Bîn-sò͘-kì 27

Bîn-sò͘-kì 27 - 現代台語譯本羅馬字版(TTVR)-闽南语

Se-lô-hui-hap ê Cha-bó͘-kiáⁿ

1 Iok-sek ê hō͘-tāi Má-ná-se chi-cho̍k tiong-kan, ū Má-ná-se ê goân-sun, Má-kiat ê cheng-sun, Ki-lia̍t ê sun, Hi-hut ê kiáⁿ Se-lô-hui-hap ê cha-bó͘-kiáⁿ, chiū-sī Má-la, Ná-a, Hat-la, Bi̍t-ka, Tek-sat;

2in lâi hōe-bō͘ mn̂g-kháu, khiā tī Mô͘-se, chè-si Í-lī-a-sat, kap chèng siú-léng, í-ki̍p hōe-chiòng ê bīn-chêng, kóng,

3“Goán lāu-pē sí tī khòng-iá, m̄-sī in-ūi kap Khó-la hit-tóng ê lâng tàu-tīn kong-kek Siōng Chú; sī tī ka-kī ê chōe-tiong sí; m̄-kú i bô hāu-siⁿ.

4Sī-án-chóaⁿ in-ūi goán lāu-pē bô hāu-siⁿ, chiū chiong i ê miâ tùi i ê chong-cho̍k the̍h-tiāu? Chhiáⁿ tùi goán lāu-pē ê hiaⁿ-tī pun sán-gia̍p hō͘ goán.”

5 Mô͘-se chiū chiong in ê àn-kiāⁿ the̍h kàu Siōng Chú ê bīn-chêng.

6Siōng Chú bēng-lēng Mô͘-se, kóng,

7“Se-lô-hui-hap ê cha-bó͘-kiáⁿ kóng-liáu ū-lí; lí it-tēng tio̍h tùi in lāu-pē ê hiaⁿ-tī pun thó͘-tōe hō͘ in chòe sán-gia̍p, hō͘ in kè-sêng in lāu-pē ê sán-gia̍p.

8Lí mā tio̍h hoan-hù Í-sek-lia̍t-lâng, kóng, ‘Lâng nā sí, bô hāu-siⁿ, chiū tio̍h chiong i ê sán-gia̍p pun hō͘ i ê cha-bó͘-kiáⁿ.

9I nā koh bô cha-bó͘-kiáⁿ, chiū tio̍h chiong i ê sán-gia̍p hō͘ i ê hiaⁿ-tī.

10I nā koh bô hiaⁿ-tī, chiū tio̍h chiong i ê sán-gia̍p hō͘ i ê lāu-pē ê hiaⁿ-tī.

11I ê lāu-pē nā koh bô hiaⁿ-tī, chiū tio̍h chiong i ê sán-gia̍p hō͘ i ka-cho̍k ê chì-chhin kè-sêng.’” Chit-ê sī Mô͘-se chiàu Siōng Chú ê hoan-hù, beh chòe Í-sek-lia̍t-lâng ê kui-lē kap bēng-lēng.

Iok-su-a Siū-kéng Chòe Mô͘-se ê Kè-sêng-jîn(Sin 31.1-8)

12Siōng Chú tùi Mô͘-se kóng, “Lí chiūⁿ A-pa-lîm-soaⁿ, khì khòaⁿ góa sù hō͘ Í-sek-lia̍t-lâng ê tōe.

13Lí khòaⁿ-liáu, chiū beh kap lí ê hiaⁿ-ko A-lûn kâng-khoán, tńg-khì lí ê lia̍t-chó͘ hia.

14In-ūi tī Sîm ê khòng-iá, hōe-chiòng teh kā góa chhá ê sî, lín ûi-pōe góa ê bēng-lēng; tī chhèng-chhut chúi ê só͘-chāi, hōe-chiòng ê bīn-chêng, bô chun góa chòe sèng.” (Chit-ê chúi sī chí Sîm ê khòng-iá, Ka-te-su ê Bí-lī-pa chúi-chôaⁿ.)

15 Mô͘-se tùi Siōng Chú kóng,

16“Siōng Chú, lí sī siúⁿ-sù sìⁿ-miā hō͘ sè-kan-lâng ê Siōng-tè, kiû lí siat-li̍p chi̍t ê lâng lâi tī-lí hōe-chiòng,

17tī in tiong-kan chhut-ji̍p, chhōa in kau-chiàn, hō͘ Siōng Chú ê hōe-chiòng bōe chhin-chhiūⁿ bô bo̍k-chiá ê iûⁿ-kûn.”

18Siōng Chú tùi Mô͘-se kóng, “Lūn ê kiáⁿ Iok-su-a lāi-bīn ū Siōng-tè ê sîn, lí chhōa i lâi, kā i àn-chhiú,

19hō͘ i khiā tī chè-si Í-lī-a-sat kap choân-thé hōe-chiòng ê bīn-chêng, chiong chit-chek kau-tài i.

20Koh chiong lí ê chun-êng koân-pèng pun hō͘ i, hō͘ Í-sek-lia̍t ê choân-thé hōe-chiòng lóng ho̍k-chiông i.

21I tio̍h khiā tī chè-si Í-lī-a-sat ê bīn-chêng, chhiáⁿ Í-lī-a-sat ēng O͘-lêng ǹg Siōng Chú chhéng-sī; i kap Í-sek-lia̍t choân-thé hōe-chiòng tio̍h chiàu Í-lī-a-sat ê chí-sī chhut-ji̍p kau-chiàn.”

22Mô͘-se chiū chiàu Siōng Chú ê bēng-lēng chhōa Iok-su-a lâi, hō͘ i khiā tī chè-si Í-lī-a-sat kap hōe-chiòng ê bīn-chêng,

23koh chiàu Siōng Chú tùi i ê bēng-lēng, kā Iok-su-a àn-chhiú, chiong chit-chek kau-tài i.

Bîn-sò͘-kì 27 - 現代台語譯本羅馬字版(TTVR)-闽南语

Learn More About Us