Sū-su-kì 1

Sū-su-kì 1 - 現代台語譯本羅馬字版(TTVR)-闽南语

Iû-tāi kap Se-biān Chi-cho̍k Lia̍h A-to-nî Pí-sek

1 Iok-su-a sí liáu-āu, Í-sek-lia̍t-lâng chhéng-būn Siōng Chú, kóng, “Goán tó chi̍t ê chi-cho̍k tio̍h tāi-seng khì kong-táⁿ Ka-lâm-lâng?”

2Siōng Chú kóng, “Iû-tāi chi-cho̍k seng khì. Góa í-keng chiong hit-ê tōe kau tī in ê chhiú.”

3 Iû-tāi-lâng tùi in ê chhin-cho̍k Se-biān-lâng kóng, “Chhiáⁿ lín kap goán chòe-hé khì goán thiu--tio̍h ê thó͘-tōe, kap Ka-lâm-lâng kau-chiàn; goán mā ōe án-ni kap lín khì lín thiu--tio̍h ê tōe chòe-hé kau-chiàn.” Se-biān-lâng chiū kap in chòe-hé khì.

4Iû-tāi-lâng chiū chhut-chiàn; Siōng Chú chiong Ka-lâm-lâng kap Pí-lī-sé-lâng kau tī in ê chhiú; in tī Pí-sek thâi-sí chi̍t-bān lâng.

5In tī Pí-sek tú-tio̍h A-to-nî Pí-sek, kap i kau-chiàn, thâi-iâⁿ Ka-lâm-lâng kap Pí-lī-sé-lâng.

6A-to-nî Pí-sek tô-cháu, in tui-jip i, kā i lia̍h--tio̍h, chām-tn̄g i ê chhiú kap i ê kha ê tōa-thâu-bú.

7A-to-nî Pí-sek kóng, “Í-chêng ū chhit-cha̍p ê ông, kha chhiú ê tōa-thâu-bú lóng hō͘ góa chām--khí-lâi, tī góa ê toh-kha khioh chia̍h-mi̍h; taⁿ Siōng-tè chiàu góa só͘ chòe--ê pò-èng góa.” Iû-tāi-lâng tòa i khì Iâ-lō͘-sat-léng; i chiū sí tī hia.

Kong-chhú Iâ-lō͘-sat-léng kap Hi-pek-lûn

8 Iû-tāi-lâng kong-chhú Iâ-lō͘-sat-léng, ēng to thâi-sí siâⁿ-lāi ê lâng, koh pàng-hé sio siâⁿ.

9Āu-lâi, in koh lo̍h-khì kong-táⁿ tòa tī soaⁿ-khu, Nî-kek-hu, kap soaⁿ-po͘ ê Ka-lâm-lâng.

10Iû-tāi-lâng koh kong-táⁿ hiah-ê tòa tī Hi-pek-lûn ê Ka-lâm-lâng, thâi-sí Sī-su, A-hi-bān, Ta̍t-mái; Hi-pek-lûn í-chêng kiò-chòe Ki-lia̍t A-pa.

Gô-tô-liap Cheng-ho̍k Tí-phek(Su 15.15-19)

11 Iû-tāi-lâng tùi hia khì kong-kek Tí-phek ê chū-bîn. Tí-phek í-chêng kiò-chòe Ki-lia̍t Se-hut.

12Ka-le̍k kóng, “Sím-mi̍h-lâng kong-chhú Ki-lia̍t Se-hut, góa chiū chiong góa ê cha-bó͘-kiáⁿ Ap-sat hō͘ i choh-bó͘.”

13Ka-le̍k ê sió-tī Ki-la̍p-su ê kiáⁿ Gô-tô-liap kong-chhú chit-ê siâⁿ, Ka-le̍k chiū chiong cha-bó͘-kiáⁿ Ap-sat hō͘ i choh-bó͘.

14Ap-sat chhut-kè hit-ji̍t, Gô-tô-liap kiò i tio̍h kā i ê lāu-pē thó chi̍t khu hn̂g. Ap-sat tùi lû-á lo̍h--lâi; Ka-le̍k mn̄g i kóng, “Lí beh ài sím-mi̍h?”

15 Ap-sat kóng, “Chhiáⁿ lí hō͘ góa chi̍t hūn lé-mi̍h. Lí ū hō͘ góa chi̍t tè lâm-pêng ê ta-tōe, chhiáⁿ koh hō͘ góa chúi-chôaⁿ.” Ka-le̍k chiū chiong téng-ē nn̄g ê chúi-chôaⁿ lóng hō͘ i.

Iû-tāi kap Piān-ngá-bín Chi-cho̍k ê Sèng-lī

16 Mô͘-se ê tiūⁿ-lâng sī Ki-nî-lâng, i ê hō͘-tāi kap Iû-tāi ê hō͘-tāi tùi Chang-chhiū-siâⁿ Iâ-lī-ko chòe-hé khì A-la-tek lâm-pêng Iû-tāi ê khòng-iá, kap hia ê lâng chòe-hé tòa.

17Iû-tāi-lâng kap in ê chhin-cho̍k Se-biān-lâng chòe-hé phah-pāi tòa tī Sé-hoat ê Ka-lâm-lâng, chiong siâⁿ oân-choân húi-bia̍t; hit-ê siâⁿ chiū kiò-chòe Hô-ní-má

18Iû-tāi-lâng koh kong-chhú Ka-sat, A-si̍t-ki-lûn, Í-kek-lûn kap in chiu-ûi ê thó͘-tōe.

19Siōng Chú kap Iû-tāi-lâng tông-chāi, in chiū chiàm-léng soaⁿ-khu; m̄-kú in bōe-tàng kā tòa tī iân-hái pîⁿ-tōe ê chū-bîn kóaⁿ--chhut-khì, in-ūi hiah-ê lâng ū thih ê chiàn-chhia.

20In chiàu Mô͘-se ê hoan-hù, chiong Hi-pek-lûn hō͘ Ka-le̍k, i chiū tùi hia kóaⁿ-chhut A-la̍p hō͘-tāi saⁿ ê cho̍k.

21Piān-ngá-bín-lâng bô chiong Iâ-pò͘-su-lâng tùi Iâ-lō͘-sat-léng kóaⁿ--chhut-khì; in chiū kap Piān-ngá-bín-lâng chòe-hé tòa tī Iâ-lō͘-sat-léng, ti̍t-kàu kin-á-ji̍t.

Í-hoat-liân kap Má-ná-se Chi-cho̍k Cheng-ho̍k Pek-te̍k-lī

22 Iok-sek-ke, chiū-sī Í-hoat-liân kap Má-ná-se nn̄g ê chi-cho̍k, kong-táⁿ Pek-te̍k-lī; Siōng Chú kap in tông-chāi.

23In phài lâng khì thàm-cha Pek-te̍k-lī; hit-ê siâⁿ í-chêng kiò-chòe Lō͘-su.

24Cheng-thàm khòaⁿ-tio̍h chi̍t ê lâng tùi siâⁿ-lāi chhut--lâi, chiū tùi i kóng, “Chhiáⁿ kā goán kóng, beh án-chóaⁿ ji̍p chit-ê siâⁿ; goán ōe hó-hó-á tùi-thāi lí.”

25Hit-ê lâng chiū pò in ji̍p-siâⁿ ê lō͘. In thâi-sí siâⁿ-lāi ê chū-bîn, chí-ū pàng hit-ê lâng kap i choân-ke.

26Hit-ê lâng khì Hek-lâng ê tōe-khu, khí chi̍t chō siâⁿ, kā i hō-miâ kiò-chòe Lō͘-su; kàu kin-á-ji̍t chit-ê siâⁿ iáu kiò chit-ê miâ.

Í-sek-lia̍t-lâng Bô Kóaⁿ-chhut ê Jîn-bîn

27 Má-ná-se-lâng bô kóaⁿ-chhut Pek Siān, Tha-la̍p, To-ní, Í-pek-liân, Bí-kiat-to, kap chiah-ê siâⁿ hù-kūn chng-siā ê chū-bîn; Ka-lâm-lâng kian-chhî kè-sio̍k tòa tī chiah-ê só͘-chāi.

28Í-sek-lia̍t-lâng kiông-sēng ê sî, chiū hō͘ Ka-lâm-lâng chòe khó͘-kang, bô choân-pō͘ kā in kóaⁿ-cháu.

29 Í-hoat-liân-lâng bô kā tòa tī Ki-sek ê Ka-lâm-lâng kóaⁿ--chhut-khì; Ka-lâm-lâng kè-sio̍k kap in tòa tī Ki-sek.

30 Se-pò͘-lûn-lâng bô kā tòa tī Ki-lûn kap Ná-hap-la ê lâng kóaⁿ--chhut-khì. Ka-lâm-lâng kè-sio̍k kap in chòe-hé tòa, chòe khó͘-kang.

31 A-siat-lâng bô kóaⁿ-chhut A-kho, Se-tùn, A-hek-la, A-kek-sek, Hek-pa, A-hut-kek, kap Lī-ha̍p ê chū-bîn.

32A-siat-lâng kap Ka-lâm-lâng chòe-hé tòa, bô kā in kóaⁿ-cháu.

33 Ná-hut-tha-lī-lâng bô kóaⁿ-chhut Pek Sī-be̍k kap Pek A-la̍p ê chū-bîn. In kap hit só͘-chāi ê Ka-lâm-lâng chòe-hé tòa; m̄-kú Pek Sī-be̍k kap Pek A-la̍p ê chū-bîn lóng ūi in chòe khó͘-kang.

34 A-mô͘-lī-lâng kiông-pek Tān ê lâng tòa tī soaⁿ-khu, put-chún in lo̍h-khì pêng-goân.

35A-mô͘-lī-lâng kè-sio̍k tòa tī Hi-lia̍t-su-soaⁿ, A-ngá-lûn kap Sa-pin; Iok-sek-ke kiông-sēng ê sî, chiū hō͘ in chòe khó͘-kang.

36A-mô͘-lī-lâng ê tōe-kài, tùi A-khek-la-pin soaⁿ-phiâⁿ kàu Se-la pak-pêng.

Sū-su-kì 1 - 現代台語譯本羅馬字版(TTVR)-闽南语

Learn More About Us