lâi ê sî,

ōe kā lín im--sí.

19Múi chi̍t piàn tōa-chúi lâi ê sî,

ōe kā lín chhiong cháu;

tōa-chúi ōe ta̍k chá-khí im--kè-lâi,

kui-mî kui-ji̍t im bōe soah,

chai-iáⁿ che siau-sit ê lâng lóng ōe kiaⁿ-hiâⁿ khióng-hông.”

20Bîn-chhn̂g siuⁿ té, seng-khu chhun bōe ti̍t;

mî-phē siuⁿ oe̍h, khàm bōe ba̍t.

21Siōng Chú beh khí--lâi,

chhin-chhiūⁿ tī Pí-la-sim-soaⁿ;

I siū-khì,

chhin-chhiūⁿ tī Ki-piàn-kok.

I beh chòe kang, sī te̍k-pia̍t ê kang;

I beh oân-sêng I ê kè-ōe, sī kî-īⁿ ê kè-ōe.

22Só͘-í, m̄-thang chū-ko chū-tāi,

chiah bián pa̍k lín ê soh khún jú ân;

in-ūi góa tùi Chì-koân Siōng Chú — Bān-kun ê Thóng-sòe ū thiaⁿ-tio̍h húi-bia̍t choân-tōe ê bēng-lēng.

Siōng-tè ê Tì-hūi

23Tio̍h àⁿ hī-khang thiaⁿ góa ê siaⁿ;

tio̍h chù-ì thiaⁿ góa kóng ê ōe.

24Lông-hu lôe-chhân beh chèng-choh,

kiám ōe kui-ji̍t lóng teh lôe?

I kiám ōe kè-sio̍k ku̍t-thô͘,

kiám ōe it-ti̍t ó͘-kau?

25I thô͘-bīn nā pê pîⁿ,

kiám bōe sûi-sî iā tōa-hôe-hiong, sió-hôe-hiong?

I kiám bōe chi̍t-chōa chi̍t-chōa chèng tōa-be̍h,

chi̍t-lia̍t chi̍t-lia̍t chèng sió-be̍h,

koh tī hn̂g-piⁿ chèng chho͘-be̍h?

26In-ūi Siōng-tè ēng sek-tòng ê hong-hoat

kā i chí-sī, kā i kà.

27Siâng-khoán, tōa-hôe-hiong bōe ēng táⁿ-kok-ki phah,

sió-hôe-hiong bōe ēng chhia-lián lún;

tōa-hôe-hiong sī ēng thûi-á kòng,

sió-hôe-hiong ēng koáiⁿ-á phah.

28Ngó͘-kok tio̍h seng géng chiah ōe-tàng chòe mī-pau,

m̄-kú bô su-iàu it-ti̍t géng.

Lông-hu ēng bé-chhia lún ngó͘-kok,

mā bōe kā ngó͘-kok lún kàu chhùi-chhùi.

29Che lóng sī Siōng Chú — Bān-kun ê Thóng-sòe ê chok-ûi;

I ê kè-chhek kî-biāu;

I ê tì-hūi chhim-tîm.

Í-sài-a-su 28 - 現代台語譯本羅馬字版(TTVR)-闽南语

Learn More About Us